မဲခေါင်၊ ဇူလိုင် ၁၁
ကရင်နီပြည်နယ် အတွင်း၊ သံလွင်မြစ် အရှေ့ခြမ်း နယ်မြေအားလုံးနီးပါး ထိန်းချုပ်စိုးမိုးထားနိုင်ပြီလို့ ကရင်နီ တော်လှန်ရေးတပ်ဖွဲ့တွေနဲ့ နီးစပ်သူ မယ်စဲ့မြို့နယ် NLD အမတ်ဟောင်း ဦးသန်းလင်းလင်း က မဲခေါင်သတင်းဌာနကို ဒီကနေ့ ဇူလိုင်လ ၁၁ ရက်မှာ ပြောပါတယ်။
သံလွင် အရှေ့ခြမ်း နယ်မြေတွေဖြစ်တဲ့ ရှားတော့မြို့နယ်၊ နန့်ပါချောင်းမြောက်ဘက်၊ မယ်စဲမြို့နယ် တစ်ခုလုံးနဲ့ ဘောလခဲနယ်စပ် ဒေသတစ်ချို့ကို ကရင်နီ တော်လှန်ရေး အင်အားစုတွေ နယ်မြေ ရှင်းလင်းနေပြီး ထိုင်း-ကရင်နီ နယ်စပ်မျဉ်းပေါ်က နယ်ခြားစောင့် တပ်ရင်း အမှတ် (၁၀၀၄) စခန်းမှာသာ စစ်ကောင်စီ တပ်စွဲနိုင်တော့တယ်လို့ သူက ရှင်းပြပါတယ်။
“လက်ရှိမှာတော့ တော်လှန်ရေး အင်အားစု နယ်မြေ စိုးမိုးမှုကို ပြောရရင် မယ်စဲ့မြို့နယ် သံလွင် အရှေ့ခြမ်းကို အားလုံးနီးနီးတော့ နယ်မြေစိုးမိုး ထားနိုင်ပြီ လို့တော့ ယေဘုယျ အားဖြင့် ပြောလို့ရပြီ။ ဒါပေမဲ့ အရင်BGF-အမှတ် (၁၀၀၄) တပ်ရင်း ထဲမှာတော့ စကစတွေ လေယာဉ်နဲ့ ဗုံးကြဲပြီး ဟတ်စကီးနဲ့ လူအင်အားကော၊ လက်နက်တွေကော ထပ်လာချသွားတယ်။ ဒါကြောင့် အဲဒီ တပ်ရင်းစခန်း တစ်ခုပဲ ကျန်တော့တယ်” လို့ သူက ရှင်းပြပါတယ်။
စစ်ရေးအရ နယ်မြေစိုးမိုးထားနိုင်ပေမဲ့ စစ်ကောင်စီရဲ့ လေကြောင်းရန်ကြောင့် မယ်စဲ့မြို့နယ်ထဲမှာ ပြည်သူတွေ မရှိတော့ဘဲ မြို့နယ်လုံးကျွတ် စစ်ဘေး တိမ်းရှောင်နေရပြီး ထိုင်း-ကရင်နီ နယ်စပ်နဲ့ ထိုင်းနိုင်ငံဘက်ခြမ်းတွေမှာ ခိုလှုံနေရတယ်လို့ စစ်ရှောင် ကူညီနေသူ တစ်ဦးက ပြောပါတယ်။
“မယ်စဲ့မြို့နယ်ထဲမှာတော့ ပြည်သူတွေ တစ်ယောက်မှ မရှိတော့ဘူး။ ကရင်နီ တော်လှန်ရေး အင်အားစုတွေ ဘက်က နယ်မြေစိုးမိုးနိုင်တယ် ဆိုသော်ငြားလည်း စစ်ကောင်စီက လေကြောင်းကနေ ဆက်တိုက် ဗုံးကြဲနေတာ ဆိုတော့ မယ်စဲ့မြို့နယ် မြို့ပေါ်က လူကော၊ ကျေးရွာမှာ နေထိုင်တဲ့ ပြည်သူလူထုကော စစ်ဘေးရှောင်ကြပြီ။ ထိုင်းနိုင်ငံ၊ ဆောင်ဟိန်ကျေးရွာမှာက လတ်တလော စစ်ရှောင်ဦးရေ ၃,၅၀၀ လောက်၊ နောက်ပြီး မြန်မာ-ထိုင်း နယ်စပ်မျဉ်းမှာတော့ ၅,၀၀၀ ကျော်လောက်ရှိမယ်။ ထပ်တိုးဖို့လဲရှိတယ်။ လတ်တလော မှာတော့ ထိုင်းဖက်ခြမ်း စစ်ရှောင်ဦးရေ ကန့်သတ်ထားတော့ အခု မြန်မာဖက်ခြမ်းက စစ်ရှောင် ၅,၀၀၀ ကျော် ဝင်ခွင့်မရဘူး ဖြစ်နေတယ်” လို့ သူကပြောပါတယ်။
ထိုင်းနယ်စပ် အာဏာပိုင်တွေက ထိုင်းနိုင်ငံထဲ စစ်ရှောင် ဒုက္ခသည်တွေ ခိုလှုံခွင့် ကန့်သတ်ထားပေမဲ့ လိုအပ်တဲ့ အရေးပေါ် စားနပ်ရိက္ခာတွေ သယ်ခွင့်ပြုထားတဲ့အတွက် မြန်မာဘက်ခြမ်းမှာ ကျန်ခဲ့တဲ့ စစ်ရှောင် ပြည်သူ ၅,၀၀၀ ကျော်အတွက် လိုအပ်တဲ့ အမိုးအကာ၊ နေရာထိုင်ခင်းနဲ့ စားနပ်ရိက္ခာ ကူညီပေးနေတယ်လို့ မယ်စဲ့မြို့နယ် NLD အမတ်ဟောင်း ဦးသန်းလင်းလင်း က ပြောပါတယ်။
MK-007
ဓာတ်ပုံ-ပုံဟောင်းဖြစ်ပါတယ်။
#MekongNews
#မယ်စဲ့မြို့နယ်
#သံလွင်မြစ်
#NLD