မဲခေါင်၊ အောက်တိုဘာ ၁၁
ရှမ်းပြည်နယ်မြောက်ပိုင်း ၊လားရှိုးမြို့မှာ နိုင်ငံကူးလက်မှတ်အမြန်ရလိုသူတွေအနေနဲ့ ပြင်ပ ပေါက်ဈေး ၁၆သိန်း အထိ ပေးပြီး လုပ်နေရတယ်လို့ ကိုယ်တိုင်လုပ်ဆောင်ခဲ့သူအချို့ ကပြော ပါတယ်။
ရှမ်းပြည်နယ်မြောက်ပိုင်းအတွင်းက နိုင်ငံကူလက်မှတ်လုပ်လိုသူတွေအတွက် လားရှိုးမြို့ ရပ်ကွက် ၁မှာရှိတဲ့ နိုင်ငံကူးလက်မှတ် ထုတ်ပေးရေးရုံမှာ ရက်ချိန်းနဲ့ထုတ်ပေးနေတာ ဖြစ်ပါတယ်။
ရက်ချိန်းပေးတာမှာ အနည်းဆုံး သုံးလလောက်အထိ ကြာလေ့ရှိပြီး ပြင်ပကနေ ပွဲစားကနေ လုပ်ရင် ၁၀ ရက်နဲ့ ရတယ်လို့ ကိုယ်တိုင် ကြုံခဲ့ရသူတစ်ဦးက ပြောပါတယ်။
“ရက်ချိန်းစောင့်ပြီး တိုကင်ယူတာ သုံးလလောက် စောင့်ရမယ်ပြောတယ်။ အရေးကြီးလို့ အမြန်ရချင်တယ် ဆို တော့ ၁၆သိန်းတဲ့ ၁၀ရက်နဲ့ရမယ်တဲ့။ ရုံးအရှေ့မှာ ပွဲစားတွေက တန်းစီနေတာပဲ။ ငွေမတတ်နိုင်လို့ ဆိုတော့ မရဘူး ပေါက်ဈေးပဲတဲ့။ ပွဲစားအပ်နိုင်တဲ့သူက ပိုမြန်တာပေါ့” သူက ပြောပါတယ်။
လားရှိုးနိုင်ငံကူး လက်မှတ်ထုတ်ပေးရေးရုံးကနေ တစ်ရက်ကို လူဦးရေ ၁၀၀ ခွင့်ပြုတာဖြစ်ပေမယ့် လူဦးရေ ၆၀ လောက်ရောက်တာနဲ့ တုံကင် ပြည့်သွားတာမျိုးလည်း တွေ့ကြုံ ခဲ့ရဖူးတယ်လို့ ကိုယ်တိုင် သွားရောက်လုပ်ကိုင်ခဲ့ဖူးတဲ့ ကျောက်မဲမြို့ခံ တစ်ဦးက ပြောပါတယ်။
“ရုံးဖွင့်ချိန် ၈နာရီကနေ စပေးတာ ၁၀နာရီတောင် မထိုးဘူး လူ ၅၀ ၊၆၀ လောက်နဲ့လည်း ပြည့်ပြီးပြော တယ်။ ကျန်တဲ့သူတွေကို နောက်ရက်ပြန်လာတဲ့။ ပွဲစားတွေနဲ့ ချိတ်ထားတဲ့သူတွေကြတော့ အေးဆေးပဲ။ ဒီနေ့ အတွက် လူပြည့်ပြီသာ ပြောတာ ပွဲစားလက် မှာကြတော့ စာရွက်တွေ အပြည့်နဲ့။အဝေးက လာလုပ်တဲ့သူ တွေကြတော့ နစ်နာတယ်လေ။ အချိန်လည်းစောင့်ရသေးတယ်” သူက ပြောပါတယ်။
လနဲ့ချီပြီး ရက်ချိန်းပြည့်လို့ သွားလုပ်တဲ့သူတွေကိုလည်း တစ်ရက်နှစ်ရက် ပြန်ချိန်းတာမျိုး လည်းရှိတယ်လို့ ကိုယ်တိုင် လုပ်ဆောင်ခဲ့ဖူးတဲ့ နောင်ချိုမြို့ခံ အမျိုးသမီးတစ်ဦးက ပြောပါ တယ်။
တိုကင် ရက်ချိန်အတိုင်း လုပ်ရင် ငွေကျပ် ၈၀၀၀၀ လောက်ပဲ ကုန်ကျပေမယ့် ပြင်ပ ပွဲစားနဲ့ လုပ်တဲ့ပေါက် ဈေးက ၁၆ သိန်းအထိဖြစ်တာနေတာကြောင့် ကျန်းမာရေး၊ပညာရေးကဏ္ဍ တွေအတွက် နိုင်ငံခြားသွားဖို့လိုတဲ့ သူတွေ အခက်အခဲ ဖြစ်ရတယ်လို့ ဒေသခံတွေက ပြောပါ တယ်။
လက်ရှိမှာ မြန်မာ- တရုတ်နယ်စပ် ဂိတ်တွေက နိုင်ငံကူးလက်မှတ်နဲ့ ဝင်ထွက်ခွင့်ကို ပါ ခွင့်ပြုတာကြောင့် နိုင်ငံကူး လက်မှတ်လုပ်လိုသူတွေ ပိုများလာတာကို တွေ့ရတယ်လို့ ဒေသခံတွေက ပြောပါတယ်။
CJ – 003
#MeKongNews
#နိုင်ငံကူးလက်မှတ်
#လားရှိုးမြို့