မဲခေါင်၊ စက်တင်ဘာ ၁၂
ထိုင်းအလုပ်သမားဝန်ကြီး ဖိဖတ်က အောက်တိုဘာ ၁ ရက်နေ့ကစလို့ ထိုင်းနိုင်ငံ တစ်နိုင်ငံလုံးအတိုင်းအတာနဲ့ တစ်ရက်အနည်းဆုံးလုပ်ခ ဘတ် ၄၀၀ (၁၁ . ၇ ဒေါ်လာ) ပေးဖို့ အတည်ပြုကြောင်း စက်တင်ဘာ ၁၁ ရက်နေ့မှာ ပဲ အတည်ပြုထုတ်ပြန်သွားခဲ့ပါတယ်။
စီးပွားရေးကျပ်တည်းကျဆင်းနေချိန် ဒီလို လစာတိုးမြှင့်ပေးဖို့ ဆုံးဖြတ်ရင် ဆိုးရွားတဲ့ သက်ရောက်မှုတွေရှိနိုင်ကြောင်း ပူပန်မှုတွေရှိနေခဲ့ပေမယ့် အလုပ်သမားဝန်ကြီးဌာနက ဖွဲ့စည်းပေးတဲ့ ဆပ်ကော်မတီရဲ့ လူမှုလုံခြုံရေး ရုံး (SSO) တာဝန်ရှိသူတွေဟာ လုပ်ငန်းရှင်အမျိုးမျိုးဆီ စနစ်တကျ စစ်တမ်းကောက်ခံ တိုင်ပင်အပြီး တစ်နိုင်ငံလုံး အတိုင်းအတာနဲ့ လစာတိုးပေးလို့ ရကြောင်း အဖြေထွက်ပေါ်လို့ ဒီလို ဆုံးဖြတ်ရခြင်းဖြစ်ကြောင်း ဖိဖတ်က ရှင်း လင်းပြောကြားပါတယ်။
ဒါပေမဲ့ အလုပ်သမား ၂၀၀ နဲ့အထက် ရှိတဲ့ စီးပွားရေးလုပ်ငန်းတွေ၊ ကုမ္ပဏီတွေအတွက်သာ စတင်အကျိုးသက် ရောက်မှာဖြစ်ပြီး ဒီလိုလစာတိုးမြှင့်ပေးခြင်းနောက်မှာ လူမှုဖူလုံရေးရန်ပုံငွေကောက်ခံမှုကိုလည်း အလုပ်သမား တွေထံက အောက်တိုဘာလကစပြီး နောက်နှစ် စက်တင်ဘာလအထိ ၁ ရာခိုင်နှုန်း လျှော့ချကောက်ခံသွားမယ်လို့ ဆိုပါတယ်။
အလုပ်သမား ၂၀၀ အောက် လုပ်ငန်းတွေမှာတော့ မဖြစ်မနေ အနိမ့်ဆုံးတစ်နေ့လုပ်ခ ဘတ် ၄၀၀ ပေးဖို့မလိုသေးပေမယ့် အစိုးရအနေနဲ့ နိုင်ငံရဲ့ ၉၀ ရာခိုင်နှုန်းသော လုပ်သားတွေဟာ အသေးစားနဲ့အလတ်စား လုပ်ငန်းတွေက လုပ်သားတွေဖြစ်လို့ ဒီလူတွေအတွက်လည်း လစာတိုးနိုင်ဖို့ အထူး အားစိုက် လုပ်ဆောင်သွား ပေးမယ်လို့ ဖိဖတ်က အာမခံစကားပြောကြားခဲ့ပါတယ်။
လုပ်ငန်းရှင်တွေဘက်က ဝင်ငွေထိခိုက်သက်ရောက်နိုင်မှုတွေ ရှိလာနိုင်တဲ့ စီမံကိန်းဖြစ်လို့ ဘဏ္ဍာရေးဆိုင်ရာ အဖွဲ့အစည်းတွေအနေနဲ့လည်း စီးပွားရေးလုပ်ငန်းတွေမှာ ငွေဖြစ်လွယ်စေမယ့် လုပ်ငန်းရှင်းအကျိုးအမြတ် အတွက် ဘဏ်ချေးငွေတွေကို အတိုးနှုန်းသက်သာစွာ ချေးပေးသွားဖို့လည်း ဖြစ်နိုင်လိမ့်မယ်လို့ ဖိဖတ်ကဆိုပြီး ကုမ္ပဏီနဲ့ လုပ်ငန်းရှင်တွေအပေါ် အခွန်ကောက်ခံမှုလည်း လျှော့ချပေးသွားမယ့် အစီအစဉ်တွေပါ ဆက်ရှိလာမှာ ဖြစ်တယ်လို့ ရှင်းလင်းပြောကြားသွားခဲ့ပါတယ်။
Ref: vnexpress
MKF-001
