မဲခေါင်၊ ဩဂုတ် ၁၅
ကရင်ပြည်နယ်၊ မြဝတီမြို့အနီးက လက်ခတ်တောင်မှာ တိုက်ပွဲ ပြင်းထန်နေပြီး စစ်တပ်က လက်နက်ကြီးနဲ့ ဆက်တိုက်ပစ်ကာ ဒီနေ့ ဩဂုတ်လ ၁၅ ရက်၊ မနက် ဆယ်နာရီကျော်မှာ လေကြောင်းက ဗုံးကြဲနေတယ်လို့ မြဝတီမြို့ခံတွေက မဲခေါင်သတင်းဌာနကို ပြောပါတယ်။
KNLA ပူးပေါင်းတပ်တွေ သိမ်းယူထားတဲ့ လက်ခတ်တောင်ကို စစ်ကောင်စီတပ်က ပြန်သိမ်းနိုင်ဖို့ ကြိုးစားရင်း တိုက်ပွဲတွေ မနေ့ကစပြီး ပြန်လည် ပြင်းထန်လာတာ ဖြစ်ပါတယ်။
“မနက် ၄ ခွဲလောက်ကတည်းက လန့်နိုးနေတာ။ ဘယ်အချိန်ကတည်းက ပစ်နေလဲ မသိဘူး။ ခုနကလည်း လေယာဉ် ပစ်ချသွားတာ အကျယ်ကြီးပဲ။ အကုန်လုံး ခါထွက်သွားတာ။ နှလုံးတုန်နေတာတောင် ခုထိ မရပ်သေးဘူး” လို့ မြ၀တီမြို့ခံ အမျိုးသမီး တစ်ဦးက ပြောပါတယ်။
ဒီနေ့ မနက်ပိုင်းမှာ စစ်တပ်က လေယာဉ်နဲ့ ဗုံး ၂ ကြိမ် ကြဲချခဲ့တာဖြစ်ပြီး စစ်တပ်ရဲ့ လေကြောင်း တိုက်ခိုက်မှုကြောင့် ထိခိုက်မှု အသေးစိတ်ကိုတော့ မဲခေါင်သတင်းဌာနက ဆက်လက် စုံစမ်းနေဆဲ ဖြစ်ပါတယ်။
မနေ့က ဩဂုတ် ၁၄ ရက် မနက်ပိုင်းကစပြီး လက်ခတ်တောင်စခန်းကုန်းရှိရာ ဘက်ကို မြဝတီမြို့ တဝိုက်မှာရှိတဲ့ ခလရ (၂၇၅) တပ်ရင်း၊ ကံ့ကော်တစ်ထောင် ဘုန်းကြီးကျောင်း၊ ကျောက်လုံးကြီးဘုရားအနီး အစရှိတဲ့ စစ်ကောင်စီ လက်နက်ကြီး စခန်းကုန်းတွေကနေ လက်နက်ကြီးတွေ အဆက်မပြတ် ပစ်ခတ်နေခဲ့တာ ဖြစ်ပါတယ်။
ဒီနေ့ မနက်ပိုင်းမှာတော့ လက်နက်ကြီး ပစ်ခတ်မှုတွေ ပိုများလာခဲ့ပြီး တိုက်ပွဲဖြစ်နေတဲ့ လက်နက်ငယ်သံတွေကိုပါ ပိုကြားလာရတယ်လို့ ဒေသခံ တစ်ဦးက ပြောပါတယ်။
“မနေ့ကတည်းကဖြစ်နေတာ။ ဒီနေ့က ပိုနီးလာလို့ ကြားရတာ။ နည်းနည်းထပ်နီးလာရင်တော့ ပြေးရတော့မယ်။ လက်နက်ကြီး တစ်ခါကျတိုင်း တစ်ခါ ဆုတောင်းနေရတာ အမောပဲ” လို့ မြို့ထဲမှာ နေထိုင်သူက ဆိုပါတယ်။
လက်ခတ်တောင်ကို ဝိုင်း၀န်း ပစ်ခတ်နေတဲ့ လက်နက်ကြီးတွေဟာ ဒီနေ့ မနက်ပိုင်းမှာ မင်းလက်ပံကျေးရွာထဲ ကျရောက်ပြီး လူနေအိမ် ပျက်စီးတာတွေရှိနေပြီး ကျေးရွာနေ ပြည်သူတွေကတော့ ဘေးလွတ်ရာ ထွက်ပြေး တိမ်းရှောင်နေကြရတယ်လို့ သိရပါတယ်။
မင်းလက်ပံကျေးရွာအပြင် မေတ္တာလင်းမြိုင်ကျေးရွာ၊ ကျောက်လုံးကြီးရပ်ကွက်က နေရာတချို့နဲ့ အခြား လက်ခတ်တောင်နဲ့ နီးစပ်ရာ ကျေးရွာ တဝိုက်က ဒေသခံတွေ နေရပ်စွန့်ခွာ ထွက်ပြေးတိမ်းရှောင် နေကြရပါတယ်။
လက်ခတ်တောင် စခန်းကုန်း သိမ်းပြီးနောက်ပိုင်း ဩဂုတ်လ ၁၃ ရက်နေ့အထိ ထိတွေ့ ပစ်ခတ်မှုပေါင်း ၁၀ ကြိမ်နဲ့အထက် ရှိခဲ့ပြီး ဗိုလ်ကြီး ၂ ဦးအပါအဝင် စစ်ကောင်စီဘက်က ၁၇ ဦးသေဆုံးပြီး ၃၄ ဦး ဒဏ်ရာရခဲ့တယ်လို့ KNU က ဒီနေ့ မနက်ပိုင်းမှာ ထုတ်ပြန်ထားပါတယ်။
အဆိုပါ တိုက်ပွဲတွေအတွင်း KNLA ပူးပေါင်းတပ်တွေဘက်က ရဲဘော် တစ်ဦး ကျဆုံးပြီး ၈ ဦး ဒဏ်ရာရကာ အသုံးပြုနေဆဲ ဒရုန်း တစ်စီး ပျက်စီးဆုံးရှုံးခဲ့တယ်လို့ သိရပါတယ်။
တိုက်ပွဲအတွင်း ပြည်သူ တစ်ဦး အသက်ဆုံးရှုံးခဲ့ရပြီး တစ်ဦး ဒဏ်ရာရကာ သာသနာဆိုင်ရာ အဆောက်အအုံ ၅ လုံး ပျက်စီးခဲ့တယ်လို့ KNU ရဲ့ထုတ်ပြန်ချက်အရ သိရပါတယ်။
ဒါ့အပြင် လက်ခတ်တောင် တိုက်ပွဲမှာ ပါဝင်နေတဲ့ တပ်မ (၄၄) လက်အောက်ခံ ခမရ (၁၁၈) က ဒု-တပ်ကြပ် တစ်ဦးနဲ့ တပ်သား တစ်ဦးတို့ဟာ ဩဂုတ်လ ၈ ရက်နေ့မှာ KNLA ပူးပေါင်းတပ်ဖွဲ့ထံကို လက်နက်ခဲယမ်းတွေနဲ့ အတူ လာရောက် ပူးပေါင်းခဲ့တယ်လို့ သိရပါတယ်။
စစ်ရေးဗျူဟာအရ အချက်အချာကျတဲ့ လက်ခတ်တောင်စခန်းကို KNLA ပူးပေါင်းတပ်တွေသိမ်းပြီး နောက်ပိုင်း စစ်တပ်ဘက်က စခန်းပြန်ရဖို့အတွက် တပ်မ (၄၄) တပ်မမှူးက တိုက်ရိုက်ညွှန်ကြားပြီး လက်နက်အင်အား ဖြည့်တင်းကာ နေ့စဉ်နဲ့အမျှ ထိုးစစ်ဆင်နေတယ်လို့ KNU က ဆိုထားပါတယ်။
MK–009
#MeKongNews
#လက်ခတ်တောင်
#ကော်ပရာစစ်ကြောင်း
#လေကြောင်းဗုံးကြဲ