မဲခေါင်၊ နိုဝင်ဘာ ၂၈
ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသ၊ လုံခမ်း တိုက်ပွဲအတွင်း မိတ္ထီလာ အခြေစိုက် တပ်မ (၉၉) လက်အောက်ခံ တပ်ရင်းမှူးကို ရှင်းလင်းနိုင်ခဲ့တယ်လို့ MNDAA က မနေ့က အတည်ပြု ထုတ်ပြန်ပါတယ်။
နိုဝင်ဘာ ၂၆ ရက်က မုံးကိုးခရိုင်၊ မိုင်းပေါ်ဒေသ၊ နန်တောက်အုပ်စု၊ လုံခမ်းတိုက်ပွဲမှာ စစ်ကောင်စီ တပ်မ (၉၉) လက်အောက်ခံ ခမရ (၇၉) တပ်ရင်းမှူး ဒုတိယဗိုလ်မှူးကြီး အောင်ဇေယျဝင်းကို MNDAA တပ်ဖွဲ့က ရှင်းလင်း နိုင်ခဲ့ပြီး စစ်ကောင်စီတပ်သား တစ်ဦး အရှင်ဖမ်းမိခဲ့တယ်လို့ သိရပါတယ်။
သေဆုံးသွားတဲ့ တပ်ရင်းမှူး အလောင်းကို နိုဝင်ဘာ ၂၇ ရက်နေ့၊ မနက်ပိုင်းမှာ မူဆယ်ဆေးရုံသို့ ပို့ဆောင်ခဲ့တယ်လို့ သိရပါတယ်။
နိုဝင်ဘာ ၂၇ ရက်က MNDAA နဲ့ TNLA တို့ပူးပေါင်းပြီး ကျောက်မဲနဲ့ လားရှိုးကြားက ခုတန်စေတီကုန်း High Point မှာ အခြေချနေတဲ့ စစ်ကောင်စီတပ်စခန်းကို မြေပြင်နဲ့ ဒရုန်းတပ် ပူးပေါင်း သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
လက်ရှိအချိန်ထိ ရှမ်းမြောက် “၁၀၂၇ စစ်ဆင်ရေး” အတွင်း စစ်ကောင်စီတပ်စခန်း ၁၈၀ နီးပါး သိမ်းပိုက် ထားတယ်လို့ MNDAA ပြန်ကြားရေးရဲ့ ထုတ်ပြန်ချက်အရ သိရပါတယ်။
MK-007
#MeKongNews
#MNDAA
#တပ်ရင်းမှူး
#လုံခမ်းတိုက်ပွဲ
