မဲခေါင်၊ ဇူလိုင် ၁၁
ရှမ်းပြည်နယ် မြောက်ပိုင်း၊ မိုင်းငေ့ါမြို့နယ်မှာ စစ်ကောင်စီနဲ့ တအာင်း အမျိုးသား လွတ်မြောက်ရေး တပ်မတော်-TNLA တို့ မနေ့ ဇူလိုင်လ ၁၀ ရက်နေ့မှာ တိုက်ပွဲဖြစ်ပွားခဲ့တယ်လို့ TNLA က ဒီကနေ့ ထုတ်ပြန်ပါတယ်။
TNLA တပ်မဟာ (၂) စစ်ဒေသ၊ မိုင်းငေါ့မြို့နယ်၊ နမ့်တွေကျေးရွာ အနီးမှာ တိုက်ပွဲဖြစ်ပွားခဲ့တာဖြစ်ပြီး စစ်ကောင်စီ စစ်ကြောင်းထိုးလာလို့ တိုက်ပွဲဖြစ်ပွားရတာလို့ TNLA ကပြောပါတယ်။
အင်အား ၇၀ ပါတဲ့ စစ်ကောင်စီရဲ့ ခြေလျင်တပ်ရင်း ခလရ (၂၅၇) တပ်က မိုင်းငေါ့မြို့ကနေ TNLA တပ်တွေ ရှိတဲ့ နမ့်တွေကျေးရွာဘက် ထိုးစစ်ဆင်လာတဲ့ အတွက် မနက် ၉ နာရီကနေ မွန်းတည့် ၁၂ နာရီအထိ တိုက်ပွဲ ပြင်းပြင်းထန်ထန် ဖြစ်ခဲ့တယ်လို့ TNLA က ထုတ်ပြန်ပါတယ်။
မနေ့က တိုက်ပွဲဖြစ်ပွားတဲ့အတွက် နှစ်ဖက် တပ်ဖွဲ့တွေ ဒီနေ့အထိ တစ်ဖက်နဲ့တစ်ဖက် စောင့်ကြည့်နေဆဲ ဖြစ်ကာ စစ်ရေး အခြေအနေ တင်းမာနေဆဲ ဖြစ်တယ်လို့ TNLA ရဲ့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီနဲ့ TNLA တိုက်ပွဲ ဖြစ်ပွားတာနဲ့ ပတ်သက်ပြီး TNLA ရဲ့ ပြောရေးဆိုခွင့်ရှိသူတွေကို ဆက်သွယ် မေးမြန်းပေမယ့် ပြန်လည် ဖြေကြားတာ မရှိပါဘူး။
စစ်ကောင်စီဟာ အခု ဇူလိုင်လအတွင်း တအာင်း အမျိုးသား လွတ်မြောက်ရေး တပ်မတော်-TNLA ရဲ့ လှုပ်ရှားနယ်မြေတွေမှာ စစ်အင်အား တိုးချပြီး လှုပ်ရှားလာတယ်လို့ TNLA က ထုတ်ပြန်ထားပါတယ်။
CJ- 002
#MekongNews
#TNLA
#မိုင်းငေ့ါမြို့နယ်
#ခလရ(၂၅၇)
