မဲခေါင်၊ သြဂုတ် ၂၉
ထိုင်းနိုင်ငံ ဘေးအန္တရာယ်ကာကွယ်ရေးနှင့် လျော့ပါးရေးဦးစီးဌာနက ပြီးခဲ့တဲ့ ၁၀ ရက်အတွင်း နိုင်ငံတဝန်း ခရိုင် ၁၃ ခုမှာ မုတ်သုံရာသီ သည်းထန်သော မိုးကြီးရေလျှံခြင်းတွေကြောင့် သေဆုံးသူပေါင်း ၂၂ ယောက်ရှိခဲ့ကြောင်းနဲ့ ၁၉ ယောက်ဒဏ်ရာရပြီး မိသားစုပေါင်း ၃သောင်းကိုထိခိုက်စေခဲ့တယ်လို့ ထုတ်ပြန်ကြေညာသွားခဲ့ပါတယ်။
ပြီးခဲ့တဲ့ တပတ်က ထင်ရှားကျော်ကြားတဲ့ ဖူးခက်ကျွန်းမှာ ရေကြီးမြေပြိုမှုကြောင့် သေဆုံးသူ ၁၀ ဦးရှိခဲ့ရာမှာ ရုရှားစုံတွဲနဲ့ မြန်မာနိုင်ငံသား တစ်ယောက်လည်း ပါဝင်ခဲ့ပြီး နိုင်ငံမြောက်ပိုင်းနဲ့ အရှေ့မြောက်ပိုင်းဒေသတွေမှာ မိုးကြီးရေလျှံမှုတွေဟာ ဩဂုတ် ၂၉ ရက်အထိ ဆက်ရှိနိုင်တယ်လို့ ဆိုပါတယ်။
ဒါကြောင့် ဒေသခံတွေအနေနဲ့ မိုးလေဝသ အခြေအနေကို အထူးဂရုစိုက်စောင့်ကြည့်ကာ ဒေသခံကယ်ဆယ်ရေးအဖွဲ့တွေနဲ့ ချိတ်ဆက်ဆောင်ရွက်ကြဖို့ သတိပေးတိုက်တွန်းမှုတွေ ထုတ်ပြန်ခဲ့ပါတယ်။
မြို့တော်ဘန်ကောက် အစွန်ပိုင်းက မြစ်ကမ်းပါးတလျှောက် နေထိုင်သူတွေဟာလည်း ကုန်းမြင့်ရာအရပ်ကို ခေတ္တ ရွှေ့ပြောင်းနေထိုင်သင့်ကြောင်းနဲ့ လူလုပ်တဲ့ သဘာ၀ပတ်ဝန်းကျင်ဖောက်ပြန်မှုကြောင့် ရေလျံမှုတွေ ဆက်လက် ဖြစ်ပွားနိုင်တယ်လို့ ထိုင်းအာဏာပိုင်တွေက သတိပေးကြေညာခဲ့ပါတယ်။
ဩဂုတ် ၂၆ ရက်နေ့က နာခွန်းရတ်ချာဆီးမာခရိုင် ပက်ချောင်မှာ အမြန်မီးရထားလမ်းလှိုဏ်ခေါင်း တည်ဆောက်နေဆဲ အခြေအနေကနေ မိုးသည်လှိုက်စားပြီး မြေပြိုမှုဖြစ်ပွားရာမှာလည်း တရုတ်နိုင်ငံသား အလုပ်သမား ၂ ယောက်နဲ့ မြန်မာ အလုပ်သမားတစ်ယောက် ပျောက်ဆုံးခဲ့ရပါသေးတယ်။
Ref: ucanews
MKF-001
#MeKongNews
