မဲခေါင်၊ ဇန်နဝါရီ ၁၃
ထိရောက်တဲ့ လေကြောင်းရန် ကာကွယ်ရေး အစီအမံတွေ အတွက် လက်တွဲ ကူညီ ပံ့ပိုးပေးကြဖို့ မိတ်ဖက် နိုင်ငံတွေနဲ့ နိုင်ငံတကာ အဖွဲ့အစည်းတွေကို အလေးအနက် တိုက်တွန်းတယ်လို့ အမျိုးသား ညီညွတ်ရေး အစိုးရ-NUG၊ လူသားချင်း စာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာန က ဒီကနေ့ တောင်းဆို လိုက်ပါတယ်။
အရပ်သား ပြည်သူတွေကို ထိရောက်စွာ ကာကွယ်ပေးနိုင်ရေး အတွက် လူသားချင်းစာနာမှု အကူအညီတွေ လုံလောက်စွာ ကူညီ ထောက်ပံ့နိုင်ဖို့ အတွက် လေကြောင်း တိုက်ခိုက်မှုတွေ ရပ်တန့်အောင် အဘက်ဘက်မှ လုပ်ဆောင်ပေးဖို့ မိတ်ဖက်နိုင်ငံတွေနဲ့ နိုင်ငံတကာ အဖွဲ့အစည်းတွေကို အမျိုးသား ညီညွတ်ရေး အစိုးရက တိုက်တွန်းလိုက်တာပါ။
စစ်ကောင်စီဟာ လူသားချင်း စာနာ ထောက်ထားမှု ဆိုင်ရာ နိုင်ငံတကာ ဥပဒေ တွေကို ချိုးဖောက်ပြီး တိုင်းရင်းသားတွေ အပါအဝင် ပြည်သူလူထု တစ်ရပ်လုံး အပေါ် လူ့အခွင့်အရေး ချိုးဖောက်ကျူးလွန်မှုတွေ၊ ကျေးရွာလုံးကျွတ် မီးရှို့ ဖျက်ဆီး တာတွေ၊ ပြည်သူလူထုရဲ့ ချွေးနှဲစာ အခွန်ဘဏ္ဍာငွေတွေထဲမှ ရရှိတဲ့ ငွေကြေးနဲ့ ဂျက်လေယာဉ်တွေနဲ့ စစ်လက်နက် ပစ္စည်းတွေ ဝယ်ယူကာ လေကြောင် းတိုက်ခိုက်မှုတွေ နိုင်ငံအနှံ့မှာ ကျူးလွန်နေတယ်လို့ ဆိုပါတယ်။
စစ်ကောင်စီဟာ ကရင်ပြည်နယ်၊ ကချင်ပြည်နယ်၊ စစ်ကိုင်းတိုင်းနဲ့ မကွေးတိုင်းတို့မှာ လေကြောင်းမှ ဗုံးကြဲ တိုက်ခိုက်မှုတွေ အကြိမ်ကြိမ် ပြုလုပ်ပြီး အရပ်သား ပြည်သူများစွာကို သတ်ဖြတ်ခဲ့တယ်လို့ ဆိုပါတယ်။
ချင်းအမျိုးသားတပ်ဦး-CNF ဌာနချုပ် တည်ရှိရာ Camp Victoria စခန်းကို ဇန်နဝါရီလ ၁၀ ရက်၊ ညနေ ၄ နာရီ ၃၀ မိနစ်မှာ တစ်ကြိမ်၊ ဇန်နဝါရီလ ၁၁ ရက်နေ့၊ ညနေ ၄ နာရီမှာ တစ်ကြိမ် တိုက်လေယာဉ်တွေနဲ့ ဗုံးကြဲ တိုက်ခိုက်ခဲ့ရာ ချင်းအမျိုးသားတပ်ဦး တပ်ဖွဲ့ဝင် ၅ ဦး ကျဆုံးခဲ့တဲ့ အတွက် အထူးဝမ်းနည်း ကြေကွဲ ရတယ်လို့လည်း လူသားချင်း စာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနက ဆိုပါတယ်။
ဒီဖြစ်စဉ် အတွက် ဝန်ကြီးဌာန အနေနဲ့ ချင်းပြည်သူ လူထု တစ်ရပ်လုံးနဲ့အတူ ထပ်တူစာနာ ခံစားရပြီး လိုအပ်တဲ့ လူသားချင်း စာနာမှု အကူအညီတွေကို ပံ့ပိုးပေးနေတယ်လို့လည်း ပြောပါတယ်။
စစ်ကောင်စီဟာ Camp Victoria စခန်းကို လေကြောင်းနဲ့ တိုက်ခိုက်ရာမှာ ကလေးငယ်တွေ အမျိုးသမီးတွေ ရှိရာ မိသားစု လိုင်းခန်း တွေနဲ့ ဆေးရုံ ဆေးခန်းတွေ၊ ဆေးပစ္စည်း သိုလှောင်တဲ့ နေရာတွေကို ပစ်မှတ်ထားပြီး ဗုံးကြဲ တိုက်ခိုက်တာကို ပြင်းထန်စွာ ရှုတ်ချတယ်လို့လည်း ဆိုပါတယ်။
အခုလို လေကြောင်းတိုက်ခိုက်မှုတွေ ထပ်တလဲလဲ ကျူးလွန်နေတာကြောင့် မြန်မာနိုင်ငံ တစ်ဝှမ်းမှာ စစ်ဘေးရှောင် ပြည်သူတွေ တစ်နေ့ထက်တစ်နေ့ ပိုမို တိုးပွားလျက်ရှိပြီး လူသားချင်း စာနာမှု အကူအညီတွေ အရေးတကြီး လိုအပ်လျက်ရှိတယ်လို့ ဆိုပါတယ်။
အဲဒီ အကူအညီတွေ ဖြည့်ဆည်းပေးနိုင်ဖို့ အတွက် လူသားချင်း စာနာ ထောက်ထားရေးနဲ့ ဘေးအန္တရာယ် ဆိုင်ရာ စီမံခန့်ခွဲရေး ဝန်ကြီးဌာန အနေနဲ့ သက်ဆိုင်ရာ အဖွဲ့အစည်းတွေနဲ့ လက်တွဲပြီး အတတ်နိုင်ဆုံး ကူညီဆောင်ရွက်ပေးလျက် ရှိတယ်လို့လည်း သိရပါတယ်။
MK-003