မဲခေါင်၊ ဇွန် ၃၀
ပအိုဝ်းအမျိုးသားလွတ်မြောက်ရေးအဖွဲ့ချုပ်၏ တရားဝင်တည်ရှိမှုနှင့် စပ်လျဉ်း၍ ဇွန်၂၄ ရက်တွင် ဦးခွန်ဥက္ကာ “PNLO” အမည်ဖြင့် ထုတ်ပြန်ခဲ့သော ကြေညာချက်သည် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ၏ ဖွဲ့စည်းပုံအခြေခံဥပဒေ၊ ညီလာခံ၏ အမြင့်ဆုံးအာဏာ၊ အဖွဲ့အစည်း၏ တရားဝင်ဆုံးဖြတ်ချက်များနှင့် ကိုက်ညီမှု မရှိသည့်အပြင် မိတ်ဖက်အဖွဲ့အစည်းများနှင့် ပြည်သူလူထုအကြား အထင်အမြင် လွဲမှားမှုများ ဖြစ်ပေါ်စေနိုင်သဖြင့် PNLO အနေဖြင့် ယနေ့ ဇွန် ၃၀ ရက်တွင် ရှင်းလင်းချက်တစ်ရပ် ထုတ်ပြန်လာသည်။
ယင်းထုတ်ပြန်ချက်တွင် ဦးခွန်ဥက္ကာသည် PNLO ၏ တတိယအကြိမ်ညီလာခံတွင် ဗဟိုကော်မတီဝင်အဖြစ် ဝင်ရောက်အရွေးခံခြင်း မရှိသကဲ့သို့၊ ဗဟိုကော်မတီဝင်အဖြစ် ညီလာခံက ရွေးကောက်တင်မြှောက်ခဲ့ခြင်းလည်း မရှိဘဲ PNLO ၏ ဖွဲ့စည်းပုံအခြေခံဥပဒေနှင့်အညီ ဗဟိုကော်မတီက ၎င်းအား နာယကအဖြစ်သာ တာဝန်ပေးခန့်အပ်ခဲ့ခြင်း ဖြစ်သည်ဟု ဆိုသည်။
နာယက ဦးခွန်ဥက္ကာသည် ၂၀၂၄ ခုနှစ်၊ စက်တင်ဘာ ၁၀ ရက်တွင် အဖွဲ့ချုပ်မှ နုတ်ထွက်ကြောင်း ထုတ်ပြန်ကြေညာခဲ့သူဟုလည်း ထုတ်ပြန်ချက်တွင် ပါရှိသည်။
အလားတူ ဗဟိုအလုပ်အမှုဆောင် ကော်မတီဝင်ဖြစ်သော နန်းယဉ်ယဉ်စိုးလည်း ဗဟိုကော်မတီအစည်းအဝေးတွင် အဖွဲ့ချုပ်မှ နုတ်ထွက်ကြောင်း နှုတ်ဖြင့်တင်ပြခဲ့သည်ဟု ပါရှိသည်။
အဆိုပါနုတ်ထွက်မှုများကို PNLO ဗဟိုကော်မ တီက ဖွဲ့စည်းပုံအခြေခံဥပဒေနှင့်အညီ လက်ခံခွင့်ပြုရန် ဆွေးနွေးဆုံးဖြတ်ခြင်း မပြုရသေးမီတွင် ၎င်းတို့သည် PNLO ၏ အမည်ကို အခြေခံ၍ “PNLO NCA-S” ဟူသော အမည်ဖြင့် အဖွဲ့အစည်းအသစ်တစ်ခုကို ၂၀၂၄ ခုနှစ် အောက်တိုဘာ ၉ ရက်တွင် ဖွဲ့စည်းဆောင်ရွက်ခဲ့ကြသည်ဟု ဆိုသည်။
ဗဟိုကော်မတီက ယင်းဆောင်ရွက်ချက်သည် PNLO ၏ ဖွဲ့စည်းပုံအခြေခံဥပဒေကို ချိုးဖောက် သည့် လုပ်ရပ်ဖြစ်ကြောင်း သုံးသပ်ဆုံးဖြတ်ခဲ့ပြီး၊ ၎င်းတို့အား အဖွဲ့ချုပ်မှ စည်းကမ်းအရ ထုတ်ပယ်ကြောင်းနှင့် လာမည့်စတုတ္ထအကြိမ်ညီလာခံတွင် အယူခံပိုင်ခွင့်ရှိကြောင်းကို ၂၀၂၄ ခုနှစ် အောက်တိုဘာ ၁၃ ရက်တွင် တရားဝင်ထုတ်ပြန်ကြေညာခဲ့ပြီး ဖြစ်သည်ဟု ဆိုသည်။
သို့ဖြစ်၍ PNLO မှ မိမိတို့၏ ဆန္ဒအလျောက် နုတ်ထွက်ပြီးသူများ၊ ထုတ်ပယ်ခံရသူများသည် PNLO ၏ အမည်ကိုအသုံးပြု၍ အဖွဲ့အစည်း၊ တပ်ဖွဲ့စည်းခွင့် မရှိပါ။ နိုင်ငံရေးသဘောတူညီချက်များ ပြုလုပ်ခြင်းအပါအဝင် ပြည်တွင်း၊ ပြည်ပ၌ PNLO ကို ကိုယ်စားပြု၍ တရားဝင်ဆောင်ရွက်ပိုင်ခွင့်လည်း မရှိပါ။
ထို့ကြောင့် PNLO NCA-S သည် PNLO ကို တရားဝင်ကိုယ် စားပြုသော အဖွဲ့အစည်းမဟုတ်ကြောင်း ထပ် လောင်းရှင်းလင်းအပ်ပါသည်ဟု ထုတ်ပြန်ချက်က ဆိုသည်။
“PNLO NCA-S အမည်ဖြင့် ထုတ်ပြန်သော စာတမ်းများ၊ ခန့်အပ်စာများ၊ ကိုယ်စားပြုစာများနှင့် အခြားဆက်သွယ်ဆောင်ရွက်မှုများကို PNLO ၏ တရားဝင်သဘောထား သို့မဟုတ် တရားဝင်ကိုယ်စားပြုမှုအဖြစ် မမှတ်ယူကြပါရန် မေတ္တာရပ်ခံအပ်ပါသည်”ဟု ယခုထုတ်ပြန်ချက်အပေါ် PNLO ၏ စစ်ရေးဆိုင်ရာပြောခွင့်ရှိသူ ခွန်ရိန်းယံက မဲခေါင်သို့ အတည်ပြု ပြောဆိုသည်။
သို့ပါ၍ တိုင်းရင်းသားတော်လှန်ရေးအဖွဲ့အစည်းများ (EROs)၊ နိုင်ငံရေးအင်အားစုများ၊ နိုင်ငံတကာ မိတ်ဖက်အဖွဲ့အစည်းများ၊ သံတမန်အဖွဲ့အစည်းများ၊ ဖွံ့ဖြိုးရေးမိတ်ဖက်များနှင့် သတင်းမီဒီယာများအနေဖြင့် PNLO နှင့်သက်ဆိုင်သော တရားဝင်သတင်းအချက်အလက်များကို PNLO ညီလာခံမှ ရွေးကောက် တင်မြှောက်ထားသော ဗဟိုကော်မတီ၏ တရားဝင်ထုတ်ပြန်ချက်များအပေါ်တွင်သာ အခြေခံဆောင်ရွက်ကြပါရန် လေးစားစွာ အသိပေးထားသည်။
#MeKongNews
#ဦးခွန်ဥက္ကာ
#PNLO
#ထုတ်ပြန်ချက်များ
#အဖွဲ့အစည်း
#တရားဝင်ကိုယ်စားပြုမှု
