မဲခေါင် ၊ ဩဂုတ် ၁၀
ရှမ်းပြည်နယ် တောင်ပိုင်း၊ ရှမ်းပြည်တိုးတက်ရေးပါတီ SSPP နယ်မြေစိုးမိုးတဲ့ နေရာတွေ အတွင်း ဒီကနေ့ တစ်ရက်တည်းမှာ ပစ်ခတ် တိုက်ခိုက်မှု ၂ နေရာ ဖြစ်ပွားခဲ့တယ်လို့ သတင်းရင်းမြစ်တွေထံက သိရပါတယ်။
လဲချားမြို့နယ်၊ ဝမ်းကန်အွန်ကျေးရွာ အနီးမှာရှိတဲ့ SSPP တပ်ဖွဲ့ရဲ့ စခန်းတစ်ခု ဒီကနေ့မနက် ၂ နာရီမှာ ချောင်းမြောင်း ပစ်ခတ်ခံခဲ့ရတယ်လို့ SSPP နဲ့ နီးစပ်တဲ့ စစ်ရေးသတင်းရင်းမြစ်က ပြောပါတယ်။
“ဒီနေ့မနက် ၂ နာရီစောစောစီးစီး အချိန်မှာပေါ့နော်။ RCSS အဖွဲ့က ဝမ်းကန်ရွာ ကျေးရွာနားက SSPP တပ်စခန်းကို လာချောင်းပစ်တာပေါ့။ ဝမ်းကန်အွန်ကတော့ လဲချားလမ်းမပေါ်ကနေ ဟိုင်းဆိုင်ရွာ လမ်းခွဲကနေ သွားရတဲ့ရွာပေါ့။ အဲ့ရွာနားမှာ ရှိတဲ့ SSPP စခန်းကို လာချောင်းပစ်တာပါ။ တိုက်ပွဲ အကြီးစားတော့ မဟုတ်ဘူး” လို့ သူကပြောပါတယ်။
SSPP တပ်စခန်းကို ချောင်းပစ်တဲ့ RCSS တပ်ဖွဲ့ဝင်တွေဟာ ကုန်းလိန်ကျေးရွာဘက်မှာ ခိုအောင်းနေတာဖြစ်ပြီး အဲ့ဒီကနေ လာရောက် ချောင်းမြောင်း ပစ်ခတ်တာ ဖြစ်တယ်လို့ အဲ့ဒီသတင်းရင်းမြစ်ကပြောပါတယ်။
RCSS က လာရောက် ချောင်းမြောင်း ပစ်ခတ်တယ်လို့ ပြောပေမယ့် တပ်ဖွဲ့တွေရဲ့ တရားဝင် ပြောရေးဆိုခွင့် ရှိသူတွေကို ဖုန်းလက်ခံဖြေတာ မရှိတာကြောင့် မဲခေါင်သတင်းဌာန အနေနဲ့ သီးခြား အတည်ပြုနိုင်ခြင်း မရှိသေးပါဘူး။
အဆိုပါ ပစ်ခတ်မှုနဲ့ ပတ်သက်ပြီး ထိခိုက်ဒဏ်ရာရရှိမှု ရှိမရှိကို မသိရသေးပါဘူး။
ဒါ့အပြင် ဒီကနေ့ ဟိုပုံးမြို့နယ်မှာလည်း SSPP တပ်စခန်းရှိတဲ့ဘက်မှာ လက်နက်ကြီး ပေါက်ကွဲသံနဲ့ လက်နက်ငယ် ပစ်ခတ်သံတွေ ထွက်ပေါ်ခဲ့တယ်လို့ ဒေသခံတွေက ပြောပါတယ်။
ဟိုပုံးမြို့နယ်၊ မိုင်းပျဉ်းကျေးရွာအုပ်စု ဝမ်းအောရွာဘက်မှာ ဒီကနေ့ မနက် ၁၁ နာရီခန့်က လက်နက်ကြီး လက်နက်ငယ် ပစ်ခတ်သံတွေ ထွက်ပေါ်ခဲ့တာဖြစ်ပြီး SSPP နဲ့ ဘယ်အဖွဲ့ တိုက်ပွဲဖြစ်တယ် ဆိုတာကိုတော့ အတိအကျ မသိရသေးဘူးလို့ ဒေသခံတွေက ပြောပါတယ်။
“အဲ့ဒီဘက်မှာ SSPP တပ်ရှိတယ်။ ပစ်တာက SSPP နဲ့ RCSS လို့လည်း ပြောကြတယ်။ RCSSက အရင်နှစ် ကတည်းက SSPP က မောင်းထုတ်ထားတာ။ အဲ့နေရာမှာ RCSS မတွေ့ရတော့ဘူး ဆိုပေမယ့် ပြောက်ကျား အနေနဲ့ ဆက်ရှိနေတာလားတော့ မပြောတတ်ဘူး။ ဒါပေမယ့် မိုင်းပျဉ်းမှာက ဗမာစစ်တပ်ရှိတယ်။ အခုက ဗမာစစ်တပ်နဲ့ သူတို့ မတည့်ဘူးလို့လည်း သတင်းထွက်နေတော့ ဗမာစစ်တပ်နဲ့ ဖြစ်တာလည်း ဖြစ်နိုင်တယ် ” လို့ ဒေသခံ တစ်ဦးက ပြောပါတယ်။
အဲ့ဒီလို ပစ်ခတ်မှု ဖြစ်တာကြောင့် ဝမ်းအောရွာ အနီးမှာရှိတဲ့ တောင်ယာထဲသွားနေတဲ့ ဒေသခံ တချို့ဟာ တောင်ယာကနေ ပြန်လာကြရပါတယ်။
“တစ်ချို့ကလည်း အဲ့ဘက်မှာ ခြံတွေ သွားလုပ်တာရှိတယ်။ လက်နက်သံတွေ ကြားတော့ အဲ့ကနေ ပြန်လာကြပြီ။ သူတို့ပြောပြချက်အရဆို လက်နက်ကြီးက သုံးလေးချက် ကြားရတာပေါ့။ သူတို့ပြန်လာတဲ့ အချိန်တော့ ပစ်ခတ်သံတွေ ငြိမ်နေပြီလို့ ပြောတယ်” လို့ ဒေသခံ တစ်ဦးက ပြောပါတယ်။
ပစ်ခတ် တိုက်ခိုက်မှုတွေဖြစ်တဲ့ ဝမ်းအောကျေးရွာဟာ စစ်ကောင်စီရဲ့ ခြေလျက်တပ်ရင်း ခလရ (၂၄၉) တပ်ရှိတဲ့ မိုင်းပျဉ်းနဲ့ ၇ မိုင်ခန့် အကွာအဝေးမှာ ရှိပါတယ်။
ဒီကနေ့ ဖြစ်ပွားခဲ့တဲ့ ပစ်ခတ်တိုက်ခိုက်မှုနဲ့ ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် နဲ့ RCSS ပြောရေးဆိုခွင့်ရှိသူ ဒု-ဗိုလ်မှူးကြီး စိုင်းအွမ်ခေး တို့ကို ဆက်သွယ် မေးမြန်းပေမယ့် ဖုန်းလက်ခံ ဖြေတာ မရှိပါဘူး။
CJ-002
#Mekongnews
#SSPP
#RCSS
#လဲချားမြို့နယ်