မဲခေါင်၊ ဇွန် ၁၀
ကရင်နီပြည်နယ်မှာ နည်းပညာ ဘီလီယံနာ သူဌေးကြီး Elon Musk ရဲ့ Starlink အင်တာနက်ကို စတင် အသုံးပြုလို့ ရနေပြီလို့ Free Burma Ranger (FBR) အဖွဲ့ တည်ထောင်သူ David Eubank က သူ့ရဲ့ တွစ်တာ လူမှုကွန်ရက်ကနေ အသိပေး လိုက်ပါတယ်။
Starlink အင်တာနက်ဟာ အမေရိကန် လေကြောင်း အာကာသ ကုမ္ပဏီ SpaceX ရဲ့ ဂြိုလ်တု အင်တာနက် ဝန်ဆောင်မှုဖြစ်ပြီး နိုင်ငံပေါင်း ၅၄ နိုင်ငံကျော်မှာ အသုံးပြုနေတဲ့ အင်တာနက်စနစ် ဖြစ်ပါတယ်။
“Starlink ရဲ့ Elon Musk နဲ့ Starlink ကုမ္ပဏီ၊ ပြီးတော့ မိသားစုကို ကျေးဇူးတင်ပါတယ်။ အချင်းချင်း ချစ်ခင်ကြလေ မိသားစုကို ချစ်ခင်ကြလေလေပါပဲ။ ကျွန်တော်တို့ ခင်ဗျားကို ချစ်ပါတယ်။ ဘာလို့လဲ ဆိုတော့ ဒါလေးကို ဖန်တီးခဲ့လို့ပါ။ ခုကျွန်တော်တို့ကတော့ နှစ်ပေါင်း ၇၃ နှစ်လောက် ပြည်တွင်း စစ်တိုက်ပွဲတွေ ပြင်းထန် နေတဲ့ မြန်မာနိုင်ငံမှာပါ။ အာဏာသိမ်းမှု ဖြစ်စဉ် နောက်ပိုင်းမှာလည်း လူပေါင်း ၃ သန်းလောက် နေရပ်စွန့်ခွာ ထွက်ပြေးနေရပြီး ဟော့ဒီ ကရင်နီပြည်မှာတော့ လူ ၃ သိန်းလောက် ထွက်ပြေးနေရတာပါ။ အချို့ရွာတွေက ဗုံးကြဲ တိုက်ခိုက်ခံရပါတယ်။ ငါတို့ကတော့ ဒီမှာ စစ်ရှောင်တွေကို ကူညီစောင့်လျှောက် ပေးနေတာ ဖြစ်ပါတယ်” လို့ David Eubank ကပြောပါတယ်။
တိုက်ပွဲတွေ ပြင်းထန်နေတဲ့ ကရင်နီပြည်နယ်ကို စစ်ကောင်စီက အင်တာနက်နဲ့ ဖုန်းလိုင်းတွေ ဖြတ်တောက် နေတာဖြစ်ပြီး အခုလို့ Starlink အင်တာနက်စနစ် အသုံးပြုလို့ရလာခြင်းက ကြီးမားတဲ့ အထောက်အကူ ဖြစ်စေတယ်လို့ KNDF တပ်ဖွဲ့ဝင် တစ်ဦးက ပြောပါတယ်။
“သိတဲ့အတိုင်း ကရင်နီပြည်နယ်ကို စစ်ကောင်စီက အင်တာနက်နဲ့ ဖုန်းလိုင်းတွေ ဖြတ်ဖို့ ကြိုးစားနေတာ။ ကြားတာတော့ တရုတ်က အကူအညီလည်း ယူတယ်ကြားပါတယ်။ ဒါတွေတော့ မသိပါဘူး။ အခု Starlink အင်တာနက် အသုံးပြုလို့ရတယ် ဆိုတာ ဆက်သွယ်မှု အတွက် ကြီးမားတဲ့ အရွေ့တစ်ခုလို့ ထင်ပါတယ်။ လက်ရှိတော့ ကျွန်တော်တို့ တပ်ရင်းတပ်ဖွဲ့ဆီကို စက်တွေ မရောက်သေးပါဘူး။ မကြာခင် ရောက်လာမယ်လို့တော့ ထင်ပါတယ်” လို့ သူကပြောပါတယ်။
Starlink ဂြိုလ်တု အင်တာနက် စနစ်ဟာ လုံခြုံရေး မြင့်မားပြီး ပုံမှန် အင်တာနက်လိုင်းတွေလို ဆက်သွယ်ရေး တာဝါတိုင်တွေ မလိုအပ်သလို ကမ္ဘာအနှံ့ ဆက်သွယ်နိုင်တာကြောင့် လက်ရှိ ကရင်နီပြည်နယ် အပါအဝင် ရုရှား ကျူးကျော်စစ်ကို ကာကွယ်နေတဲ့ ယူကရိန်းနိုင်ငံနဲ့ အမျိုးသမီးအရေး လှုပ်ရှားနေတဲ့ အီရန်နိုင်ငံတွေကို ဝန်ဆောင်မှု ပေးထားပါတယ်။
ပြီးခဲ့တဲ့ ၂၀၂၂ ခုနှစ်ကလည်း ဆက်သွယ်ရေး လုပ်ငန်းတွေကို ချုပ်ကိုင်ထားပြီး သတင်းအချက်အလက်တွေ ရယူနေတဲ့ စစ်ကောင်စီကို တန်ပြန်နိုင်ဖို့ အမျိုးသားညီညွတ်ရေးအစိုးရ၊ ဆက်သွယ်ရေး သတင်းအချက်အလက်နဲ့ နည်းပညာဝန်ကြီးဌာန၊ ပြည်ထောင်စုဝန်ကြီး ဦးထင်လင်းအောင်က နည်းပညာ သူဌေးကြီး Elon Musk ကို မြန်မာနိုင်ငံမှာ Starlink အင်တာနက်စနစ် အသုံးပြုခွင့်ပေးဖို့ တောင်းဆိုဖူးပါတယ်။
MK-007
#MekongNews
#ကရင်နီပြည်နယ်
#Starlink
#KNDF
