မဲခေါင်၊ ဩဂုတ် ၂၁
ရှမ်းပြည် ပြန်လည်ထူထောင်ရေး ကောင်စီ_RCSS အနေနဲ့ ယနေ့အထိ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူညီမှု စာချုပ်-NCA ကို စွဲကိုင်ထားဆဲ ဖြစ်တယ်လို့ ထုတ်ပြန်ကြေညာပါတယ်။
ဒီကနေ့ ထုတ်ပြန်တဲ့ RCSS ရဲ့ ၆ လပတ် အစည်းအဝေး ထုတ်ပြန်ချက်မှာ အဲ့ဒီလို ပြောဆိုထားတာ ဖြစ်ပါတယ်။
NCA စာချုပ်ဟာ အစိုးရ၊ တပ်မတော်၊ လွှတ်တော်၊ တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ ပါဝင် လက်မှတ်ရေးထိုးတာတင် မကဘဲ ကုလသမဂ္ဂ၊ တရုတ်၊ အိန္ဒိယ၊ ထိုင်းနဲ့ ဂျပန်နိုင်ငံက အသိသက်သေအဖြစ် ပါဝင် လက်မှတ်ရေးထိုးခဲ့တဲ့ စာချုပ် ဖြစ်တယ်လို့ RCSS ကဆိုပါတယ်။
NCA အရ တွေ့ဆုံဆွေးနွေးရေး လမ်းကြောင်းမှ တဆင့် တိုင်းပြည်ရဲ့ အုပ်ချုပ်ရေးစနစ်ကို ပြုပြင်ပြောင်းလဲရမှာ ဖြစ်ပေမယ့် အလျှော့အတင်း မလုပ်နိုင်လို့ NCA စာချုပ်ပါ အချက်အလက်များ အကောင်အထည်ဖော်တဲ့ လုပ်ငန်းများ ရှေ့မတိုးနိုင်တာ ဖြစ်တယ်လို့ RCSS ကပြောပါတယ်။
ဒါ့အပြင် တွေ့ဆုံဆွေးနွေးခြင်း နည်းလမ်းနဲ့ ဖက်ဒရယ် ဒီမိုကရေစီ ပြည်ထောင်စုကို တည်ဆောက်ရမှာ ဖြစ်လို့ စစ်ရေး၊ နိုင်ငံရေး ပြဿနာများ ဖြေရှင်းရာမှာ သက်ဆိုင်တဲ့ အစုအဖွဲ့ ဘက်အဖက်ဖက် အနေနဲ့ တွေ့ဆုံဆွေးနွေးကြဖို့ RCSS က တိုက်တွန်း ပြောဆိုထားပါတယ်။
RCSS ရဲ့ ထုတ်ပြန်ချက်နဲ့ ပတ်သက်ပြီး ထပ်မံ သိရှိနိုင်ဖို့ ထုတ်ပြန်ချက်မှာ ဖော်ပြထားတဲ့ ပြောရေးဆိုခွင့်ရှိသူ တွေရဲ့ ဖုန်းကို ၇ အကြိမ်ကြိမ် ဆက်သွယ်ပေမယ့် ဖုန်းလက်ခံ ဖြေကြားခြင်း မရှိပါဘူး။
RCSS က တွေ့ဆုံဆွေးနွေးခြင်းဟာ အကောင်းဆုံး နည်းလမ်း ဖြစ်တယ်လို့ ပြောဆိုပေမယ့် အဲ့ဒီလမ်းကြောင်းကို စစ်ကောင်စီက အာဏာသိမ်းခြင်းနဲ့ အတူ ဖျက်ဆီးခဲ့တာလို့ ရှမ်းနိုင်ငံရေး တက်ကြွ လှုပ်ရှားသူ တစ်ဦးက ပြောပါတယ်။
“အဲ့ဒီလမ်းကြောင်းကို စစ်ကောင်စီက ဖျက်ဆီးလိုက်လို့ ပျက်စီးသွားပြီလေ။ ဒီအကြမ်းဖက် စစ်တပ်နဲ့က ဘယ်လိုမှ ညှိနှိုင်း ဆွေးနွေးလို့ မရဘူးဆိုတာ သမိုင်းမှာလည်း သက်သေအပြည့် ရှိပါတယ်။ အဲ့ဒီလို ညှိနှိုင်း ဆွေးနွေးလို့ မရလို့ အခုအချိန်မှာ လူထုတွေက နွေဦးတော်လှန်ရေးကို ဆင်နွှဲနေတာ ဖြစ်တယ်” လို့ သူကထောက်ပြ ပြောဆိုပါတယ်။
RCSS က အခုလို ထုတ်ပြန်ပေမယ်ါ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်-NCA ရဲ့ အခြေခံမူတွေကို စစ်တပ်က ဖျက်ဆီး ပစ်လိုက်တာဖြစ်လို့ ဆက်ပြီး လိုက်နာစရာ မလိုတော့ဘူးလို့ ဩဂုတ်လ ၁၀ ရက်၊ နေ့လယ်ပိုင်းမှာ ကျင်းပတဲ့ KNU ဗဟိုအလုပ်အမှုဆောင် အဖွဲ့သစ်ရဲ့ ပထမရက် ၁၀၀ ကာလ သတင်းစာရှင်းလင်းပွဲမှာ KNU အထွေထွေ အတွင်းရေးမှူး ပဒိုစောတာဒိုမူး ပြောဆိုထားပါတယ်။
“NCA ရဲ့ အခန်း (၁) ဟာ NCA တစ်ခုလုံးရဲ့ နှလုံးသား ဖြစ်ပါတယ်။ အဲ့ဒီ နှလုံးသားကို ဖျက်ဆီးလိုက်ပြီး ဖြစ်တာကြောင့် ဒီ NCA ဟာ မရှိတော့ပါဘူး။ NCA ကို အသုံးပြုပြီးတော့ နိုင်ငံတကာကို လှည့်စားခြင်း သော်လည်းကောင်း၊ ပြည်သူလူထုကို လှည့်စားခြင်း သော်လည်းကောင်း ကျွန်တော်တို့နဲ့ ဘာမှမဆိုင်ဘူး” လို့ ဖဒိုစောတာဒိုမူးက ဆိုပါတယ်။
NCA ကို ၂၀၁၅ ခုနှစ်၊ အောက်တိုဘာလ ၁၅ ရက်နေ့မှာ RCSS နဲ့ KNU အပါအဝင် တိုင်းရင်းသား လက်နက်ကိုင် အဖွဲ့အစည်း ၈ ဖွဲ့နဲ့ အဲဒီကာလ ဦးသိန်းစိန် အစိုးရတို့ကြား ပထမဆုံး သဘောတူ လက်မှတ်ရေးထိုးခဲ့တာ ဖြစ်ပါတယ်။
၂၀၁၅ ခုနှစ် NCA လက်မှတ်ရေးထိုးချိန်မှာ တိုင်းရင်းသား လက်နက်ကိုင်တပ်ဖွဲ့တွေဘက်က ကရင်အမျိုးသား အစည်းအရုံး (KNU)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော် (KNU/ KNLA-PC)၊ ချင်းအမျိုးသားတပ်ဦး (CNF)၊ ဒီမိုကရေစီ အကျိုးပြု ကရင်တပ်မတော် (DKBA)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ ရခိုင်ပြည်လွတ်မြောက်ရေးပါတီ (ALP) နဲ့ သျှမ်းပြည်ပြန်လည်ထူထောင်ရေးကောင်စီ (RCSS) တို့ ပါဝင်ခဲ့ပါတယ်။
NLD အစိုးရလက်ထက် ၂၀၁၈ ခုနှစ်၊ ဖေဖော်ဝါရီ ၁၃ ရက်နေ့မှာတော့ မွန်ပြည်သစ်ပါတီ၊ လားဟူဒီမိုကရက်တစ် အစည်းအရုံး တို့က NCA လက်မှတ်ရေးထိုး ခဲ့ကြပါတယ်။
ရှမ်းပြည် ပြန်လည်ထူထောင်ရေးကောင်စီ RCSS ဟာ NCA နဲ့ ပတ်သက်ပြီး လက်ရှိ စစ်ကောင်စီနဲ့ မကြာခဏ တွေ့ဆုံ ဆွေးနွေးနေတဲ့ အဖွဲ့ ဖြစ်ပါတယ်။
CJ-002
#MeKongNews
#RCSS
#NCA
#KNU