မဲခေါင်၊ မေ ၁
ရှမ်းပြည်နယ်မြောက်ပိုင်း၊ လားရှိုး- သိန္နီ ပြည်ထောင်စုလမ်းမကြီး၊ နမ့်တွန်းကျေးရွာအုပ်စု၊ ဖောင်လိတ်ရွာ ၁၆ မိုင်မှာ ဒီနေ့ (မေ ၁) နံနက်ပိုင်းက တောင်ယာရှင်းနေသူ အမျိုးသားတစ်ဦး မိုင်းထိခဲ့ပြီး စိုးရိမ်ရတယ်လို့ သွားရောက်ကူညီကယ်ဆယ်ပေးခဲ့တဲ့ လားရှိုးလူငယ်များ လူမှုကူညီရေးအသင်းထံကနေ သိရပါတယ်။
တောင်ယာစိုက်ပျိုးဖို့အတွက် အမျိုးသားတစ်ဦးတောင်ယာ စိုက်ခင်းရှင်းနေတဲ့အချိန် မိုင်းကိုဓားနဲ့ခုတ်မိခဲ့လို့ ပေါက်ကွဲမှုဖြစ်ပြီး ဒဏ်ရာရရှိခဲ့တာဖြစ်တယ်လို့ သွားရောက်ကူညီကယ်ဆယ်ရေးမှာ ပါဝင်သူတစ်ဦးက ပြောပါတယ်။
“ တောင်ယာအခင်းရှင်းနေတုန်း မိုင်းကိုဓါးမနဲ့ခုတ်မိပြီးထပေါက်တာပါ။ မျက်နှာကတော့ တစ်ခုလုံးအတော်ထိသွားတယ်။ ဘယ်ဘက် လက်လည်းမိုင်းပေါက်လို့ထိတယ်။ ကျန်တဲ့နေရာတွေတာ့ဘာမှမဖြစ်ပါဘူး။ ကျေးရွာလူကြီးတွေကအကူအညီတောင်းလို့ ဆေးရုံကိုပို့ပေးခဲ့တယ်။ အရေးပေါ်အခန်းမှာတော့ ဆရာဝန်တွေကြည့်ပေးနေပါတယ်” လို့ သူကပြောပါတယ်။
ထိခိုက်ဒဏ်ရာရရှိခဲ့တဲ့ အမျိုးသားမှ အသက် ၂၀ ကျော် ဖောင်လိတ်ကျေးရွာ ၁၆ မိုင်တွင် နေထိုင်သူဖြစ်ပြီး လားရှိုးပြည်သူ့ ဆေးရုံကြီးအရေးပေါ်ဌာနမှတစ်ဆင့် ခွဲစိတ်ကုသဆောင်သို့ ပို့ဆောင်ကူညီပေးထားတယ်လို့ သိရပါတယ်။
MK 005
#MeKongNews
#ဖောင်လိတ်ကျေးရွာ၁၆မိုင်
#တောင်ယာရှင်းမိုင်းနင်းမိ