မဲခေါင်၊ ဇန်နဝါရီ ၁၂
တရုတ်ရဲ့ ကြားဝင်စေ့စပ်မှုနဲ့ပြုလုပ်တဲ့ ညီနောင်မဟာမိတ် ၃ဖွဲ့နဲ့ အာဏာသိမ်းစစ်တပ်တို့အကြား တွေ့ဆုံ ဆွေးနွေးပွဲမှာ ရောက်ပြီးသားတပ်နေရာတွေ ရှေ့ဆက်မတိုးဘဲ အပစ်ရပ်ဖို့ ဆိုတဲ့ အချက်အပါအဝင် အချက်တချို့ကို လက်မှတ်ရေးထိုးခဲ့တယ်လို့ မြောက်ပိုင်းအဖွဲ့တွေနဲ့ နီးစပ်တဲ့ သတင်းရင်းမြစ်က မဲခေါင်ကို ပြောပါတယ်။
ဇန်နဝါရီ ၁၀ရက်နဲ့ ၁၁ ရက်တွေမှာပြုလုပ်တဲ့ အဲဒီဆွေးနွေးပွဲမှာ လက်မှတ်ရေးထိုးနိုင်ခဲ့ပေမယ့် စစ်ကောင်စီဘက်က တောင်းဆိုတဲ့ အချက်တွေကို ပယ်ဖျက်ပြီး အချက်တချို့သာ သဘောတူနိုင်ခဲ့တယ်လို့ အဲဒီသတင်းရင်းမြစ်ကပြောပါတယ်။
“မနေ့က အဲဒီအစည်းအဝေးပြီးတယ်။ လက်မှတ်တော့ထိုးကြတယ်။ အချက်တွေအများကြီး ဖယ်ပစ်ရတယ်။ အဓိကကတော့ နစက (စစ်ကောင်စီ) က မူဆယ်လမ်းကို ဖွင့်ခိုင်းတယ်။ သူတို့အခွန်ကောက်မယ်ပေါ့။ အဲဒီအချက်ကို လုံးဝသဘောမတူဘူး။ အဲဒီတော့လမ်းကတော့ ဆက်ပိတ်မယ်ပေါ့။ နောက်တချက်က တပ်နေရာ အခုအတိုင်းရှိနေကြမယ်။ ရှေ့မတိုးဘူးပေါ့နော်။ သုံ့ပန်းလဲလှယ်ရေး ဘာမှမပါဘူး” လို့သူကပြောပါတယ်။
ရှေ့ဆက်မတိုးဘဲ အပစ်ရပ်မယ်ဆိုတဲ့ သဘောတူညီချက်မှာ ကာလသတ်မှတ်ချက်မပါသလို နောက်ထပ် သင့်တော်တဲ့ရက်မှာ ထပ်ဆွေးနွေးဖို့ ပြောကြတယ်လို့ အဲဒီသတင်းရင်းမြစ်ကပြောပါတယ်။
ဒီလိုသဘောတူ လက်မှတ်ရေးထိုးခဲ့ပေမယ့် မြေပြင်မှာတော့ တကယ်တိုက်ပွဲရပ်တန့်သွားခြင်းမရှိဘဲ ပစ်ခတ်သံတွေနဲ့ လက်နက်ကြီးသံတွေကြားနေရတုန်းဘဲလို့ ဒေသခံတွေက ပြောပါတယ်။
“ဒီမနက်ကို ပစ်နေတုန်းပဲ။ ဘာမှ အပစ်မရပ်သွားပါဘူး” လို့ လားရှိုးဒေသခံတစ်ဦးကပြောပါတယ်။
ဒီလို စာချုပ်လက်မှတ်ရေးထိုးပြီး သဘောတူတာဟာ တရုတ်ဖိအားကြောင့်သာဖြစ်ပြီး နှစ်ဖက်စလုံး အင်အားပြန်ဖြည့်ပြီး မကြာခင်ဘဲ ပြန်တိုက်ကြလိမ့်မယ်လို့ ရှမ်းပြည်အရေးလေ့လာသုံးသပ်သူ တစ်ဦးက သုံးသပ်ပါတယ်။
“အခုခဏနားတုန်း အင်အားပြန်ဖြည့်ကြမှာပေါ့။ စစ်ကောင်စီကတော့ လမ်းတွေပိတ်နေတော့ ရဟက်ယာဉ်နဲ့ဖြည့်ပေါ့။ ဒီအပစ်ရပ်သဘောတူညီချက်က မကြာခင်ပျက်မှာပဲ။ အရင်တုန်းကလည်း ဒီလိုပဲ” လို့သူကပြောပါတယ်။
ဆွေးနွေးပွဲအတွင်းစစ်ကောင်စီက ညီနောင်မဟာမိတ် ၃ဖွဲ့ကို လက်နက်အပ်ဖို့နဲ့ မအပ်ရင်လေကြောင်းက တိုက်ခိုက်မယ်လို့ မကြာခဏ ပြောဆိုခြိမ်းခြောက်ခဲ့တာကြောင့် တင်းမာမှုတွေလည်း ရှိခဲ့တယ် လို့ TNLA နဲ့နီးစပ်တဲ့ နောက်ထပ် သတင်းရင်းမြစ်တဦးကပြောပါတယ်။
၁၀၂၇ စစ်ဆင်ရေး စတင်အပြီး ရှမ်းပြည်နယ်ထဲက မြို့နယ် ၁၅ မြို့ဖြစ်တဲ့ မုန်းကိုး၊ ဖောင်းဆိုင်၊ ပန်ဆိုင်း၊ ကုန်းကြမ်း၊ လောက်ကိုင်၊ ချင်းရွှေဟော်၊ ဟိုပန်၊ ကွမ်းလုံ၊ နမ္မတူ၊ နမ့်ဆန်၊ မိုင်းငေါ့၊ မိုင်းလုံ၊ မန်တုံ၊ နမ့်ခမ်းနဲ့ ကွတ်ခိုင်မြို့တွေကို ညီနောင်မဟာမိတ်ဦးဆောင်တဲ့ တော်လှန်ရေးတပ်တွေက သိမ်းပိုက်ထားပြီး ရှမ်းမြောက်က အဓိက မြို့ကြီးတွေဖြစ်တဲ့ လားရှိုးနဲ့ မူဆယ်တို့သာ စစ်ကောင်စီလက်ထဲ ကျန်ရှိတော့တာ ဖြစ်ပါတယ်။
MK – 004
#MeKongNews
#Operation1027
#ရှမ်းမြောက်
#ကူမင်း