မဲခေါင်၊ အောက်တိုဘာ ၁၃
ရှမ်းပြည်နယ် တောင်ပိုင်း၊ ညောင်ရွှေမြို့နယ် ၊အင်းလေကန် အနောက်ဘက်ကမ်း၊ အင်းတိန်ကျေးရွာမှာ တပ်စွဲထားတဲ့ စစ်ကောင်စီတပ်ဟာ ကုန်ကားတွေကို ဆက်ကြေးတောင်းတာနဲ့ ရွာသားတွေရဲ့ ကားတွေကို ချောဆွဲတာတွေကြောင့် ကားသမားနဲ့ ဒေသခံတွေ အခက်အခဲ ဖြစ်နေရတယ်လို့ မဲခေါင်သတင်းဌာနက စုံစမ်း သိရှိရပါတယ်။
အင်းတိန်ကျေးရွာ ဂိတ်မှာ တပ်စွဲထားတဲ့ စစ်ကောင်စီတပ်ဟာ အောက်တိုဘာလ ပထမပတ်မှ စပြီး ဒေသခံတွေရဲ့ ကားတွေကို ချောဆွဲ အသုံးပြုနေတာ ဖြစ်ပါတယ်။
အဲ့ဒီလို ကားချောဆွဲရာမှာ စစ်ကောင်စီတပ်ဖွဲ့တွေ သွားလိုတဲ့ နေရာမှန်သမျှ ကားသမားက ကိုယ့်စရိတ်နဲ့ကိုယ် ပို့ပေးရတဲ့အပြင် စားသောက်တာတွေကိုလည်း တာဝန်ယူ ရှင်းပေးရတယ်လို့ စုံစမ်း သိရှိရပါတယ်။
“ကိုယ့်ကားနဲ့ကိုယ် ဆီထည့်ပြီး လိုက်ပို့ရတယ်။ သူတို့စားတာ သောက်တာလည်း ရှင်းပေးရသေးတယ်။ ဒါတောင်မှ သူတို့ အသုံးစရိတ် ဆိုပြီး ပိုက်ဆံ ၆ သောင်း တောင်းသေးတယ်။ သူတို့ သွားချင်တဲ့ အချိန်တိုင်း တွေ့တဲ့ကားကို ချောဆွဲ ခေါ်သွားတာပဲ။ သူတို့ကို လိုက်ပို့ရတော့ ကိုယ့်ကားကို သူများပစ်မှာ၊ ဗုံးခွဲမှာလည်း ကြောက်ရသေးတယ်။ တချို့ကားရှိတဲ့ လူတွေက ရွာမပြန်လာရဲတော့တာမျိုးတောင် ဖြစ်နေပြီဗျ” လို့ ကိုယ်တိုင် ကြုံတွေ့နေရတဲ့ ဒေသခံ တစ်ဦးက ပြောပါတယ်။
ပြီးခဲ့တဲ့ ဇန်နဝါရီလ အင်းလေးကန် အနောက်ဘက်ခြမ်းမှာ တိုက်ပွဲ ပြင်းထန်နေချိန် စစ်ကောင်စီနဲ့ လက်အောက်ခံ PNO ပြည်သူ့စစ်က ဒေသခံတွေရဲ့ ကားတွေကို ချောဆွဲ အသုံးပြုခဲ့ပါတယ်။
ဒါ့အပြင် ဂိတ်ကို ဖြတ်သန်းသွားလာတဲ့ ကားတွေကို စစ်ကောင်စီက မတရား ငွေတောင်းနေတယ်လို့ ကုန်ကား မောင်းနှင်သူတွေက ပြောပါတယ်။
အင်းတိန်ဂိတ်မှာ ကုန်စည်မပါတဲ့ ကားတစ်စီးကို ၅,၀၀၀ မှ ၁၅,၀၀၀ ကျပ်အထိ၊ ကုန်စည်ပါတဲ့ ကားတွေကိုတော့ ၃၀,၀၀၀ ကနေ ၈၀,၀၀၀ ကျပ်အထိ တောင်းယူနေတယ်လို့ ကုန်ကားမောင်းနှင်တဲ့ အင်းလေး ဒေသခံတွေက ပြောပါတယ်။
“နွားကားတွေဆို တစ်သိန်းကျော်ကျော်ထိ တောင်းတယ်။ ဆန်တွေ၊ ဘိလပ်မြေတွေ၊ ဆီတွေပါတဲ့ ကားဆိုရင် ဆန်တအိတ် ၅ ထောင် ဘိလပ်မြေတစ်အိတ် ၂ ထောင် အဲ့လိုတောင်းတာဗျ။ မပေးရင် အကြောင်းအမျိုးမျိုးပြပြီး ဖမ်းမယ်လို့လည်း ခြိမ်းခြောက်တယ်လေ။ အခု ဘုရားပွဲနီးတော့ ပိုစစ်တယ်၊ ပိုတောင်းတယ်။ ကျွန်တော် ကိုယ်တိုင်လည်း ပြီးခဲ့တဲ့ရက်က ဆန်သယ်လာတာ တစ်သိန်းတောင်းတာ ညှိနှိုင်းပြီး မပေးချင်ပဲနဲ့ ၈ သောင်း ပေးလိုက်ရတယ်” လို့ ကုန်တင်ကားမောင်းသူ တစ်ဦးက ပြောပါတယ်။
စစ်ကောင်စီတပ်တွေဟာ အင်းလေး ပျူစောထီး၊ PNO တို့နဲ့ ပူးပေါင်းကာ ဒေသခံတွေကို ဖမ်းဆီး ငွေညှစ်တာ၊ ကားသမားတွေဆီက ငွေတောင်းတာတွေအပြင် လောင်းကစား၀ိုင်းတွေ ဖွင့်ခွင့်ပေးပြီး ငွေတောင်းတာတွေ ပြုလုပ်နေတယ်လို့ အင်းလေး ဒေသခံတွေက ပြောပါတယ်။
အင်းတိန်ကျေးရွာဟာ အင်းလေး အနောက်ဘက်ကမ်းမှာ တည်ရှိတဲ့ ကျေးရွာဖြစ်ပြီး သမိုင်းဝင် ရွှေအင်းတိန်ဘုရား တည်ရှိလို့ နာမည်ကျော်ကြားတဲ့ ကျေးရွာလည်း ဖြစ်ပါတယ်။
CJ-002
#MekongNews
#အင်းတိန်ကျေးရွာ
#ပျူစောထီး
#PNO