မဲခေါင်၊ အောက်တိုဘာ ၄
ရှမ်းပြည်မြောက်ပိုင်း၊ ကိုးကန့် ကိုယ်ပိုင်ချုပ်ရဒေသက ဒေသခံ မြန်မာနိုင်ငံသား ၁၁ ဦးကို အောက်တိုဘာလ ၁ ရက်နေ့ မနက်ပိုင်းမှာ တရုတ်ရဲတပ်ဖွဲ့က ဥပဒေနဲ့အညီ ဖမ်းဆီးချုပ်နှောင်ထားတယ်လို့ တရုတ်ဘက်က သတင်း ထုတ်ပြန်ထားပါတယ်။
ဖမ်းဆီးခံရသူတွေကတော့ ဝေချင်းထောင်၊ လျိကျိန်းချီ၊ ပိဟွေကျွင်း ခေါ် ရန်လောက်ပီ၊ တိန်ကျီးတာ၊ ကျိုရှောက်ခိုက်၊ ဝင်းချောက်နိန်း၊ စူးဟုန်းရှန်း၊ လိအားဖူး၊ လျိုစွတ်နိန်း၊ ခွေးစောက်ပန်း ခေါ် ချဲအိုက်ဟွာ၊ ဝီလင်းကော် တို့ဖြစ်ကြောင်း အဲဒီ ထုတ်ပြန်စာမှာ ဖော်ပြထားပါတယ်။
ဖမ်းဆီးခံရသူ ၁၁ဦးဟာ တရုတ်လွတ်လပ်ရေးနေ့အခမ်းအနားကို ယူနန်ပြည်နယ်အစိုးရက ဖိတ်ကြားလို့ သွားတက်ရင်း ကိုးကန့်ဒေသတဖက်ကမ်း လင််ချန်းခရိုင်ဘက်မှာ အဖမ်းခံရတာဖြစ်ပြီး ဖမ်းဆီးခံရသူတွေထဲမှာ ကိုးကန့်ဒေသခံ လုပ်ငန်းရှင် ၂ဦး ပါဝင်တယ်လို့ သတင်းရင်းမြစ်တစ်ဦးက မဲခေါင်ကို ပြောပါတယ်။
“ ၁၀ လ ၁ ရက်နေ့က တရုတ်လွတ်လပ်ရေးနေ့လေ။ အဲဒါ သူတို့ကို ဖိတ်ရင်းနဲ့ တခါထဲ ဖမ်းပစ်လိုက်တာ” လို့ သူက ပြောပါတယ်။
ဖမ်းဆီးခံရသူတွေဟာ အွန်လိုင်းငွေလိမ်လုပ်ငန်းဖြစ်တဲ့ ကျားဖြန့်လုပ်ငန်းနဲ့ ဆက်စပ်မှုရှိတာကြောင့် ဖမ်းဆီးခံရတယ်လို့ သိရပြီး ကိုးကန့် အရာရှိနဲ့ တစ်ဦးနဲ့ ပတ်သက်မှုရှိနိုင်တယ်လို့ အဲဒီသတင်းရင်းမြစ်က ပြောပါတယ်။
ကိုးကန့် ကိုယ်ပိုင်အုပ်ချုပ်ခွင့်ရဒေသ အရာရှိအသိုင်းဝိုင်းက မိသားစုဝင်လည်း တရုတ်နိုင်ငံ၊ ယူနန်ပြည်နယ်မှာ လုပ်ငန်းကုမ္ပဏီ ထောင်ထားရာကနေ ဒီရက်ပိုင်းမှာ ဖမ်းဆီးခံထားရကြောင်း တရုတ်သတင်းတွေမှာ ပါလာတာ တွေ့ရပါတယ်။
“ သတင်းမှာ ပါလာတဲ့ ၂ ယောက်က ကိုးကန့်အရာရှိတွေရဲ့ သားသမီးဖြစ်မယ်” လို့ နယ်စပ်ဒေသခံ တစ်ဦးက ပြောပါတယ်။
တရုတ်နယ်စပ်နဲ့ ထိစပ်နေတဲ့ မြန်မာဘက်ခြမ်းက အာဏာပိုင်တွေဟာ ကျားဖြန့် (ငွေလိမ်) ဂိုဏ်းတွေကို ဖမ်းဆီးတာမှာ ပူးပေါင်း ပါဝင်ကြပေမယ့် ကိုးကန့်ကိုယ်ပိုင်အုပ်ချုပ်ခွင့် ဒေသအနေနဲ့ ပူးပေါင်း ပါဝင်ခြင်း မရှိတာကြောင့် သူတို့နဲ့ ပတ်သက်နေတဲ့ လူ ၁၀ ဦးကျော် ဖမ်းဆီး ထိန်းသိမ်းခံရတာဖြစ်တယ်လို့လည်း နောက်ထပ်သတင်းရင်းမြစ်တစ်ဦးက ဆိုပါတယ်။
ဖမ်းဆီးခံရသူတွေထဲမှာ ဖူလီလိုက်ကုမ္ပဏီက ဒါရိုက်တာတစ်ဦးလည်း ပါဝင်ပြီး ကိုးကန့်နယ်ခြားစောင့်တပ် ခေါင်းဆောင်တစ်ဦးဖြစ်တဲ့ ဝေဆန်းရဲ့ လူတစ်ဦးလည်းပါတယ်လို့ သူက ဆိုပါတယ်။ ကိုးကန့်နယ်ခြားစောင့်တပ်က အငြိမ်းစားအရာရှိဖြစ်သူ ဝေဆန်းဟာ မကြာသေးခင်က အာဏာသိမ်းစစ်ခေါင်းဆောင်မင်းအောင်လှိုင်နဲ့ လားရှိုးမှာ တွေ့ဆုံထားတာဖြစ်ပါတယ်။
လက်ရှိ အခြေအနေမှာ ဖမ်းဆီးခံရသူတွေကို တရုတ်ဘက်မှ ဥပဒေအရ အမှုတွေကို စစ်ဆေးနေကြောင်း တရုတ်ဘက်ကထုတ်ပြန်စာ အရ သိရပါတယ်။
CJ – 008
#MeKongNews
#ကိုးကန့်
#ကျားဖြန့်
#ဖူလီလိုက်
#ဝေဆန်း
ပုံအညွှန်း – ဖမ်းဆီးခံရသူတချို့