မဲခေါင်၊ စက်တင်ဘာ ၁၃
ဖွေထိုင်းပါတီ ၂၀၂၃ ရွေးကောက်ပွဲကာလက မဲဆွယ်စည်းရုံးရာမှာ ကတိပေးခဲ့တဲ့အတိုင်း ဒီလထဲမှာ ၁၆ နှစ်နဲ့ အထက် ထိုင်းနိုင်ငံသားအားလုံးကို တစ်ယောက် ဘတ် ၁၀၀၀၀ (၂၉၅ ဒေါ်လာ) ပေးသွားဖို့ရှိနေကြောင်း သိရပါတယ်။
စက်တင်ဘာ ၉ ရက်နေ့က အထက်လွှတ်တော် ဘတ်ဂျက်ဆွေးနွေးပွဲမှာ ဘဏ္ဍာရေးဝန်ကြီးဌာန ဒုဝန်ကြီး ဂျူလာပန်အမွန်ဗီဗတ်က တိုင်းပြည် စီးပွားရေးပြန်လည်မြင့်တက်လာဖို့ ဖွေထိုင်းပါတီရဲ့ အဓိကကျတဲ့ ဆုံးဖြတ်ချက်နဲ့ ကတိဖြစ်တဲ့ ပြည်သူအားလုံးအတွက် ဘတ် ၁၀၀၀၀ ထုတ်ပေးသွားရေး စီမံကိန်းဟာ စက်တင်ဘာ လကုန်ပိုင်းမှာ လက်တွေ့အကောင်အထည်ဖော်ဆောင်နိုင်မယ်လို့ ပြောဆိုသွားတာဖြစ်ပါတယ်။
ဒီ အစီအစဉ်ဟာ ငွေသားပေးချေခြင်းမဟုတ်ဘဲ Digital Wallet ငွေကြေးအဖြစ် Thang Rat အပလီကေးရှင်းမှာ မှတ်ပုံတင်ပြီး ဒစ်ဂျစ်တယ်ငွေကြေး ပေးသွားမှာဖြစ်ကာ လက်ရှိ ၁၆ နှစ်နဲ့အထက် ထိုင်းပြည်သူ ၃၂ သန်း မှတ်ပုံ တင်ထားပြီးဖြစ်ပါတယ်။
ဒေါ်လာ ၄ . ၂၈ ဘီလီယံဖိုးအထိ ပြည်သူကို ဒစ်ဂျစ်တယ်ငွေကြေး အလကားပေးသွားရခြင်းဟာ ကာလတို စီးပွား ရေးပြန်လည်ဖွံ့ဖြိုးစေဖို့နဲ့ မရှိဆင်းရဲသားတွေအတွက် ထွက်ပေါက်အဖြစ် ပေးတာဖြစ်သလို ၂၀၂၄ ခုနှစ် ဒုတိယ ၃ လပတ် စီးပွားရေးတိုးတက်မှုနှုန်းဟာ ၂ . ၃ ရာခိုင်နှုန်းသာ ရှိတာကြောင့် ပြည်သူတွေ ငွေသုံးများလာပြီး စီးပွားရေးလည်ပတ်မှု ပြန်မြင့်တက်လာစေဖို့ ရည်ရွယ်တာဖြစ်ပါတယ်။
ပြီးခဲ့တဲ့လအတွင်း ဝန်ကြီးချုပ်သစ်ဖြစ် လာတဲ့ သက်ဆင်ရဲ့ သမီး ပေထောင်တန်နဲ့ အစိုးရအဖွဲ့သစ်ထပ်မံရွေးချယ်ပေမယ့် မူလ စီမံကိန်းကို အရ အကောင်အထည်ဖော်ပြီး စီးပွားရေး အရှိန်အဟုတ်ပြန်လည်မြင့်တက်လာစေဖို့ ရည်ရွယ်ကြောင်း ဂျူလာပန် က ရှင်းလင်းပြောကြားသွားပါတယ်။
ထိုင်းအစိုးရသစ်ဟာ အောက်တိုဘာ ၁ ရက်နေ့က စပြီး ဝန်ထမ်း ၂၀၀ နဲ့အထက်ရှိတဲ့ စီးပွားရေးလုပ်ငန်းတွေနဲ့ ကုမ္ပဏီတွေက ဝန်ထမ်းတွေကို တစ်ရက်အနည်းဆုံး လုပ်ခ ဘတ် ၄၀၀ ပေးသွားဖို့လည်း ရက်ပိုင်းအတွင်းကမှ အတည်ပြုခဲ့ပါတယ်။
Ref: vnexpress
MKF-001
