“ဝ”တပ်ဖွဲ့တပ်စွဲထားတဲ့ နယ်စပ်စခန်း ၉ ခု ဆုတ်ခွာပေးဖို့ ထိုင်းဘုရင့်တပ်မတော် နယ်စပ်ရေးရာဗိုလ်ချုပ် ကိုယ်တိုင် ၃ကြိမ်လာရောက်ဆွေးနွေးပေမယ့် ညှိနှိုင်းမရလို့ ထိုင်းဘက်က စစ်ရေးပြင်
မဲခေါင် ၊ နိုဝင်ဘာ ၂၆
ရှမ်းပြည်အရှေ့ပိုင်းနဲ့ ထိုင်းနိုင်ငံထိစပ်နေတဲ့ နေရာတွေက UWSA “ဝ”တပ်ဖွဲ့ စစ်ဒေသ ၁၇၁ တပ်စွဲထားတဲ့နေရာတွေ ၉ နေရာကို ပြန်လည်ဆုတ်ခွါပေးဖို့ ထိုင်းဘုရင့်တပ်မတော်၊ စစ်ဘက်နယ်စပ်ရေးရာဌာန လက်ထောက်ဦးဆောင်ညွှန်ကြားရေးမှူး ဗိုလ်ချုပ် ယုသာဖူမိ ဘူယာရစ် ကိုယ်တိုင် မြန်မာနိုင်ငံဘက်ကို ၃ကြိမ်တိုင်တိုင် လာရောက်ဆွေးနွေးခဲ့ပေမယ့် ညှိနှိုင်းလို့မရတာကြောင့် ထိုင်းနိုင်ငံဘက်က စစ်ရေးပြင်နေတာဖြစ်တယ်လို့ မဲခေါင်သတင်းဌာနက စုံစမ်းသိရပါတယ်။
ထိုင်းဘုရင်တပ်မတော်က ဗိုလ်ချုပ်က မြန်မာနိုင်ငံ၊ ရှမ်းပြည်အရှေ့ပိုင်း၊ မိုင်းဆတ်နယ်ထဲအထိ ၃ကြိမ်တိုင် လူကိုယ်တိုင်လာရောက်ဆွေးနွေးရာမှာ မြန်မာစစ်တပ်နဲ့ “ဝ”တပ်ဖွဲ့ဘက်က အပြန်အလှန် လွှဲချနေပြီး ညှိနှိုင်းနိုင်ခြင်းမရှိတာကြောင့် ထိုင်းဘက်က စစ်ရေးနဲ့ တိုက်ဖို့အထိ အခြေအနေတင်းမာနေတာလို့ မိုင်းဆတ်နယ်မြေနဲ့ နီးစပ်တဲ့သတင်းရင်းမြစ်က မဲခေါင်ကိုပြောပါတယ်။
“ဘုရင်ကိုယ်တိုင်က တောင်းလို့မရရင် တိုက်ဆိုပြီး ဘုရင့်အနီးကပ် နန်းတော် တော်ဝင်တပ်က ဗိုလ်ချုပ်ကြီးတစ်ယောက်ကို ညွှန်ကြားထားတယ်။ ထိုင်းဘက်က အခြေအနေအတော်တင်းမာနေတာ။ သူတို့ဘက်က အစည်းအဝေးတိုင်း တောင်းတာ၊ အဲ့ဒီဗိုလ်ချုပ်ကိုယ်တိုင်လဲ မြန်မာဘက်ကိုလာကြည့်သွားတယ်”လို့ သူကကိုပြောပါတယ်။
ရှမ်းပြည်နယ်အရှေ့ပိုင်း မိုင်းတုံမြို့နယ်နဲ့ ထိုင်းနိုင်ငံ မယ်ဟောင်ဆောင်ခရိုင် ထိစပ်နေတဲ့ နေရာတွေထဲက “ဝ”တပ်ဖွဲ့ UWSA တပ်စွဲထားတဲ့နေရာတွေကို ထိုင်း-မြန်မာ နယ်ခြားမကော်မတီ(TBC)နဲ့ ဒေသဆိုင်ရာ နယ်ခြားကော်မတီ(RBG) အစည်းအဝေးအဆင့်ဆင့်မှာ ထိုင်းဘက်က စစ်စခန်းတွေဆုတ်ပေးဖို့ စစ်ကောင်စီထံကို အကြိမ်ကြိမ်ဆွေးနွေး တောင်းဆိုခဲ့တာဖြစ်ပါတယ်။
ထိုင်းဘုရင့်တပ်မတော်က တာဝန်ရှိသူတွေနဲ့ “ဝ”တပ်ဖွဲ့ UWSA က အရာရှိတွေဟာ နိုဝင်ဘာ ၁၈ ရက်နဲ့ ၁၉ ရက်က ချင်းမိုင်မြို့မှာလည်း အစည်းအဝေးပြုလုပ်ထားပြီး ထိုင်းဘက်ကတောင်းဆိုတာကို “ဝ”တပ်ဖွဲ့ဘက်က ပန်ဆန်းဌာနချုပ်ကို ပြန်လည်တင်ပြထားတယ်လို့ သိရပါတယ်။
“ဝ”ပြည်တောင်ပိုင်း ၁၇၁ စစ်ဒေသထဲမှာရှိတဲ့ စစ်စခန်း ၉ ခုကို ထိုင်းဖက်က ဖယ်ရှားခိုင်းတာ မှန်ကန်ပြီး ထိုင်းဘက်က အင်အားတိုးတယ်လို့ သိရကြောင်း “ဝ” တပ်ဖွဲ့ပြောခွင့်ရပုဂ္ဂိုလ် ဦးညီရမ်းက Wa News Land သတင်းဌာနကို ပြောထားပါတယ်။
ဒီလိုကိစ္စမျိုးဟာ “ဝ”တပ်ဖွဲ့နဲ့တင်မပြီးတာကြောင့် နိုင်ငံတော်ခေါင်းဆောင်ပိုင်း (စကစခေါင်းဆောင်ပိုင်း) ကို အကြောင်းကြားထားတယ်လို့ ဦးညီရမ်းက ပြောကြောင်း Wa News Land မှာ ဖော်ပြထားပါတယ်။
UWSA “ဝ”တပ်ဖွဲ့က တောင်ပိုင်း စစ်ဒေသ ၁၇၁ ဖွဲ့စည်းပြီး မိုင်းဆတ်မြို့နယ်ကနေ မိုင်းတုံမြို့နယ်တစ်လျောက် ဝမ်ဟုန်၊ ဟွေအော၊ ပုံပါကျင်နဲ့ နယ်ခြားအမှတ် BP1 တစ်လျောက် ထိုင်းနိုင်ငံနဲ့ ထိစပ်နေတဲ့ နယ်စပ်တွေမှာ စစ်စခန်းတွေ တည်ဆောက်ထားတာဖြစ်ပါတယ်။
ထိုင်းနိုင်ငံနယ်စပ် မိုင်းတုံမြို့နယ်အတွင်းက UWSA “ဝ”တပ်ဖွဲ့က တပ်စွဲထားတဲ့ စစ်စခန်းတွေထဲမှာ ဗမာကွန်မြူနစ်ပါတီ ခေတ်ကတည်းက စစ်ဒေသ ၁၇၁ အဖြစ်သတ်မှတ်ပြီး တပ်စွဲထားတဲ့ စစ်စခန်းတွေရှိသလို ၂၀၀၁ ခုနှစ် RCSS ရှမ်းတပ်ဖွဲ့ တပ်စွဲထားတဲ့ စစ်စခန်းနေရာတွေကို တိုက်ခိုက်သိမ်းပိုက်ပြီး စခန်းအထိုင်ချထားတဲ့ နေရာတွေလဲရှိပါတယ်။
MK-002
#MeKongNews
