မဲခေါင် ဩဂုတ် ၁၁

ရွှေတြိဂံ ၊ လာအို ကာစီနို အထူးစီးပွားရေးဇုန်အတွင်းက ကျားဖြဲန်ငွေလိမ်ဂိုဏ်းကို တရုတ်ရဲတပ်ဖွဲ့တွေ ဩဂုတ်လ ပထမပါတ်အတွင်း ဝင်ဖမ်းခဲ့တယ်လို့ သိရပါတယ်။

တရုတ်အစိုးရအလိုရှိနေတဲ့ တရားခံပြေး ၉ ယောက်အပါအဝင် လူ ၂၉ ယောက်ကို တရုတ်ရဲတပ်ဖွဲ့နဲ့ လာအိုရဲပူးပေါင်းပြီး ဝင်ဖမ်းခဲ့တာဖြစ်ပါတယ်။

ဖမ်းဆီးထားတဲ့ ကျားဖြဲန်ငွေလိမ်ဂိုဏ်းအဖွဲ့ဝင်တွေကို တရုတ်ရဲတပ်ဖွဲ့က ဩဂုတ် ၃ ရက်နေ့မှာ မဲခေါင်မြစ်ကြောင်းအတိုင်း တရုတ်နိုင်ငံကို ပြန်လည်ခေါ်ဆောင်သွားခဲ့တာဖြစ်ပါတယ်။

လာအိုနိုင်ငံအတွင်း ဖမ်းဆီးခံရတဲ့ ငွေလိမ်ဂိုဏ်းအဖွဲ့ဝင်တွေဟာ တာချီလိတ်မြို့မှာ အဖမ်းခံရပြီး အာဏာပိုင်တွေကို ငွေပေးပြီး ပြန်လည်လွှတ်ပေးလိုက်တဲ့လူတွေပါ။

ထိုင်း-မြန်မာ-လာအို သုံးနိုင်ငံ ရွှေတြိဂံဧရိယာအတွင်းက ကျားဖြဲန်တရုတ်ငွေလိမ်ဂိုဏ်းတွေကို သက်ဆိုင်ရာ နိုင်ငံအာဏာပိုင်တွေနဲ့ တရုတ်အစိုးရပူးပေါင်းပြီး ဖမ်းဆီးနေတာကြောင့် ကမ္ဘောဒီယားနိုင်ငံဘက် အလုံးအရင်းထွက်ပြေးကုန်တယ်လို့ သိရပါတယ်။

MK-002

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)