မဲခေါင်၊ ဇန်နဝါရီ ၂၀
ပအိုဝ်းအမျိုးသားလွတ်မြောက်ရေးအဖွဲ့ချုပ်-PNLO နဲ့ အလှူရှင်တွေပူးပေါင်းပြီး ဆီဆိုင်မြို့နယ်နဲ့ မောက်မယ်မြို့နယ်ရှိ စစ်ဘေးရှောင်စခန်းတွေ စားနပ်ရိက္ခာအကူအညီများ ဇန်နဝါရီ ၁၉ ရက်နေ့မှာ ထောက်ပံ့ခဲ့တယ်လို့ သိရပါတယ်။
PNLO အုပ်ချုပ်ရေးဌာနနဲ့ ပြည်တွင်းပြည်ပအလှူရှင်များ စုပေါင်းပြီး ဆီဆိုင်မြို့နယ် ဆိုက်ခေါင်ကျေးရွာ မိုးကုတ်ပိပဿနာရိပ်သာမှာရှိတဲ့ စစ်ဘေးရှောင်ပြည်သူ ၆၀ ဦးနဲ့ မောက်မယ်မြို့နယ် ဒေါတခြောကျေးရွာမှာရှိတဲ့ စစ်ဘေးရှောင် ၁၀၀ ကျော်ကို ဆန်နဲ့တစ်ကိုယ်ရည်သုံးပစ္စည်းတွေ ကူညီခဲ့တာဖြစ်တယ်လို့ PNLO အရာရှိတစ်ဦးကပြောပါတယ်။
“အဓိကကတော့ ဆန်နဲ့ တစ်ကိုယ်ရည်သုံးပစ္စည်းတွေကို ကူညီတာပါ။ ပြည်တွင်းပြည်ပအလှူရှင်တွေနဲ့ ပူးပေါင်းပြီးတော့ ကူညီတာပေါ့။ အကူအညီတွေ အများကြီး လိုအပ်ပါသေးတယ်။ စစ်ဘေးရှောင်ပြည်သူတွေက သောင်းချီပြီးရှိတယ်” လို့ သူကပြောပါတယ်။
အလှူရှင် ရှားပါးလာတဲ့ အခုလိုအချိန်မှာ စားနပ်ရိက္ခာတွေ အသုံးအဆောင်ပစ္စည်းတွေကို လာရောက်ကူညီပေးတာ ဘယ်အဖွဲ့ကလာကူတာဖြစ်ဖြစ် ကျေးဇူးတင်တယ်လို့ စစ်ဘေးရှောင်အမျိုးသမီးတစ်ဦးကပြောပါတယ်။
“ဘယ်အဖွဲ့ကပဲ လာကူလာကူပေါ့နော်။ အလှူရှင်ရှားပါးတဲ့အချိန် အခုလို ကူညီတာကျေးဇူးတင်ပါတယ်။” လို့ သူကပြောပါတယ်။
အခုဇန်နဝါရီလအတွင်း PNLO နဲ့ အလှူရှင်တွေပူးပေါင်းပြီး ဆီဆိုင် ၊ ဆိုက်ခေါင် ၊ နောင်ထောဝ်၊ ဘန်းယဉ်၊ နောင်မွန်၊ ဗန်းမက်၊ ဒေါတခြော၊ စလောင်းထောင် စတဲ့ စစ်ဘေးရှောင်စခန်း ၁၀ ခုကျော်ကို သွားရောက်ကူညီပေးခဲ့တယ်လို့ PNLO အရာရှိကပြောပါတယ်။
ကရင်နီပြည်နယ်မှာ ၁၁၁၁ စစ်ဆင်ရေး စတင်ပြီးနောက်ပိုင်း ကရင်နီပြည်သူတွေဟာ နယ်မြေထိစပ်နေတဲ့ ရှမ်းပြည်နယ်တောင်ပိုင်းကို အများအပြား စစ်ဘေးရှောင်ကြရတာဖြစ်ပြီး အကူအညီလည်း လိုအပ်နေလျက်ရှိပါတယ်။
လက်ရှိအချိန်မှာ ဆောင်းတွင်းကာလည်းရောက်လာပြီဖြစ်တဲ့အတွက် စစ်ဘေးရှောင်ပြည်သူများကို စောင်တွေ အနွေးထည်တွေ အမိုးအကာတွေကိုလည်း ကူညီပေးဖို့ လိုအပ်ပါတယ်။
စစ်ဘေးရှောင်ပြည်သူတွေအနေနဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ်- PNLO အခြေပြု ဒေသအတွင်း လာရောက်ခိုလှုံနိုင်တယ်လို့လည်း အဲ့ဒီအဖွဲ့က ထုတ်ပြန်ထားတာရှိပါတယ်။
CJ-002
#MeKongNews
#PNLO
#စားနပ်ရိက္ခာ
#ကူညီ
#ပအိုဝ်း