မဲခေါင်၊ ဖေဖော်ဝါရီ ၉
၁၀ရက်အတွင်း KNU တပ်မဟာ – ၆ နယ်မြေထဲမှာ စစ်ကောင်စီတပ်တွေနဲ့ ထိတွေ့တိုက်ပွဲ ၃ကြိမ်ဖြစ်ပွားခဲ့ပြီး စစ်ကောင်စီဘက်က ၁၆ဦးသေဆုံးကာ ၁၀ဦး ဒဏ်ရာရခဲ့တယ်လို့ အထူးစစ်ဆင်ရေးတပ်ဖွဲ့ – S.O.F က ဒီနေ့ညပိုင်းမှာ ထုတ်ပြန်ပါတယ်။
KNLA တပ်ဖွဲ့တွေနဲ့ S.O.F တို့ ပူးပေါင်းကာ ဇန်နဝါရီလ ၂၇ရက်ကနေ ဖေဖော်ဝါရီလ ၅ရက်နေ့အထိ တပ်မဟာ – ၆ နယ်မြေအတွင်း စစ်ဆင်ရေးလုပ်ဆောင်တာဖြစ်တယ်လို့ S.O.F ရဲ့ထုတ်ပြန်ချက်မှာ ဖော်ပြထားပါတယ်။
KNLA တပ်ဖွဲ့တွေနဲ့ S.O.F တို့ပူးပေါင်းကာ စစ်ဆင်ရေးတွေ အဆက်မပြတ်လုပ်ဆောင်နေတာဖြစ်ပြီး အဲဒီတိုက်ပွဲ ၃ကြိမ်အတွင်း S.O.F တပ်ဖွဲ့က တပ်ဖွဲ့ဝင် ၃ဦး မစိုးရိမ်ရဒဏ်ရာ ရခဲ့တယ်လို့ S.O.F တပ်မှူး အောင်စံရှားက ပြောပါတယ်။
“ထုတ်ပြန်ချက်ထဲမှာပါသလိုပဲ တစ်ဦးက ပေါင်ကိုကျည်ထိတယ်။ နောက်၂ဦးက ခြေချင်းဝတ်ကို ၄၀ မမ မိုင်းစ ထိတယ်။ မစိုးရိမ်ရပါဘူး” လို့ သူက ပြောပါတယ်။
S.O.F အနေနဲ့ နယ်မြေအခြေအနေနဲ့ လုံခြုံရေးအခြေအနေတွေအရ တချို့စစ်ရေးဆောင်ရွက်ချက်တွေကို သတင်းလျှို့ဝှက်သွားမယ်လို့လည်း ပြည်သူကို အသိပေးထားပါတယ်။
#MeKongNews