မဲခေါင် ဇွန် ၁၁
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသက ထွက်ရှိတဲ့ ခရမ်းချဥ်သီးတွေကို မေလနောက်ဆုံးအပတ်ကစပြီး ရှမ်းတောင်ဒေသအတွင်း နီးစပ်ရာမြို့နယ်တွေကိုပဲ ဖြန့်ချိနေရတယ်လို့ စိုက်ပျိုးတောင်သူတွေက ပြောပါတယ်။
၂၀၂၄ ခုနှစ်အတွင်းမှာ သီးနှံစိုက်ပျိုးမှုနည်းပြီး ဈေးကွက်လိုအပ်ချက် မလုံလောက်တာကြောင့် ဒေသတွင်းသာ အများဆုံးဖြန့်ချီရောင်းချနေတာပါ။
ခရမ်းချဉ်သီးစိုက်သူတွေအနေနဲ့ စိုက်ပျိုးစရိတ်နဲ့ တွက်ချေမကိုက်တာကြောင့် အရင်နှစ်တွေထက် ဒေသတွင်းစိုက်ပျိုးသူ နည်းတဲ့အပြင် ဇွန်လအတွင်း ရေကြီးပြီး ကျွန်းမျောစိုက်ခင်း ဧက ၁၀၀ နီးပါး ရေမြုပ်ကုန်တာကြောင့် သီးနှံအထွက် မလုံမလောက် ဖြစ်နေတယ်လို့ ဆိုပါတယ်။
ကေလာရွာ တောင်သူတစ်ဦးက “စိုက်တဲ့သူနည်းလာတာတော့ ၃ နှစ်နီးပါးလောက် ရှိပါပြီ။ ဝယ်သူတွေကတော့ စျေးကြီးပေးပြီး ဝယ်နေရပေမယ့် စိုက်တဲ့သူကတော့ အရင်းနည်းနည်းကျော်ကျော်လောက်ပဲ ရတာပါ။ တော်နေကြာ စိုက်တဲ့သူတွေကို သူဌေးဖြစ်နေတယ် ထင်မှာစိုးလို့။ မြေသြဇာ၊ ပိုးသတ်ဆေးတွေနဲ့ဆို ဘာမှတောင် ပြန်မရပါဘူး” လို့ ပြောပါတယ်။
အရင်က ဒေသထွက် ခရမ်းချဥ်သီးတွေကို မြန်မာနိုင်ငံ အလယ်ပိုင်း၊ အောက်ပိုင်းနဲ့ တရုတ်နိုင်ငံကို တင်ပို့ကြပေမယ့် လက်ရှိမှာတော့ ဒေသတွင်းမှာတောင် မလုံမလောက် ဖြစ်နေပြီး ပွဲစားတွေက အလုအယက် ဝယ်ယူနေရတယ်လို့ သိရပါတယ်။
သလဲဦးရွာ တောင်သူတစ်ဦးက “တရုတ်ဘက်ကတော့ လမ်းပိတ်လို့ ရပ်ထားရတာကြာပြီ။ ပွဲစားတွေတော့ ရွာအထိ လာဆင်းဝယ်တယ်။ စျေးတော့ နှိမ်တာပေါ့။ ပွဲရုံထိ သွားရောင်းရင်တော့ စျေးပိုရတယ်။ ဒါပေမဲ့ ဒီဇယ်ဖိုးကုန်တာနဲ့ အလုပ်သမားခနဲ့ ဘာမှတော့ သိပ်မကွာပါဘူး” လို့ ပြောပါတယ်။
ဒါ့အပြင် ခရမ်းချဥ်သီး မလုံလောက်ရတဲ့ အကြောင်းဟာ စစ်ကောင်စီရဲ့ စစ်မှုထမ်းဥပဒေကြောင့် လူငယ်အများစု တိန်းရှောင်နေရပြီး စိုက်ပျိုးသူနည်းခြင်း၊ ရာသီဥတုဒဏ်ကြောင့် အထွက်နှုန်းလျော့ခြင်း၊ စိုက်ခင်းရေမြုပ်ခြင်း စတာတွေကြောင့်ဖြစ်တယ်လို့ ဆိုပါတယ်။
ဒီနေ့ ဇွန် ၁၀ ရက်နေ့ ပေါက်စျေးအရ ခရမ်းချဥ်သီး တစ်ပိဿာကို ၅ ထောင်ကျပ် ဝန်းကျင်နဲ့ တစ်တင်းအိတ် တစ်အိတ်ကို ၁ သိန်းကျပ် ပေါက်စျေးအထိ ရှိနေတယ်လို့ ပွဲရုံပိုင်ရှင်တွေဆီက သိရပါတယ်။
MK014
