မဲခေါင်၊ မတ်လ ၂၂
ကမ္ဘာရွှေဈေးနဲ့ ပြည်တွင်းရွှေဈေး ချိတ်ဆက်မှုမရှိဘဲ ဈေးကစားလိုသူတွေ အွန်လိုင်းမီဒီယာတွေကနေ တစ်ဆင့်ကောလဟလ ထုတ်လွှင့်နေတာကြောင့်သာ ရွှေဈေးတက်နေရတယ်လို့ ရန်ကုန်တိုင်း ရွှေလုပ်ငန်းရှင်များအသင်းရုံးက မနေ့ကထုတ်ပြန်ပါတယ်။
ကမ္ဘာရွှေဈေး မြင့်တက်လာတာကို သံယောင်လိုက်ကာ ဈေးကစားသူတွေက ရွှေဈေးမြင့်တက်စေဖို့ အွန်းလိုင်းမီဒီယာကနေတစ်ဆင့်ကောလဟလ ထုတ်လွင့်တာ၊ လေပတ်ကားရောင်းဝယ်တာတွေ လုပ်ဆောင်နေတာတွေ့ရှိရတယ်လို့ ထုတ်ပြန်ချက်မှာ ဖော်ပြထားပါတယ်။
ဒါကြောင့် ရွှေနဲ့ငွေကြေးဈေးကွက် စောင့်ကြည့်ထိန်းသိမ်းရေးအဖွဲ့ကလည်း ကမ္ဘာရွှေဈေးကွက်နဲ့ မြန်မာ့ရွှေဈေးကွက် ချိတ်ဆက်မှုမရှိတာကို စနစ်တကျထောက်ပြထားတာကြောင့် လေပတ်ကား ရောင်းဝယ်ခြင်းက ဥပဒေနဲ့ညီညွတ်မှု မရှိဘူးလို့ YGEA က အသိပေးစာ ထပ်မံ ထုတ်ပြန်ပါတယ်။
ဒါပေမယ့် ဒီထုတ်ပြန်ချက်ဟာ စစ်ကောင်စီအလိုကျ မျက်နှာရအောင်ထုတ်ပြန်တာသာဖြစ်ပြီး တကယ့်စျေးကွက်မှာ ချိတ်ဆက်နေတယ်လို့ ရန်ကုန်မြို့ရှိ ရွှေဆိုင်ပိုင်ရှင်တစ်ဦးက ပြောပါတယ်။
“ကမ္ဘာရွှေဈေးနဲ့ ပြည်တွင်းရွှေဈေးက ရွှေတစ်ကျပ်သား ၂ထောင် ခေတ်ကတည်းက ချိတ်ဆက်သွား နေတာ အသင်းကလူတွေလည်း သိတယ်။ ရွှေလုပ်တဲ့သူတိုင်းသိတယ်။ သူတို့ကအပေါ်က လူတွေ အကြိုက်ထုတ်ပြန်ချက်တွေ ထုတ်နေတာ ရည်ညွန်းဈေးတွက်ရင်တောင် အခြေခံပြီးတွက်နေရတဲ့ဟာကို ကမ္ဘာ့ရွှေဈေးတက်လို့ အခုလိုရွှေဈေးတက်နေရတာပါလို့” သူက ပြောပါတယ်။
ပြီးခဲ့တဲ့ရက်ပိုင်းက အမေရိကန်နိုင်ငံက ဘဏ် ၂ဘဏ် ပြိုလဲမှုဖြစ်ပွားခဲ့ပြီး တစ်ပတ်အကြာမှာ ကမ္ဘာရွှေဈေးက တစ်ရှိန်ထိုး မြင့်တက်ခဲ့တာဖြစ်ပါတယ်။
ကမ္ဘာ့ရွှေစျေးမြင့်တက်မှုနဲ့အတူ ပြည်တွင်းရွှေဈေးမှာလည်း တစ်ပတ်အတွင်း အခေါက်ရွှေ တစ်ကျပ်သားကို သိန်း ၃၀ နီးပါး မြင့်တက်လာတာလည်းဖြစ်ပါတယ်။
ဒီနေ့ မှာ ကမ္ဘာရွှေဈေး အနည်းငယ်ကျဆင်းလာတာကြောင့် ပြည်တွင်းရွှေဈေးလည်း အနည်းငယ် ကျဆင်းလာပြီး ကမ္ဘာရွှေဈေး တစ်အောင်စကို ၁၉၇၅ ဒေါ်လာဖြစ်ကာ ပြည်တွင်းရွှေဈေးမှာ တစ်ကျပ်သားလျှင် ၂၉ သိန်း ၅သောင်း ဖြင့်ဈေးဖွင့်ထားပြီး ၂သောင်းနီးပါး ပြန်လည်ကျဆင်းနေတယ်လို့သိရပါတယ်။
MK- 006