မဲခေါင်၊ ဇန်နဝါရီ ၂၁
အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာနက သရက်-ကံမ-မင်းတုန်း ပူးပေါင်း ပကဖ-EAGLE FORCE တပ်ဖွဲ့ကို ပြည်သူ့ကာကွယ်ရေး တပ်မတော်၊ သရက်ခရိုင်- PDF တပ်ရင်း အဖြစ် ဒီကနေ့ ပြောင်းလဲ အတည်ပြု ဖွဲ့စည်း လိုက်တယ်လို့ သိရပါတယ်။
မကွေးတိုင်း အခြေစိုက် EAGLE FORCE တပ်ဖွဲ့ဟာ မူလက NUG၊ ကာကွယ်ရေးဝန်ကြီးဌာနက ဖွဲ့စည်း ပေးထားတဲ့ ပြည်သူ့ကာကွယ်ရေးအဖွဲ့တွေ ဖြစ်ပြီး ဝန်ကြီးဌာနက တပ်ရင်း တပ်ဖွဲ့တွေ ထပ်မံတိုးချဲ့ ဖွဲ့စည်းရာမှာ ပူးပေါင်းအဖွဲ့ တပ်ရင်း ဖြစ်လာတာလို့ EAGLE FORCE တပ်ဖွဲ့ တာဝန်ခံ ကိုမြတ် က ပြောပါတယ်။
“ ကျနော်တို့က NUG ရဲ့ MOD လက်အောက်က သရက်-ကံမ-မင်းတုန်း ပူးပေါင်းထားတဲ့ ပကဖ တွေပါ။ အခု ဝန်ကြီးဌာနက တပ်ရင်းတပ်ဖွဲ့တွေ ဖွဲ့တဲ့ အခါမှာလည်း ကျနော်တို့ ၃ မြို့နယ် ပူးပေါင်းအဖွဲ့ တပ်ရင်းအဖြစ် လျှောက်တဲ့အခါမှာ အခုလို ဖွဲ့စည်းပေးလိုက်တာပါ။ ပြောင်းလဲ ဖွဲ့စည်းလိုက်လို့ ဝန်ကြီးဌာနနဲ့ ပိုပြီး ချိတ်ဆက် ဆောင်ရွက်တာတွေ အဆင်ပြေလာမယ်လို့ ထင်ပါတယ်” လို့ သူကဆိုပါတယ်။
သရက်ခရိုင် တပ်ရင်း (၄)-EAGLE FORCE တပ်ဖွဲ့ အနေနဲ့ ပြည်သူ့ကာကွယ်ရေး ဝန်ကြီးဌာနက ပေးအပ်လာမယ့် တာဝန်တွေကို ကျေပွန်အောင် ထမ်းရွက်ပြီး စစ်အာဏာရှင်စနစ် အပြီးပြတ် ကျဆုံးတဲ့ အထိ ဆန့်ကျင် တော်လှန်သွားမယ်လို့လည်း အသိပေး ထုတ်ပြန်ထားပါတယ်။
MK-003