မဲခေါင်၊ မတ် ၉
ရှမ်းပြည်မြောက်ပိုင်း၊ လောက်ကိုင်မြို့က ဗမာတန်းကို MNDAA က ၃ ရက်အတွင်း ဖျက်ပစ်မယ်ဆိုတဲ့အတွက် အိမ်ရှင်တွေ ဒုက္ခရောက်နေတယ်လို့ ဒေသသတင်းအရင်းအမြစ်ထံက သိရပါတယ်။
MNDAA က အကြောင်းလာတာကို ယနေ့မနက် MNDAA အုပ်ချုပ်ရေးရုံးမှာ အိမ်ရှင်တွေ စကားသွားပြောကြပေမယ့် ညှိနှိုင်းဆွေးနွေးစရာမရှိဘူး ပြောလွှတ်တယ်လို့သိရပါတယ်။
ဖျက်ပစ်မယ်ဆိုတဲ့ ဗမာတန်းအလယ်ပိုင်းဟာ အိမ်ခြေ ၆၀ ကျော်ရှိကာ အင်ကြင်းပွင့်နေရာ အထိပါဝင်ပြီး အထပ်မြင့်တိုက်ကြီးတွေ အများကြီးရှိနေကာ ယင်းနေရာကို ဗမာအချင်းချင်း ဗမာတန်းလို့ခေါ်ပေမယ့် စကားရပ်အမှန်မှာ အထိမ်းအမှတ်နေရာဟု ခေါ်တွင်တယ်လို့သိရပါတယ်။
တိုင်းရင်းသားအများစု စီးပွားရေးအဓိကအချက်ခြာကျ လုပ်ကိုင်နေတဲ့နေရာဖြစ်ပြီး ဗမာ ၄ ဦးခန့်သာ နေထိုင်ပြီး အများစုက ကိုးကန့်လူမျိုးအများစု ပိုင်ဆိုင်နေထိုင်နေတာလို့ သိရပါတယ်။
“ ပြည်သူတွေကတော့ မြေကြီးပဲပြန်ရရင်တော်ပြီတဲ့၊ မြေကြီးပဲပြန်ရအောင်ယူမယ်ကွာ၊ နောက်မှ ပြန်ဆောက်မယ်” လို့ ဆိုသလို “ လိုအပ်လို့ မဖြစ်မနေဖျက်ရမယ်ဆိုလည်း မြေယာလျော်ကြေး နေရာအစားထိုးပေးပြီး ပြောင်းရွှေ့အခြေချဖို့ပါ အာဏာပိုင်တွေက လုပ်ဆောင်ပေးသင့်တယ်” လို့ ပြည်သူအချို့ကပြောတယ်လို့ သိရပါတယ်။
အိမ်ဖျက်ခံရမယ့် လူထုကတော့ ၃ ရက်အတွင်း ဖယ်ပေးရပြီး ပစ္စည်းတွေရွှေ့ရမယ့်ကိစ္စဟာ ၃ ရက်အတွင်း မဖြစ်နိုင်ဘူးလို့ပြောနေကြသလို တစ်သက်လုံးရှာတွေစုဆောင်းလာတဲ့ ချွေးနဲစာတွေ သဲထဲရေသွန်ဖြစ်ရတယ်ဆိုပြီး အပူမျိုးစုံခံစားနေကြရတယ်လို့ သိရပါတယ်။
MNDAA က ဗမာတန်းကို စည်ပင်သာယာရေးအတွက် ဖျက်မယ်ဆိုတာ ပြီးခဲ့တဲ့ ဖေဖော်ဝါရီ ၂၉ ရက်ကတဲက ပြောကြားထားတာဖြစ်ပြီး လျော်ကြေးအတွက် မြေပိုင်ဆိုင်မှုဂရမ်တွေ ပြနိုင်ရမယ်လို့ဆိုထားတယ်လို့သိရပါတယ်။
မတ်လ ၇ ရက် ကလည်း လောက်ကိုင် လဝက ရုံးကို ဖြိုချဖျက်ဆီးခဲ့တယ်လို့ သိရပါတယ်။
MK-012
