အလုပ်မဖြစ်ခဲ့တဲ့ အာဆီယံဘုံသဘောတူညီချက် ၅ ချက်အစား ထိရောက်မှုရှိတဲ့ဆောင်ရွက်မှုတွေနဲ့ အစားထိုးဖို့ ဗုဒ္ဓဟူးနေ့မှာ အရပ်ဖက်အဖွဲ့အစည်း ၄၅၇ ဖွဲ့က အာဆီယံခေါင်းဆောင်တွေဆီ စုပေါင်းတောင်းဆိုခဲ့ပါတယ်။
အာဆီယံထိပ်သီးညီလာခံတွေနဲ့ အစည်းအဝေးတွေကို အာဏာသိမ်းစစ်တပ်ရဲ့ကိုယ်စားလှယ်တွေနဲ့ နိုင်ငံရေးမနွယ်တဲ့ကိုယ်စားလှယ်တွေကိုပါ တက်ရောက်ခွင့်မပြုသင့်ဘဲ အရပ်ဖက်အဖွဲ့အစည်းတွေ၊ အမျိုးသားညီညွတ်ရေးအစိုးရ(NUG)တို့နဲ့သာ ဆွေးနွေးညှိနှိုင်းဖို့လည်း တိုက်တွန်းကြပါတယ်။
အာဆီယံအထူးကိုယ်စားလှယ်ရဲ့ လုပ်ငန်းဆောင်ရွက်ခွင့်တွေကိုလည်း ပြုပြင်ပေးဖို့၊ ရည်ညွှန်းအသုံးအနှုန်းတွေနဲ့ ၃ နှစ်တကြိမ် အာဆီယံဥက္ကဌကပြောင်းလဲခန့်ထားသင့်ကြောင်းလည်း ပြောပါတယ်။
လာမယ့် အာဆီယံနိုင်ငံခြားရေးဝန်ကြီးများ အစည်းအဝေးနဲ့ နိုဝင်ဘာလမှာပြုလုပ်မယ့် အာဆီယံထိပ်သီးညီလာခံတို့မှာ မြန်မာနိုင်ငံက အခက်အခဲကို ဖော်ထုတ်ပြောဆိုဖို့ ကြိုးစားမှုတွေကို ထုတ်ပြရမယ့်အချိန်လို့လည်း ပြောပါတယ်။
အာဆီယံအထူးကိုယ်စားလှယ်ရဲ့လုပ်ပိုင်ခွင့်ကို ပြန်လည်သုံးသပ်သင့်တယ်လို့ လူ့အခွင့်အရေးဆိုင်ရာ အာဆီယံလွှတ်တော်ကိုယ်စားလှယ်များဘုတ်အဖွဲ့ဝင် ကာဆစ် ပီရိုမျာ ကပြောပါတယ်။
