မဲခေါင်၊ ဇန်နဝါရီ ၂၉
အခန်းခ မပေးဘဲတည်းခိုမယ်လို့ ပြောတာကိုငြင်းလို့ တည်းခိုခန်းပိုင်ရှင်ကို ဧည့်သည်က သေနတ်နဲ့ပစ်ခတ်မှု မနေ့ ဇန်နဝါရီ ၂၈ ရက် စနေနေ့မနက်ပိုင်းက ထိုင်းနိုင်ငံ၊ ရယောင်းမြို့မှာဖြစ်ပွားခဲ့ပါတယ်။
စနေနေ့မနက် ၃ နာရီလောက်မှာ တိုင်ကြားချက်ကြောင့် ရဲတွေက တည်းခိုခန်းရောက်ချိန်မှာ တည်းခိုခန်းပိုင်ရှင်၊ အသက် ၄၂ နှစ်အရွယ် သာနာပီဆစ် သာနာရက်ပီဝတ်ကို ကြောက်လန့်တကြားဖြစ်နေတာတွေ့ရတယ်လို့ ထိုင်းရဲတွေကပြောပါတယ်။
အမျိုးသားဧည့်သည် တစ်ယောက်က အခန်းငှားဖို့ သူ့ကိုလာပြောပြီး သူက အခန်းခတောင်းချိန်မှာ ပိုက်ဆံမပါလာဘူးလို့ပြောပြီး သေနတ်ဆွဲထုတ်ခြိမ်းခြောက်ကာ သေနတ်နဲ့ပစ်ခတ်ပြီး ဖုံးကွယ်ပေးဖို့ ဖိအားပေးခဲ့တယ်လို့ သာနာပီဆစ်ကပြောပါတယ်။
အခန်းတခန်းထဲမှာပုန်းနေတဲ့ အသက် ၃၁ နှစ်အရွယ် မန်ကောင် ရာနာတာဗီဂျစ်ကို ရဲတွေက လက်နက်ချဖို့ ဖျောင်းဖျခဲ့ပေမဲ့ မောက်မောက်မာမာတုန့်ပြန်ပြီး ပွိုင့်၃၈ ပစ္စတိုနဲ့ပြန်လည်ခြိမ်းခြောက်တဲ့အတွက် ရဲတွေက ရှော့တိုက်ဖမ်းဆီးဖို့ကြိုးစားခဲ့ပါတယ်။
ဒါပေမဲ့ ရှောင်ပြေးနိုင်ခဲ့ပြီး ရဲတွေကို သေနတ်နဲ့ပြန်လည်ပစ်ခတ်ခဲ့လို့ ရဲတပ်ကြပ်ကြီး ဆက်ဆစ်ပွတ်တာ ကျည်ထိမှန်ဒဏ်ရာရခဲ့လို့ ရဲတွေက မန်ကောင်ရဲ့ခြေထောက်ကိုသေနတ်နဲ့ပစ်ခတ်ဖမ်းဆီးခဲ့ပါတယ်။
မန်ကောင့်ကို ရှာဖွေစစ်ဆေးရာမှာ မူးယစ်ဆေးဝါးသုံးစွဲထားကြောင်းသာမက မက်သာဖက်တမင်းမူးယစ်ဆေးဝါး ၂၀၀ ကိုလည်းတွေ့ရှိခဲ့ပြီး သူ့သေနတ်ကိုလည်း သက်သေအနေနဲ့ သိမ်းဆည်းထားပါတယ်။
သူ့ကို ကလာအန်းဆေးရုံမှာကုသမှုပေးထားပြီး ဆေးရုံကဆင်းတာနဲ့ တရားဥပဒေအရ အရေးယူသွားမယ်လို့ ရဲတွေကပြောပါတယ်။
ဒဏ်ရာရတဲ့ရဲတပ်ဖွဲ့ဝင်ဟာလည်း စိုးရိမ်ရတဲ့အခြေအနေမှာမရှိဘူးလို့ ရဲတွေက အသိပေးပါတယ်။
Source – Bangkok Post
#ဥက္ကာ #MeKongNews
Photo – Bangkok Post
