မဲခေါင်၊ ဩဂုတ် ၃၀
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ သပြေပင်သစ် အမှတ် (၃) ကျေးရွာနေ မိသားစု ၄ ဦးကို စစ်ကောင်စီတပ်နဲ့ ရဲတပ်ဖွဲ့တွေ မိသားစုလိုက် ဖမ်းဆီးသွားတယ်လို့ သတင်းရင်းမြစ်တွေက ပြောပါတယ်။
ဩဂုတ်လ ၂၈ ရက်၊ ညပိုင်းက သပြေပင်ကျေးရွာနေ ကိုအောင်မျိုးဝင်း နဲ့ မမြအေး တို့ မိသားစုကို စစ်ကောင်စီ စက်လှေ ၂ စီး၊ အင်အား ၁၀ ဦးကျော်နဲ့ လာရောက် ဖမ်းဆီးသွားတာလို့ ဆိုပါတယ်။
“လာဖမ်းတဲ့ အချိန်က ညနေစာ ထမင်းစားပြီးခါစ အချိန် ဖြစ်တယ်။ ကလေး တစ်ယောက်က ရေတောင်း သောက်တယ်၊ ပေးမသောက်ဘူး။ နောက်ကလေး တစ်ယောက်က အပေါ့သွားခွင့် တောင်းတယ်။ ပေးမသွားဘူး” လို့ ဒေသခံ တစ်ဦးက ပြောပါတယ်။
သူတို့ကို စစ်ကောင်စီတပ်က အကြောင်းပြချက် မပေးဘဲ အတင်းအဓမ္မ ဖမ်းဆီးသွားတာဖြစ်ပြီး ကလေး ၂ ယောက်မှာ အသက် ၁၈ နှစ်အရွယ် မိန်းကလေးနဲ့ အသက် ၁၅ နှစ်အရွယ် ယောကျ်ားလေး ဖြစ်ပါတယ်။
အဖမ်းခံရတဲ့ မိသားစုကို ဆွေမျိုးတွေက ဩဂုတ် ၂၉ ရက်မှာ ညောင်ရွှေမြို့မရဲစခန်းမှာ သွားရောက် တွေ့ဆုံရာ ကလေး ၂ ဦးကိုသာ အချုပ်မှာ တွေ့ရပြီး မိဘ ၂ ဦးနဲ့ တွေ့ခွင့် မရခဲ့ဘူးလို့ သိရပါတယ်။
“ရဲစခန်းရောက်တော့ ကလေး ၂ ယောက်က ဆွေမျိုးတွေကို ဖက်ပြီးငိုတယ်။ တအောင့်လောက်ရတော့ စခန်းမှူးက လာဆူ လာဆဲတော့ သူတို့လည်း ပြန်ပြေးလာရတယ်” လို့ ဒေသခံ တစ်ဦးက ပြောပါတယ်။
အခုလို ဖမ်းဆီးရာမှာ အင်းလေး ပျူစောထီးတွေ ပါဝင်တယ်လို့သိရပြီး စစ်ကောင်စီကို ပျူစောထီးတွေက လမ်းပြခဲ့တာလို့ ဒေသခံတွေက ပြောပါတယ်။
“စစ်ကောင်စီပဲဆို ဒီလိုမျိုး လိုက်ဖမ်းဖို့ ဆိုတာ မလွယ်ပါဘူး။ ပျူစောထီးတွေက လမ်းပြတာ သတင်းပေးတာ တွေကြောင့် ဖမ်းခံလိုက်ရတာပါ။ ဘာကြောင့် ဖမ်းတာလဲ မသိပေမယ့် ပျူစောထီးတွေက မနာလိုလို့ ချောက်ချတာလည်း ဖြစ်နိုင်တယ်” လို့ အင်းလေး ဒေသခံတစ်ဦးက ပြောပါတယ်။
အာဏာသိမ်းပြီးနောက်ပိုင်း စစ်ကောင်စီတပ်ဖွဲ့၊ အင်းလေး ပျူစောထီးနဲ့ PNO ပြည်သူ့စစ်တွေဟာ အင်းလေး ဒေသမှာ ပြည်သူလူထုကို မတရား အနိုင်ကျင့်တာတွေ တစ်နေ့ထက် တစ်နေ့ ပိုမို ဆိုးရွားလာတယ်လို့ JMC- Innlay အဖွဲ့ ဒါရိုက်တာ မယုလှိုင်သင်းက ပြောဆိုထားပါတယ်။
CJ-002
#MeKongNews
#အင်းလေး
#ပျူစောထီး
#PNO