မဲခေါင်၊ ဩဂုတ် ၁
သေရဲတဲ့ စစ်ကောင်စီတပ်တွေ ကရင်နီပြည်ကို လာခဲ့လို့ ကရင်နီ အမျိုးသားများ ကာကွယ်ရေးတပ်-KNDF ဒုတိယ စစ်ဦးစီးချုပ် မာဝီက စိန်ခေါ် ပြောဆိုလိုက်ပါတယ်။
“သူတို့ သပိတ်ကာလတုန်းက ပြောသလိုပေါ့ဗျာနော်၊ သေရဲတဲ့ကောင် ထွက်ခဲ့ ဆိုပြီးတော့။ အခုလည်း ကရင်နီ ကနေပြီးတော့ ကျွန်တော်တို့ ဒဲ့စိန်ခေါ်တယ်။ သေရဲတဲ့ တပ်မ၊ သေရဲတဲ့ စကခ၊ သေရဲတဲ့ စစ်ဆင်ရေး ဘာဗျူဟာ ညာဗျူဟာ သေရဲတဲ့ကောင် အကုန် ကရင်နီ လာလို့ရတယ်။” လို့ KNDF ဒုတိယစစ်ဦးစီးချုပ် မာဝီကပြောပါတယ်။
ဇူလိုင် ၃၁ ရက် ညမှာ ပြုလုပ်တဲ့ “မောင်း ၁၀၀ ကမ်ပိန်း”အောင်မြင်ရေး တိုက်ရိုက် ထုတ်လွင့်တဲ့ စကားဝိုင်းမှာ KNDF ဒုစစ်ဦးစီးချုပ်က အဲ့ဒီလို စိန်ခေါ်လိုက်တာ ဖြစ်ပါတယ်။
“ကရင်နီကတော့ သေရဲလို့ပဲ သူ့(စကစ)ကို အာခံနေပြီ။ သူတို့ဘက်က သေရဲဖို့ပဲ လိုတော့တယ်။ အဲ့ဒါကြောင့်မို့လို့ သေရဲတဲ့ကောင် အကုန်လာခဲ့လို့ရတယ်” လို့ သူကပြောပါတယ်။
စစ်ကောင်စီက ပထမအကြိမ် ကရင်နီပြည်ကို ထိုးစစ်ဆင်စဥ် ကရင်နီ ပူးပေါင်းတပ်တွေက စစ်တပ် တပ်ရင်းလိုက် ပြုတ်ပြီး တပ်ဖွဲ့စည်းပုံ ပျက်တဲ့အထိ ပြင်းပြင်းထန်ထန် ခုခံ တိုက်ခိုက်ခဲ့တယ်လို့ ဆိုပါတယ်။
လက်ရှိအချိန်မှာ စစ်ကောင်စီက အင်အားထပ်မံ ဖြည့်တင်းပြီး ကရင်နီပြည်ကို ဒုတိယ အကြိမ် ထိုးစစ်ဆင်ဖို့ ပြင်ဆင်နေပါတယ်။
ပြီးခဲ့တဲ့ ၂၀၂၁ ခုနှစ်၊ မေလ အတွင်းမှာ စစ်ကောင်စီရဲ့ တပ်မ (၅၅) နဲ့ စတင် တိုက်ပွဲဖြစ်ပွားခဲ့ပြီး လက်ရှိ စစ်ကောင်စီဟာ တပ်မ (၅၅) ကို ရခိုင်ပြည်နယ်က ပြန်ခေါ်ပြီး နောက်တစ်ကြိမ် ကရင်နီကို ပို့ဆောင်ထားပါတယ်။
“အခု ၅၅ တွေက နောက်တစ်ကျော့ ကရင်နီကို ပြန်ရောက်လာပြီ ဆိုတော့ သေရဲတဲ့ကောင် ထွက်လာခဲ့၊ ကရင်နီ ကလေးတွေက အဆင်သင့် ဖြစ်နေပြီလို့ ပြောချင်တယ်” လို့ ကိုမာဝီက ပြောပါတယ်။
KNDF ဗျူဟာ (၁) ဟာ စစ်ကောင်စီတွေ ကရင်နီပြည်ထဲကို မဝင်နိုင်အောင် အဝင်မှာ တားဆီးရတဲ့ ဗျူဟာ ဖြစ်လို့ KNDF ဗျူဟာ (၁) က ဦးဆောင်လုပ်နေတဲ့ မောင်း ၁၀၀ ကမ်ပိန်း အောင်မြင်ဖို့အတွက် ဝိုင်းဝန်ကူညီကြဖို့ ကိုမာဝီ က တိုက်တွန်းပါတယ်။
“ကျွန်တော်တို့ ယုံကြည်ထားတာက တော်လှန်ရေးဆိုတာ နယ်မြေရှိရတယ်။ လေပေါ်မှာ လုပ်လို့မရဘူး။ ဒီကမ်ပိန်းတွေက ရလာတဲ့ ပစ္စည်းတွေနဲ့ စစ်ကောင်စီရဲ့ စစ်ကြောင်းတွေကို ဦးကျိုးအောင် ကျွန်တော်တို့တွေ ချိုးနိုင်တဲ့ တာဝန်ကို ဗျူဟာ (၁) ရဲ့အောက်က တပ်ရင်းတွေက အစွမ်းကုန် လုပ်ပါလိမ့်မယ်” လို့ သူက ကတိပေး ပြောဆိုပါတယ်။
မောင်း ၁၀၀ ကမ်ပိန်း ရည်မှန်းချက် ပြည့်ပါက ကရင်နီကနေ တစ်ဆင့် တစ်နိုင်ငံလုံး လွတ်မြောက်ရေး ဦးတည် နေတာ ဖြစ်တဲ့အတွက် လွတ်မြောက်နယ်မြေတစ်ခု ဖန်တီးနိုင်ပါက တစ်နိုင်ငံလုံး တော်လှန်ရေး အောင်နိုင်ရေး အတွက် ဆက်လက် လုပ်ဆောင်နိုင်မှာ ဖြစ်ပါတယ်။ ဒါကြောင့် နယ်မြေရှိလာဖို့ အရေးပါတဲ့ ကဏ္ဍကနေပြီးတော့မှ ကရင်နီဟာ ဆောင်ရွက်နေတာ ဖြစ်တယ်လို့ ကိုမာဝီ ကရှင်းပြပါတယ်။
“ကရင်နီကို ထောက်ပံ့ခြင်း ပံ့ပိုးခြင်းသည် ဘယ်တော့မှ သဲထဲရေသွန် မဖြစ်စေရဘူး။ ရလဒ်ကောင်းတွေ ရစေရမယ်။ ကရင်နီမှသည် တစ်နိုင်ငံလုံး အောင်ပွဲကို ကျွန်တော်တို့ ချီတက်ဖို့ အရေးပါတဲ့ ခြေလှမ်းတွေ ဖြစ်တဲ့အတွက် ဝိုင်းဝန်းပါဝင် ပေးကြဖို့အတွက် ကျွန်တော် တောင်းဆိုပါတယ်” လို့ သူကပြောပါတယ်။
မောင်း ၁၀၀ ကမ်းပိန်းဟာ KNDF ဗျူဟာ (၁) အောက်ရှိ တပ်ရင်းတွေကို မောင်းပြန် အလက် ၁၀၀ တပ်ဆင်ပေးဖို့ လုပ်နေတဲ့ ကမ်ပိန်းဖြစ်ပြီး ကမ်ပိန်း နောက်ဆုံးရက်ဟာ ဩဂုတ်လ ၈ ရက်နေ့ဖြစ်ပါတယ်။
မောင်း ၁၀၀ ကမ်ပိန်းမှာ ပါဝင် ကူညီလိုသူတွေ အနေနဲ့ “ကရင်နီ အိပ်မက်” ဆိုတဲ့ လူမှုကွန်ရက် စာမျက်နှာမှာ ပါဝင်ကူညီနိုင်ပါတယ်။
မောင်း ၁၀၀ ကမ်ပိန်းအောင်မြင်ဖို့ ပြည်သူ တစ်ယောက် တစ်သောင်းကျပ်နဲ့ အယောက် တစ်သိန်း ထည့်ဝင် ကူညီဖို့ ကမ်ပိန်း တာဝန်ရှိသူတွေက တိုက်တွန်းထားပါတယ်။
CJ-002
#MekongNews
#ကရင်နီပြည်
#KNDF
#စစ်ကောင်စီတပ်