မဲခေါင်၊ ဇန်နဝါရီ ၂၆
တာချီလိတ်မြို့နယ်ထဲမှာ စိတ်ကြွေဆေးပြား ၁၀သန်းကျော်အပါအဝင် မူးယစ်ဆေးထုတ်လုပ်စက်၊ လက်နက်ခဲယမ်းတွေနဲ့အတူ ဖမ်းမိတဲ့ ရဲတပ်သားဟောင်း ဖေသက်ဟန်ကို တာချီလိတ်ခရိုင်တရားရုံးက ထောင်ဒဏ်နှစ်အကန့်အသတ်မရှိ ချမှတ်လိုက်တယ်လို့ စုံစမ်းသိရပါတယ်။
မူးယစ်ဆေးဝါးနဲ့ ပတ်သက်တဲ့ ပြည်တွင်း၊ ပြည်ပဂိုဏ်းတွေနဲ့ ဆက်သွယ်ပါဝင်ကျူးလွန်မှု၊ လက်နက်ခဲယမ်းတွေ ကိုင်တွယ်အသုံးပြုမှု၊ မူးယစ်ဆေးဝါးလက်ဝယ်ထားရှိမှုနဲ့ မူးယစ်ဆေးဝါး ထုတ်လုပ်တဲ့ပစ္စည်းတွေ လက်ဝယ်ထားမှု၊ သယ်ယူပို့ဆောင်မှုတွေနဲ့ တရားစွဲဆိုခံထားရတဲ့ ဖေသက်ဟန်ပါ ၉ဦးကို ထောင်ဒဏ် နှစ်အကန့်အသတ်မရှိ ၂မှုနဲ့ ထောင်ဒဏ် ၁၀နှစ် တစ်မှုတို့ကို တစ်ပေါင်းထဲကျခံဖို့ အမိန့်ချလိုက်တာဖြစ်တယ်လို့ သတင်းရင်းမြစ်တစ်ဦးက မဲခေါင်ကို ပြောပါတယ်။
“အကုန်လုံးအတူတူပဲ။ သူတို့အတူအဖမ်းခံရတဲ့ထဲမှာ ထိုင်းတစ်ယောက်၊ တရုတ်တယောက်လဲပါတယ်” လို့ အဲဒီသတင်းရင်းမြစ်က ပြောပါတယ်။
ဖေသက်ဟန်ကို ၂၀၂၂ခုနှစ်၊ ဧပြီလ ၂၄ရက်က သူနေတဲ့ တာချီလိတ်မြို့၊ ဝိန်းကျောက်ရပ်ကွက်ထဲက နေအိမ်မှာ ဖမ်းဆီးရမိခဲ့တာဖြစ်ပါတယ်။
အဖမ်းမခံရခင် ဧပြီလ ၂၃ရက်ညက ဖေသက်ဟန်ဟာ တာချီလိတ်မြို့၊ ဝိန်းကျောက်ရပ်ကွက်ထဲမှာရှိတဲ့ “ဝ” ပိုင်ဝန်းထဲမှာရှိတဲ့ ဟယ်ရီပေါ်တာ ကေတီဗီမှာ ပစ်ခတ်မှုဖြစ်ပွားခဲ့ပြီး အဲဒီကိစ္စကြောင့် ဆက်စပ်ပြီး လိုက်လံဖမ်းဆီးရာကနေ စိတ်ကြွဆေးပြား ၁၀သန်းအပါအဝင် ဆက်စပ်ပစ္စည်းတွေနဲ့ လက်နက်ခဲယမ်းတွေကို ဖမ်းဆီးရမိတာဖြစ်ပါတယ်။
ဖေသက်ဟန်ဟာ ၂၀၂၀ခုနှစ် ကိုဗစ်ဖြစ်ပွားနေချိန် သင်္ကြန်ကာလအတွင်း သူပိုင်ဆိုင်တဲ့ Crash Bar မှာ ပါတီပွဲကျင်းပပြီး အဲဒီပါတီပွဲကို တိုက်ရိုက်ထုတ်လွှင့်ခဲ့တဲ့ ကိစ္စနဲ့ နိုင်ငံတော်အတိုင်ပင်ခံပုဂ္ဂိုလ် ကိုယ်တိုင် သဘာဝဘေးဥပဒေနဲ့ အရေးယူဖို့ ညွှန်ကြားခြင်း ခံခဲ့ရသူ ဖြစ်ပါတယ်။
ဒါပေမယ့် အဲဒီအချိန်က ထောင်ဒဏ်ချမှတ်ခံရခြင်းမရှိဘဲ ဒဏ်ငွေ ၅၀၀၀ ကျပ်ဖြင့်နဲ့သာ ပြန်လည်လွတ်မြောက်လာပြီး ရဲအဖြစ်ကနေ ထုတ်ပယ်ခံခဲ့ရသူဖြစ်ပါတယ်။
အဲဒီနောက် လုံခြုံရေးကုမ္ပဏီတည်တောင် လုပ်ကိုင်နေပြီး စစ်တပ်အာဏာသိမ်းပြီးနောက်ပြီး တာချီလိတ်ဗျူဟာက ဗျူဟာမှူးနဲ့ ရင်းနှီးသူအဖြစ် နာမည်ကြီးသလို ရဲတပ်သားအဆင့်နဲ့ထွက်ပေမယ့် ဘား၊ လုံခြုံရေးကုမ္ပဏီတွေ တည်ထောင်လုပ်ကိုင်နိုင်သူအဖြစ် လူပြောများသူဖြစ်ပါတယ်။
MK – 004
#MeKongNews