မဲခေါင်၊ ဇန်နဝါရီ ၂၃
ချင်းပြည်နယ်၊ မင်းတပ်မြို့နယ် အတွင်း ဒေသကာကွယ်ရေးတပ် CDF-Mindat ထိန်းချုပ် နယ်မြေတွေမှာ စစ်ကောင်စီတပ်က အခုလအတွင်း လေကြောင်းက ဗုံးကြဲ တိုက်ခိုက်မှု ၈ ကြိမ် ပြုလုပ်ခဲ့တယ်လို့ မင်းတပ် CDF က ဒီကနေ့ ထုတ်ပြန်ပါတယ်။
စစ်ကောင်စီတပ်ဟာ အပစ်မဲ့ ပြည်သူတွေ၊ စစ်ဘေးရှောင် ပြည်သူတွေနဲ့ CDF-Mindat ရဲ့ တပ်စခန်းတွေကို ဦးတည်ကာ တိုက်လေယာဉ်တွေနဲ့ ဗုံးကြဲ တိုက်ခိုက်နေပါတယ်။
ဇန်နဝါရီ ၇ ရက် ညပိုင်းမှာ ၂ ကြိမ်၊ ဇန်နဝါရီ ၈ ရက် မနက်မှာ တစ်ကြိမ်၊ ဇန်နဝါရီ ၂၂ ရက် ညပိုင်းမှာ ၂ ကြိမ်၊ ဒီကနေ့ မနက် ၁၁ နာရီမှာ ၃ ကြိမ် စုစုပေါင်း ၈ ကြိမ် တိုက်ခိုက်ခဲ့တယ်လို့ ဆိုပါတယ်။
ဒါကြောင့် ပြည်သူတွေ အနေနဲ့ မိမိတို့ နေအိမ်တွေအနီးမှာ သတ်မှတ်ထားတဲ့ အတိုင်းအတာ ပြည့်မီတဲ့ ပုန်းခိုကျင်းတွေ တူးကြဖို့နဲ့ စစ်ကောင်စီရဲ့ လေကြောင်းရန်ကို အထူး သတိပြုကြဖို့ မင်းတပ် CDF က အသိပေး ထုတ်ပြန်ထားပါတယ်။
စစ်ကောင်စီတပ်ဟာ မင်းတပ်မြို့နယ်အတွင်း တိုက်ပွဲဖြစ်ပွားမှု မရှိဘဲ လေကြောင်းက တိုက်ခိုက်နေတာ ဖြစ်ပါတယ်။
ဇန်နဝါရီ ဒုတိယပတ် အတွင်း ကလည်း စစ်ကောင်စီတပ်ဟာ ထန်တလန်မြို့နယ်ရှိ ချင်းအမျိုးသားတပ်ဦး-CNF ဌာနချုပ်ကို လေကြောင်းမှ ဗုံးကြဲ တိုက်ခိုက်ခဲ့ရာ CNF ရဲဘော် ၅ ဦး ကျဆုံးပြီး ဒဏ်ရာရသူတွေ ရှိခဲ့ပါတယ်။
ပုံစာ- ဇန်နဝါရီ ၂၂ ရက်က မင်းတပ်မြို့နယ် စွန်တောင်ကျေးရွာအနီး လေကြောင်းမှ ပစ်ခတ်မှုကြောင့် လူနေအိမ်တွေ ပျက်စီးနေပုံ။
ဓာတ်ပုံ – မင်းတပ်-ပအဖ။
MK-003