မဲခေါင်၊ ဇန်နဝါရီ ၂၂
ရှမ်းပြည်နယ် တောင်ကြီးမြို့၊ ကန်ကြီးရပ်ကွက်မှာ ဖွင့်လှစ်ထားတဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ပြည်သူ့ ဆက်ဆံရေးရုံးက ဗိုလ်မှူး ခွန်မင်းသိမ်း အပါအဝင် ၃ ဦးကို စစ်ကောင်စီက ဒီနေ့ (ဇန်နဝါရီ ၂၂) မနက်ပိုင်းမှာ ပြန်လွှတ်ပေးလိုက်ပြီလို့ နီးစပ်သူတွေက ပြောပါတယ်။
သူတို့ ၃ ဦးကို မနေ့ (ဇန်နဝါရီ ၂၁) နေ့လည်ပိုင်းမှာ ဖမ်းဆီးခဲ့တာ ဖြစ်ပြီး နှစ်ဖက် ခေါင်းဆောင်ပိုင်းတွေ တွေ့ဆုံဆွေးနွေးပြီးတဲ့နောက်မှာ အဆင်ပြေသွားတာကြောင့် ပြန်လွှတ်ပေးခဲ့တာလို့ ဆိုပါတယ်။
PNLO ပြည်သူ့ ဆက်ဆံရေးရုံးရဲ့ တာဝန်ရှိသူ တစ်ဦးက “ဘယ်လိုပဲ တိုက်ပွဲဖြစ်ဖြစ် ငြိမ်းချမ်းရေး သံတမန်တွေကို ဖမ်းဆီးခွင့် မရှိဘူး။ အသေးစိတ်ကိုတော့ ကျနော်တို့ဘက်က ထုတ်ပြန်ချက် ထုတ်ပါမယ်” လို့ ပြောပါတယ်။
ပြန်လွတ်လာသူ ၃ ဦးဟာ ပြည်သူ့ ဆက်ဆံရေးရုံးရဲ့ တာဝန်ခံ ဗိုလ်မှူး ခွန်မင်းသိမ်း၊ ဗိုလ်ကြီးခွန်သိဒ္ဓိ၊ ဗိုလ်ကြီး ခွန်လှဝင်းတို့ ဖြစ်ပြီး ထိခိုက်မှု တစ်စုံတစ်ရာ မရှိဘူးလို့ သိရပါတယ်။
ဇန်နဝါရီ ၂၀ ရက်နေ့ကနေ ၂၁ ရက်နေ့ နေ့လည်ပိုင်းအထိ စစ်ကောင်စီ ပအိုဝ်းပြည်သူ့စစ်ပူးပေါင်းတပ်တွေ (PNA)နဲ့ PNLO တပ်တို့အကြား ပြင်းထန် တိုက်ပွဲ ဖြစ်ပွားခဲ့ပြီး စစ်ကောင်စီဘက်က ၃ ဦးထိခိုက် သေဆုံးခဲ့ပါတယ်။
လတ်တလော တိုက်ပွဲ ပြီးဆုံးသွားပေမယ့် စစ်ကောင်စီဘက်က လူနေအိမ် မီးရှို့တာတွေကို ကျူးလွန်နေဆဲ ဖြစ်ပြီး ၂ ဖက်တပ်တွေအကြား တင်းမာမှုကတော့ မကြာခင် ပြီးဆုံးသွားမယ်လို့ နိုင်ငံရးလေ့လာသူတွေက သုံးသပ်ထားပါတယ်။
CJ-007
#MeKongNews
#ပြည်သူ့စစ်
#PNLO
#စစ်ကောင်စီ
#ဖမ်းဆီး
#ပြန်လွှတ်
