ဘန်ကောက်တွင် တရုတ်ကျားဖြန့်ဂိုဏ်း တတိယမြောက်ခေါင်းဆောင်ကို ထိုင်းရဲ စီးနင်းဖမ်းဆီး
မဲခေါင်၊ ဖေဖော်ဝါရီ ၂၀
ထိုင်းရဲမှူးချုပ်ဦးဆောင်ကာ ထိုင်းဆိုက်ဘာရဲတပ်ဖွဲ့၊ ဘန်ကောက်မြို့ပြရဲတပ်ဖွဲ့အကြီးအကဲများပါဝင်သည့် လုံခြုံရေးတပ်ဖွဲ့ဝင် ၅၀ ကျော်သည် ဖေဖော်ဝါရီ ၁၈ ရက်က ဘန်ကောက်၊ ဟိုင်ခွမ်းခရိုင်၊ ရတ်ချာဒါဖိဆက်လမ်းပေါ်ရှိ Luckking Co., Ltd.ကို ဝင်ရောက်စီးနင်းခဲ့ရာ တတိယမြောက် ကျားဖြန်ခေါင်းဆောင် တရုတ်နိုင်ငံသားကိုပါ ဖမ်းဆီးရမိခဲ့သည်။
မကြာသေးမီက ကမ္ဘောဒီးယားနိုင်ငံ ပွိုင်ပတ် ဒုစရိုက်ဇုန်ရှိ ၂၅ ထပ်မြင့် ကျားဖြန်အဆောက်အအုံမှ ထွက်ပြေးပြီး ဘန်ကောက်သို့ လာရောက်ပုန်းအောင်းနေသော ကျားဖြန်တရုတ်ဂိုဏ်းခေါင်းဆောင် ၂ ဦးဖြစ်သည့် Mr. Ye Wanyou, (၂၉ နှစ်) နှင့် Mr. Li Weijie, (၃၀ နှစ်) တို့ကို ထိုင်းရဲတပ်ဖွဲ့က ဖမ်းဆီးနိုင်ခဲ့ပြီး ၎င်းတို့နှင့် တစ်လုပ်တည်းလုပ်နေသော Mr. Zhang Hongxiang သည် ဂိမ်းပလက်ဖောင်းတစ်ခုမှ IPhone 16 များ ဆုကံစမ်းမဲ ဖောက်ပေးသည်ဟု လိမ်လည်ကာ TikTok မှ ကြော်ငြာပြီး ပုဂ္ဂိုလ်ရေး သတင်းအချက်အလက်များစွာ ၊ ID ပေါင်းများစွာ (၈၈၀၀၀) ရယူပြီး ငွေကြေးလွှဲအပ်မှုတွင် လိမ်လည်သည့် ကျားဖြန်လုပ်ငန်းများ အဓိက လုပ်ဆောင်ရာ Luckking Co., Ltd.ကို ထူထောင်ထားသူဖြစ်သည်။
ဝင်ရောက်စီးနင်းစဉ် ဂိမ်းကစားသည့် စက်များ၊ ကျားဖြန် ငွေလိမ်မှု မှတ်တမ်းများ၊ ခြအုံကဲ့သို့ ကွန်ရက်ဖွဲ့ထားပြီး နိုင်ငံတကာမှ သွေ့ဆောင်ဖျားယောင်းခြင်းဖြင့် ရောက်ရှိလာသူများကို မဲဆောက်မှ တစ်ဆင့် မြန်မာဘက်ခြမ်း ကျားဖြန်လုပ်ငန်းများသို့ လူမှောင်ခိုကူးပေးသည့် သက်သေခံအချက်အလက်များအပြင် ငွေသား ဘတ် ၁၅ သန်း ဝန်းကျင်၊ ၂၄၇၇၂၉၄ . ၉၁ ဒေါ်လာ (ဘတ် ၈၄ သန်း) သိမ်းဆည်းရမိခဲ့ကြောင်း ထုတ်ပြန်ခဲ့သည်။
စီစီတီဗီမှတ်တမ်းများအရ Mr. Zhang Hongxiang နှင့် အပေါင်းအပါ ခေါင်းဆောင် ၃ ယောက်သည် ထိုင်းဝန်ထမ်းများကို အစည်းအဝေးခေါ်ကာ ကျားဖြန်ဝင်ငွေတိုးတက်စေရေး ကြိုးစားကြရန် တိုက်တွန်းသည့် အစည်းအဝေးမှတ်တမ်းလည်း တွေ့ရှိရသဖြင့် ဝန်ထမ်း ၁၃ ဦးကိုပါ စစ်ဆေးမေးမြန်းသွားရမည်ဖြစ်ကြောင်း၊ နိုင်ငံအတွင်း ၎င်းကွန်ရက်မှာ ပြည်သူ ၈၅ ယောက် လိမ်ခံရပြီး ငွေအားဖြင့် ဘတ် ၅၅ သန်းရှိသဖြင့် လိမ်လည် ခံရသူများထံ ထိုငွေများ ပြန်လည်ပေးအပ်ရေးအတွက်လည်း စီစဉ်ဆောင်ရွက်ရမည်ဟု ရဲမှူးချုပ် သီယာဒက်သမ်မာဆက်တီက ရှင်းလင်းပြောကြားခဲ့သည်။
Ref: khaosodenglish
ကိုကလင်း
#MeKongNews
