မဲခေါင်၊ ဇန်နဝါရီ ၃၁
ပြီးခဲ့တဲ့သီတင်းပတ်က တောင်ကိုရီးယားဟာ မြောက်ကိုရီးယားရဲ့ အဓိကအကျဆုံး ရန်သူဖြစ်တယ်လို့ ထုတ်ပြန်ခဲ့ ပြီးတောင်မြောက်ပြန်လည်ပေါင်းစည်းရေး အဖွဲ့အစည်းတွေကို ဖျက်သိမ်းလို့ ပေါင်းစည်းရေးမုဒ်ဦးကိုပါ ဖြိုဖျက် ပစ်ခဲ့တဲ့ မြောက်ကိုရီးယားခေါင်းဆောင် ကင်ဂျုံအန်ဟာ ဇန်နဝါရီ ၂၈ ရက်နေ့က ရေငုပ်သင်္ဘောကနေ ပစ်လွှတ်တဲ့ ခရုဇ်ဒုံးကျည်မြောက်များစွာကို အနောက်ပင်လယ်ပြင်မှာ ပစ်ခတ်စမ်းသပ်ခဲ့ပြန်ပါတယ်။
ဒီပစ်ခတ်မှုဟာ တစ်ပတ်မပြည့်မီအချိန်အတွင်း ၃ ကြိမ်မြောက်အဖြစ် ခရုဇ်ဒုံးကျည်တွေကို စမ်းသပ်ပစ်ခတ်မှုဖြစ် ပြီး အမေရိကန်နဲ့ တောင်ကိုရီးယားမဟာမိတ်စစ်ဦးစီးဌာနက အခြေအနေကို အနီးကပ်စောင့်ကြည့်ပြီး အချက် အလက်တွေ စုဆောင်းနေကြောင်း ဇန်နဝါရီ ၂၉ ရက်မှာ သတင်းထုတ်ပြန်ပါတယ်။
ကင်ဂျုံအန်ဟာ အမေရိကန်ရဲ့ နျူကလီးယားလက်နက်တွေပါတဲ့ ဒေသတွင်း စစ်ရေးပူးပေါင်းလေ့ကျင့်နေမှုဟာ သူတို့နိုင်ငံ အချုပ်အခြာအာဏာကို ထိပါးပြီး အချိန်မရွေး စစ်ရေးအရ ဝင်ရောက်သိမ်းပိုက်ဖို့ ပြင်ဆင်နေတာမျိုး ဖြစ်လို့ တားဆီးတန်ပြန်နိုင်ရေး ခေတ်မီလက်နက်တွေကို တိုးမြှင့်ထုတ်လုပ်၊ စမ်းသပ်ပစ်လွှတ်မှုတွေ လုပ်ရမှာပဲ လို့ ပြောဆိုထားပါတယ်။
အခုနောက်ဆုံး ပစ်ခတ်တဲ့ ရေငုပ်သင်္ဘောကပစ်တဲ့ ခရုဇ်ဒုံးကျည်တွေဟာ Pulhwasal-3-31 လို့ အမည်ပေးထားတဲ့ ဒုံးကျည်တွေဖြစ်ပြီး ပြီးခဲ့တဲ့ တစ်နှစ်အတွင်း ကင်ဂျုံအန်ဟာ အမေရိကန်နဲ့ တောင်ကိုရီးယားကို အံတုမှုအဖြစ် အသံထက်မြန်တဲ့ လောင်စာဖြည့် တိုက်ချင်းပစ်ဒုံးတွေ၊ နျူကလီးယားတင်ဆောင်နိုင်စွမ်းရှိတဲ့ ရေအောက်ဒရုန်း ပစ်ခတ်စမ်းသပ်မှုတွေအပြင် တောင်ကိုရီးယားပိုင် ကျွန်း ၂ ကျွန်းနား လက်နက်ကြီးကျည် ရာချီ ပစ်ခတ်မှုတွေကို စဉ်ဆက်မပြတ်လုပ်ဆောင်နေခဲ့ပါတယ်။
Ref: Aljazeera
MKF-001
#MeKongNews
#မြောက်ကိုရီးယား
#ခရုဇ်
#ဒုံးကျည်
#ပစ်ခတ်