မြဝတီမှ နေရာရွေ့မည့် ကျားဖြန့်လုပ်ငန်းသုံး ပစ္စည်းများ ထိုင်းရဲ ဖမ်းဆီး
မဲခေါင်၊ ဖေဖော်ဝါရီ ၂
ထိုင်းစစ်တပ်၊ ရဲတပ်ဖွဲ့နှင့် နယ်စပ်လုံခြုံရေးပူးပေါင်းအဖွဲ့များ မသင်္ကာဖွယ်ရာ ကားတစ်စီးကို ဖေဖော်ဝါရီ ၁ ရက်တွင် ရှာဖွေရာမှာ မြ၀တီဘက်ကနေ ကမ္ဘောဒီးယားနိုင်ငံဘက်ကို လုပ်ငန်းပြောင်းပြေးဖို့ စီစဉ်မှုအနေဖြင့် ကျားဖြန်ပစ္စည်းများ သယ်ဆောင်လာခြင်းကို ဖမ်းဆီးရမိခဲ့သည်။
တာ့ခ်ခရိုင်၊ မယ့်ရမတ်ခရိုင်ခွဲ ဘန်သာလိုနှင့် ဘန်နမ်ဒစ်ဘွန်ဝမ်သွားကားလမ်းပေါ်မှာ ကင်းလှည့်နေစဉ် မသင်္ကာဖွယ်ရာ တာ့ခ်ခရိုင် လိုင်စင်နံပါတ်ပြားတပ် အဖြူရောင်ကားကို တွေ့ရှိရပြီး စစ်ဆေးရာတွင် မိုဘိုင်းဖုန်း ၁၂၅၁ လုံး၊ ဆင်းကဒ်များ၊ ကွန်ပျူတာ ၁၉ လုံးနှင့် ကျားဖြန်လုပ်ဆောင်ရာမှာ အသုံးပြုသည့် circuits ၂၇၄ ခု သိမ်းဆည်းရမိခဲ့သည်။
အသက် ၄၅ နှစ်အရွယ် ကားမောင်းလာသူကို မေးမြန်းရာမှာတော့ မြ၀တီနယ်စပ် သောင်ရင်းမြစ် ကမ်းနဖူးကနေ ဒီပစ္စည်းတွေကို သွားသယ်ဆောင်လာတာဖြစ်ကြောင်း၊ ဝတ်သနာခွန်းခရိုင်က ပုဂ္ဂလိက သယ်ယူပို့ဆောင်ရေး ကုမ္ပဏီတစ်ခုဆီ သွားပို့ပေးလျှင် ဘတ် ၅၀၀၀ ပေး ခိုင်းစေခဲ့ခြင်းဖြစ်ကြောင်း ဖြေကြားသွားခဲ့သည်။
တာဝန်ရှိသူများ၏ ကနဦးစုံစမ်းစစ်ဆေးမှုအရ ထိုသိမ်းဆည်းရမိသော ပစ္စည်များကို မြ၀တီကျားဖြန်ဂိုဏ်း တစ်ခုမှ ကမ္ဘောဒီးယား- ထိုင်းနယ်စပ်ဘက် ပြောင်းရွှေ့အခြေချနိုင်ရေး ဖြစ်နိုင်သည်ဟု ဆိုသည်။
Ref: Addy Chaiyadech
ကိုကလင်း
#MeKongNews
