မဲခေါင်၊ မတ် ၂၆
ရှမ်းပြည်မြောက်ပိုင်း၊ လားရှိုးကနေ နမ့်ပေါင်-တန့်ယန်းသွားလမ်းဘက်ကို အမြောက်နဲ့ ယနေ့ မတ်လ ၂၆ ရက်နေ့လယ်ပိုင်းက ပစ်ခတ်ခဲ့တယ်လို့ ဒေသသတင်းအရင်းအမြစ်တွေထံမှ သိရပါတယ်။
ဒီနေ့ နေ့လယ် ၁၂ နာရီ ၆ မိနစ်၊ ၇ မိနစ်၊ ၁၁ မိနစ်၊ ၁၄ မိနစ်တို့မှာ ပစ်ခတ်ခဲ့တာဖြစ်ပြီး ၄ကြိမ်ပစ်တာလို့ သိရပါတယ်။
အချို့ဒေသခံတွေကတော့ မနက်ဖြန် မတ်လ ၂၇ ရက်အတွက် အကြို စမ်းသပ်ပစ်ခတ်တာလို့ ယူဆနေကြသလို လားရှိုးရဲ့အနောက်တောင်ဘက်မှာရှိတဲ့ နမ့်ပေါင်ဂွင်ထဲကို ပစ်ကူပေးတာလို့လဲ လားရှိုးက စစ်ဖက်နဲ့နီးစပ်သူတွေက ပြောပါတယ်။
“အသံတော့ လားရှိုးမြို့တောင်တုန်စေတယ်။ မြို့တွေက တိုက်ပွဲဖြစ်မှာကြောက်လို့ တချို့က ပစ္စည်းတွေသိမ်းကြတယ်။ အခုလက်နက်ကြီးတွေပစ်လိုက်တဲ့နေရာက အထက်မန်အိုင်ကုန်းညောင် ဘက်ပစ်တယ်” လို့ ဒေသခံတစ်ဦးက ပြောပါတယ်။
လက်ရှိအခြေအနေမှာ လားရှိုးမှာ အရှေ့မြောက်တိုင်းစစ်ဌာနချုပ်နဲ့ ခလရ ၄၁၊ ခမရ ၅၀၇ တို့ရှိကြပြီး လောက်ကိုင် ဒစက ကဖြုတ်လိုက်တဲ့ တပ်ရင်းတွေပူးပေါင်းမှုသာမက မိုင်းရယ်ဘက်က ဖြည့်တင်းလာတဲ့ အင်အားတွေ ရှိနေတယ်လို့ သိရပါတယ်။
လားရှိုးမြို့ပတ်ပတ်လည်မှာ TNLA နဲ့ SSPP တပ်ဖွဲ့အင်အားအများအပြား ခြေကုတ်ယူထားတဲ့ အခြေအနေမှာ စစ်ကောင်စီတပ်က အမြောက်ပစ်ခတ်မှုကြောင့် တိုက်ပွဲတွေ ပြန်ဖြစ်မှာကို ဒေသခံတွေစိုးရိမ်နေကြပါတယ်။
MK-011-012
