မဲခေါင်၊ ဇွန် ၁၀
မြန်မာစစ်ကောင်စီက ထိုင်းမှာ ကွန်ဒိုတိုက်ခန်းဝယ်သူတွေကို ပိတ်ပင်ပြီးခြေမှုန်းအရေးယူမှုတွေ လုပ်ခဲ့လို့ ဘတ်ငွေဘီလီယံချီထိခိုက်ခဲ့ရကြောင်း ထိုင်းကွန်ဒိုမီနီယံအစည်းအရုံး က အတည်ပြုထုတ်ပြန်သွားပါတယ်။
မြန်မာနိုင်ငံဟာ အာဏာသိမ်းပြီးနောက် ထိုင်းမှာကွန်ဒိုဝယ်ယူမှုအများဆုံး မြင့်တက်လာတဲ့နိုင်ငံဖြစ်ပေမယ့် စစ်ကောင်စီဟာ ၂၀၂၄ ဧပြီနဲ့ မေလတွေအတွင်း ကွန်ဒိုဝယ်ယူတွေကို ခြေမှုန်းအရေးယူမှုတွေလုပ်ခဲ့လို့ ဘတ် ၁ ဘီလီယံကျော်အထိ ဆုံးရှုံးနစ်နာခဲ့ရကြောင်း ကွန်ဒိုမီနီယံအစည်းအရုံးဥက္ကဌ ပရာဆတ် တီဒူလာယာဆာတစ်က ဘန်ကောက်ပို့စ်မှာ ရှင်းလင်းပြောကြားသွားပါတယ်။
ထိုင်းကွန်ဒိုတိုက်ခန်းစျေးကွက်မှာ နိုင်ငံခြားသားတွေဆီ လွှဲပြောင်းရောင်းချမှုတွေထဲ ပုံမှန်အတိုင်း တရုတ်က ဝယ်ယူမှုအများဆုံးဖြစ်ပေမယ့် ၂၀၂၂ ခုနှစ်ကစလို့ တရုတ်ဝယ်လက်ဟာ အနည်းငယ်လျော့ကျသွားပြီး မြန်မာနိုင်ငံက ကွန်ဒိုဝယ်ယူမှုရာခိုင်နှုန်းဟာ အမြင့်မားဆုံးဖြစ်လာခဲ့ပါတယ်။
မြန်မာနိုင်ငံသားတွေ ကွန်ဒိုဝယ်ယူမှု ဟာ ၂၀၂၂ မတိုင်ခင်က ဝယ်ယူမှုအများဆုံး ၁၀ နိုင်ငံ အပြင်ဘက်မှာပဲရှိခဲ့ပေမယ့် ၂၀၂၂ ခုနှစ်မှာ ကွန်ဒိုခန်းပေါင်း ၃၄၉ ခန်းကို ငွေကြေးပမာဏ ဘတ် ၂ . ၅၅ ဘီလီယံသုံးပြီး ဝယ်ယူခဲ့လို့ အဆင့် (၅) အတွင်းဝင်လာခဲ့ပါတယ်။
၂၀၂၃ ခုနှစ်မှာ ကွန်ဒိုခန်းပေါင်း ၅၆၄ ခန်းကို ဘတ် ၃ . ၇ ဘီလီယံ နဲ့ ဝယ်ခဲ့လို့ အဆင့် (၄) နေရာရောက်လာပြီး ၂၀၂၄ ပထမ ၃ လပတ်စာရင်းအရ ကွန်ဒိုခန်းပေါင်း ၃၉၂ ခန်းကို ဘတ် ၂ . ၂ ဘီလီယံဖိုးအထိ ဝယ်ခဲ့လို့ အခန်းအရေ အတွက်ရော၊ ဝယ်ယူမှုတန်ကြေးမှာပါ တစ်နှစ်အတွင်း ရာနှုန်းအမြင့်တက်ဆုံးဖြစ်လာလို့ တရုတ်ပြီးရင် ရုရှားကိုကျော်ပြီး ဒုတိယ ကွန်ဒိုခန်းအများဆုံးဝယ်တဲ့ နိုင်ငံဖြစ်လာပါတယ်။
ဒါကြောင့် တရုတ်ဝယ်ယူနှုန်းဟာ အရင်က ၅၀ ရာခိုင်နှုန်းအောက်မကျခဲ့ဖူးပေမယ့် ၂၀၂၄ ခုနှစ်အတွင်း ၄၂ ရာခိုင်နှုန်းအထိ ကျဆင်းသွားတယ်လို့ ပရာဆတ်က အတိအလင်း ထုတ်ပြန်ကြေညာသွားပါတယ်။
မြန်မာအများစုနေထိုင်ရာ ဂရိတ်တားဘန်ကောက်မှာ မြန်မာတွေ ကွန်ဒိုဝယ်ယူမှုအများဆုံးဖြစ်လာပြီး မနှစ်က ထက် ၁၀ ရာခိုင်နှုန်းမြင့်တက်လာသလို တန်ကြေးအားဖြင့် ဘတ် ၁၁. ၃ သန်းဖို့ ဝယ်ယူခဲ့ကြတာဖြစ်ပါတယ်။
ဒါပေမဲ့ စရန်ချခြင်းနဲ့ ငွေပေးချေမှုမပြတ်ခင် မြန်မာစစ်ကောင်စီရဲ့ ကွန်ဒိုဝယ်ယူသူနိုင်ငံသားတွေကို ဖမ်းဆီး အရေးယူနေမှုကြောင့် ၂၀၂၄ ခုနှစ် ပထမ ၃ လပတ်အရောင်းစာရင်းမှာတင် ဘတ် ၁ ဘီလီယံကျော် ထိခိုက်နစ် နာရပြီး အရောင်းအဝယ်မပြတ်ခြင်း၊ ငွေပေးချေမှု တစ်ဝက်တစ်ပျက်ဖြစ်ခြင်းတွေမှာ ပြန်လည်ဖြေရှင်းဖို့ ပြဿနာတွေလည်း ရှိနေကြောင်း အိမ်ခြံမြေကုမ္ပဏီ DNA Co, ညွှန်ကြားရေးမှူးချုပ် ဆူရာချက်ကောင်းချိ ကလည်း ရှင်းလင်းပြောကြားသွားပါတယ်။
Ref:Bangkokpost
MKF-001
