မဲခေါင်၊ ဧပြီ ၅
လူသတ်မှုနဲ့ ဖမ်းဆီးခံရသူ တာချီလိတ်မြို့က ဇွဲသာယာကမ်းခြေပိုင်ရှင် ဦးဇွဲဟာ ပြီးခဲ့တဲ့ ရက်ပိုင်းမှာ အမှုကနေ ပြန်လွတ်လာပြီလို့ သတင်းရင်းမြစ်တွေက မဲခေါင်ကို ပြောပါတယ်။
ဦးဇွဲဟာ သူပိုင်တဲ့ ဇွဲသာယာကမ်းခြေမှာ ၂၀၂၂ခုနှစ် အောက်တိုဘာလ ၅ရက် ညနေပိုင်းက အမျိုးသမီးတစ်ဦးကို သေနတ်နဲ့ ၂ချက်ဆင့် ပစ်သတ်ခဲ့လို့ လူသတ်မှုပုဒ်မ ၃၀၂နဲ့ အမှုဖွင့်ခံရတာဖြစ်ပြီး ပုဒ်မ ၃၀၂ ကနေ ပုဒ်မ ၃၀၄ကို ပြောင်းလဲခဲ့ပြီး အမှုကနေ ပြန်လွတ်လာတာလို့ တာချီလိတ်သတင်းရင်းမြစ်တစ်ဦးက မဲခေါင်ကို ပြောပါတယ်။
“လူသတ်မှုကနေ လူသေမှုပုဒ်မပြောင်းလိုက်တာပေါ့။ ဗျူဟာကနေ လိုက်ထုတ်ပေးလိုက်တာ။ အကုန်လုံးကိုတော့ညှိရတာပေါ့။ တော်တော်တော့ကုန်သွားတယ်” လို့ သူက ပြောပါတယ်။
ဦးဇွဲကို ဖမ်းဆီးစဉ်က သူကိုင်ဆောင်တဲ့သေနတ်ဟာ လိုင်စင်မရှိတာကြောင့် လက်နက်မှုနဲ့ပါ အမှုဖွင့်ခဲ့ပေမယ့် လက်နက်မှုပုဒ်မ ၁၉(စ)နဲ့ အမှုမဖွင့်ဘဲ ပြစ်ဒဏ်ပေ့ါလျော့တဲ့ ရှမ်းလက်နက်မှုနဲ့ပဲ ဖွင့်လှစ်ခဲ့တာကြောင့် အဲဒီအမှုကနေလည်း ပြီးပြတ်ခဲ့ပြီလို့ စုံစမ်းသိရပါတယ်။
၂၀၂၂ခုနှစ် အောက်တိုဘာလ ၅ရက် ညနေပိုင်းက ဇွဲသာယာကမ်းခြေမှာ ဦးဇွဲရဲ့ အမျိုးသမီးနဲ့ ဈေးလာရောင်းတဲ့ ဈေးသည် မလှလှဝင်းတို့ စကားများတာကို ဦးဇွဲကဝင်ရောက်ပြီး သေနတ်နဲ့ ၂ချက်ပစ်ခတ်ခဲ့တာ ဖြစ်ပါတယ်။
အဲဒီပစ်ခတ်မှုကြောင့် မလှလှဝင်း ကျည်ဆံထိမှန်ခဲ့ပြီး ဆေးရုံအရောက်မှာ သေဆုံးသွားတာဖြစ်ပါတယ်။
ဦးဇွဲကို အမှုစဖွင့်စဉ်ကတည်းက ရဲတိုင်ချက်ထဲမှာ မြေကြီးကိုသေနတ်နဲ့ပစ်ရာကနေ ကျည်ဆံက ကျောက်တုံးကို ထိမှန်ပြီး လမ်းကြောင်းပြောင်းကာ မလှလှဝင်း ထိမှန်သေဆုံးတာဖြစ်တယ်လို့ ဖြစ်စဉ်ကို ပေ့ါလျော့အောင်ရေးသားထားပါတယ်။
ဇွဲသာယာကမ်းခြေပိုင်ရှင် ဦးဇွဲဟာ စစ်သားလူထွက်တယောက်ဖြစ်ပြီး အဖမ်းမခံရခင်အထိ ပြည်သူ့စစ်အဖွဲ့ဝင်တစ်ဦးဖြစ်ပါတယ်။ ခေတ်အဆက်ဆက် တာဝန်ကျ စစ်ဗျူဟာမှူးတွေနဲ့ ရင်းနှီးသူလည်းဖြစ်ပါတယ်။
တာချီလိတ်မြို့မှာ အာဏာပိုင်တွေနဲ့ ရင်းနှီးကျွမ်းဝင်သူတွေ၊ ငွေကြေးတတ်နိုင်သူတွေဟာ ပြစ်မှုကျူးလွန်ပေမယ့် ထောင်မကျဘဲ ပြန်လည်လွတ်မြောက်လာတဲ့ ဖြစ်စဉ်တွေ အရင်ကလည်း အများအပြားရှိခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့လပိုင်းက တာချီလိတ်ထဲကို ခိုးသွင်းမယ့် ဆိုင်ကယ်အစီး ၄၀လောက်နဲ့အတူဖမ်းဆီးရမိတဲ့ မဇ္ဈိမလူမှုကူညီရေးအသင်းဥက္ကဌ ဦးတင့်ဆွေလည်း မကြာမီပြန်လည်လွတ်မြောက်လာဖို့ရှိတယ်လို့ သတင်းရင်းမြစ်တစ်ဦးက မဲခေါင်ကိုပြောပါတယ်။
MK – 004
#MeKongNews