မဲခေါင်၊ ဧပြီ ၁၀
ဧပြီ ၈ ရက်နေ့က ထိုင်းနိုင်ငံ ဟတ်ရိုင်ခရိုင် Thai Udom 2 ရွှေဆိုင်ကို အသက် ၆၁ နှစ်ရှိပြီဖြစ်သော မလေးရှားနိုင်ငံသား Yee Bun Long ဓားပြတိုက်ကာ ဘတ် ၇ သန်းတန် ရွှေဆွဲကြိုးများယူဆောင်သွားပြီး ၎င်းမှာ ယခင်ကာလရှည်ကြာ ရာဇဝတ်မှုခင်းပေါင်းများစွာ ကျူးလွန်ခဲ့သည့် မှတ်တမ်းရှိသူဖြစ်ကြောင်းနှင့် ၎င်းအား ဖမ်းဆီးနိုင်ပါက ဆုတော်ငွေဘတ် ၁ သိန်း ချီးမြှင့်မည်ဖြစ်ကြောင်း အမှတ် (၉) ဒေသ ရဲတပ်ဖွဲ့က ကြေညာသွားခဲ့သည်။
သေချာစီစဉ်ကာ ပစ်မှတ်ထား ဓားပြတိုက်ခဲ့သော Thai Udom 2 ရွှေဆိုင်၏ မျက်နှာချင်းဆိုင်ရှိ Thai Yindee ရွှေဆိုင်ကိုလည်း Yee Bun Long သည် ၂၀၁၇ ခုနှစ် ဇန်နဝါရီ ၆ ရက်နေ့က ဓားပြတိုက်ခဲ့သေးပြီး ဘတ် ၂.၃ သန်းတန် ရွှေဆွဲကြိုးများ ယူဆောင်သွားခဲ့သေးကြောင်း၊ ၂၀၁၇ ဇန်နဝါရီ ၂၄ ရက် တွင် ၎င်းကို ဖမ်းဆီးရမိကာ ထောင်တွင်း ၁၈ လ နေထိုင်ပြီး ပြန်လွှတ်သွားခဲ့ကြောင်း၊ ၂၀၁၄ ခုနှစ် မေ ၂၂ ရက်နေ့က ဆောင်ခလာခရိုင်၊ ခို့ယော်ရွာ နေအိမ်တစ်လုံး၌ ထိုင်းနိုင်ငံသား ညီအစ်ကိုနှစ်ဦး သတ်ဖြတ်ခံရမှုတွင်လည်း Yee Bun Long သည် သံသယတရားခံဖြစ်ခဲ့ကြောင်း၊ လွန်ခဲ့သည့် နှစ်ပေါင်း ၂၀ အတွင်း မလေးရှားနိုင်ငံအတွင်းရှိ ပီနန်းပြည်နယ်တွင်းရှိ ဘတ်တားဝေါ့သ်မြို့ ဆီဘာရန်းပါရိုင်းအရပ်မှ ရွှေဆိုင်ကိုလည်း ဓားပြတိုက်ခဲ့ပြီး ထိုင်းသို့ မထွက်ပြေးမီ မလေးရှားနိုင်ငံအတွင်း ရွှေဆိုင်ဓားပြတိုက်မှုမှလည်း ဘတ် သန်း ၅၀ ကျော် ရယူသွားသူဖြစ်သည်ဟု သိရှိရသည်။
ရဲတပ်ဖွဲ့သတင်းရင်းမြစ်တစ်ခုတွင် Yee Bun Long သည် မလေးရှားရဲတပ်ဖွဲ့ အထူးအလိုရှိသူဖြစ်နေပြီး ၎င်းအမည်နှင့်ပတ်သက်ပြီး လုပ်ကြံသတ်ဖြတ်ခံရမှုပေါင်း ၁၀ ဦးမက ရှိနေခဲ့ကြောင်းနှင့် ထိုင်းသို့ရောက်ပြီးနောက် ချင်းမိုင်ရှိ ချိုင်ပရာကန်အရပ်၌ ဘတ် ၂၅၀၀၀၀ ပေးပြီး ထိုင်းမှတ်ပုံတင်အတု ကိုင်ဆောင်ကာ ထိုမှတ်ပုံတင်တွင် အမည်အားဖြင့် Anucha Saeyow သို့ ပေးထားသူဖြစ်သည်ဟုလည်း သိရှိရသဖြင့် ဟတ်ရိုင်ခရိုင်ရဲတပ်ဖွဲ့က ဖမ်းဆီးရမိနိုင်လျှင် ဘတ် ၁ သိန်း ပေးမည်ဟု ဆုတော်ငွေပါကြေညာခဲ့ခြင်းဖြစ်သည်။
ကိုကလင်း
Ref:Khaosodenglish
#MeKongNews
#ဟတ်ရိုင်
#ရွှေဆိုင်
#ဓားပြတိုက်
#မလေးရှားနိုင်ငံသား
