ပတ္တရားမှာ ရွှေအတုတွေ လိုက်ပေါင်တဲ့ တရုတ်နိုင်ငံသားကို ထိုင်းရဲဖမ်းဆီး
မဲခေါင်၊ ဒီဇင်ဘာ ၂၇
ထိုင်း ပြည်ပခရီးသွားစောင့်ကြည့်ရေးရဲတပ်ဖွဲ့ဟာ ဒီဇင်ဘာ ၂၅ ရက်နေ့မှာပဲ ပတ္တရားမြို့အတွင်း အပေါင်ဆိုင် ပေါင်းများစွာမှာ ရွှေအတုနဲ့လုပ်ထားတဲ့ လက်ဝတ်ရတနာတွေ လိုက်ပေါင်နှံနေတဲ့ တရုတ်နိုင်ငံသား သံသယ တရားခံကို ဖမ်းဆီးနိုင်ခဲ့ပါတယ်။
ရွှေစျေးကွက် ဂယက်ထနေချိန် အသက် ၂၉ နှစ်အရွယ် မစ္စတာ ဟွမ်းယုဆိုတဲ့ တရုတ်နိုင်ငံသားဟာ ပတ္တရားက ရွှေအပေါင်ဆိုင်တွေမှာ ရွှေအတုတွေကို လိုက်ပေါင်နှံလိမ်လည်နေခဲ့ပြီး အပေါင်ဆိုင်များစွာ က တိုင်ကြားမှုရှိလာတဲ့အတွက် ထိုင်း ပြည်ပခရီးသွားစောင့်ကြည့်ရေးရဲတပ်ဖွဲ့က ချွန်ဘူရီခရိုင်၊ နောင်ပရူခရိုင်ခွဲ က အမှတ် ၃ လမ်းပေါ်မှာ ဖမ်းဆီးနိုင်ခဲ့တာဖြစ်ပါတယ်။
လက်ပူးလက်ကြပ်သက်သေအဖြစ် ၅၂ . ၈ ဂရမ်အလေးချိန်ရှိ ရွှေလက်ကောက်အတုတစ်ကွင်းနဲ့ အပေါင် ဘောက်ချာတစ်ခု၊ ငွေသား ဘတ် ၈၀၀၀၀ ပါ သိမ်းဆည်းရမိခဲ့တယ်လို့ ရဲတပ်ဖွဲ့က ထုတ်ပြန်ပါတယ်။
ရဲတပ်ဖွဲ့ဟာ လက်ရှိမှာ မစ္စတာ ဟွမ်းယုကို စုံစမ်းစစ်ဆေးနေပြီး အပေါင်ဆိုင် ဘယ်နှဆိုင်မှာ ဘယ်လောက် ပေါင်နှံခဲ့ကြောင်း အသေးစိတ်သိရှိရဖို့ မေးမြန်းနေပါတယ်။ ပြစ်မှုထင်ရှားခဲ့ရင် မစ္စတာ ဟွမ်းယုဟာ အမြင့်ဆုံး ထောင်ဒဏ် ၃ နှစ်နဲ့ ဒဏ်ငွေ ဘတ် ၆၀၀၀၀ ချမှတ်ခံရနိုင်တယ်လို့လည်း သိရပါတယ်။
Ref: khaosodenglish
MKF-001
#MeKongNews
