မဲခေါင်၊ သြဂုတ် ၁၀
ရန်ကုန်တိုင်း စစ်ဒေသ တော်လှန်ရေး အဖွဲ့တွေဟာ ရန်ကုန်မြို့နဲ့ အနီးစပ်ဆုံးမှာ ရှိနေပြီဖြစ်လို့ စစ်ကောင်စီရဲ့ အိမ်တံခါးတွေ ခေါက်ဖို့ စစ်ဆင်ရေး ရဲဘော်တွေကို စေလွှတ်လိုက်ပြီလို့ ရန်ကုန်တိုင်း စစ်ဒေသ စစ်ဆင်ရေး တာဝန်ခံ ရဲဘော်ဒေဝ က ဒီကနေ့ သတိပေး ပြောဆိုလိုက်ပါတယ်။
ရန်ကုန်တိုင်း စစ်ဒေသ တော်လှန်ရေး စစ်သည်တော်တွေကို အတွေ့အကြုံရှိ မြို့ပြပြောက်ကျား ရဲဘော်များ၊ တောတွင်း ကျေးလက် စစ်ဆင်ရေး အတွေ့အကြုံရှိ ရဲဘော်များနဲ့ စုဖွဲ့ထားပြီး တိုင်းရင်းသား မဟာမိတ်တွေနဲ့ ပူးပေါင်းပြီး စစ်ဒေသခွဲ ကွပ်ကဲမှု အသီးသီးရဲ့ ဦးဆောင်မှုနဲ့ စစ်ဆင်ရေးတွေ စနေပြီလို့ သူကဆိုပါတယ်။
“ သေချာတာ တစ်ခုကတော့ ကျွန်တော်တို့ အကုန်လုံးက ရန်ကုန်နဲ့ အနီးစပ်ဆုံးမှာ ရှိတယ်။ အချိန်မရွေး သူတို့ရဲ့ အိမ်တံခါးကို ပြန်ခေါက်နိုင်ပြီ။ သူတို့ လုံလုံခြုံခြုံ လွတ်လွတ်လပ်လပ် သွားရဲလို့လား။ မသွားရဲဘူးလေ။ ဒါမျိုးတွေထိကို လှုပ်ရှား ဆောင်ရွက်ဖို့ ကျွန်တော်တို့ လွှတ်လိုက်ပြီ” လို့ သူကပြောပါတယ်။
လက်ရှိ တန်ပြန်ထိုးစစ် ဆင်နိုင်တဲ့ အနေအထား ဖြစ်လာပြီး စစ်ကောင်စီဘက်က ပစ်ပြေးဘဝ ပြန်ရောက်သွားတဲ့ အနေအထားလို့ ရဲဘော်ဒေဝက ဆိုပါတယ်။
“ အခုဆိုရင် သူတို့တွေ ပစ်ပြေးအဆင့်ကို ပြန်ရောက်လာပြီ။ ကျွန်တော်တို့ကို ပြောတော့ ပစ်ပြေးတဲ့။ သူတို့ကမှ အခု ပစ်ပြေး ဖြစ်ပြီ။ ဟိုမှာ ပစ်လိုက် ပြေးလိုက်၊ ဒီနား ပစ်လိုက် ပြေးလိုက်နဲ့ သူတို့မှာလည်း မလုံခြုံမှုကို ခံစားနေရတဲ့ အနေအထား အထိကို ရောက်လာပြီ။ ဆိုတော့ သူတို့ရဲ့ ထိုးစစ်ကနေ တန်ပြန်ထိုးစစ် အနေအထား အထိကို ကျွန်တော်တို့ ပြောင်းလဲလိုက်ပြီ ဆိုတဲ့ အနေအထား တစ်ခုကို ကျွန်တော်တို့ ရောက်လာကြပြီဗျာ” လို့ သူက ပြောပါတယ်။
တော်လှန်ရေး ရဲဘော်တွေဟာ လူငယ်တွေ ဖြစ်တာနဲ့အညီ အိမ်လွမ်းစိတ် ပြန်ချင်စိတ်တွေနဲ့ စစ်အာဏာရှင်ကို တော်လှန်နေတာဖြစ်ပြီး တိုက်ပွဲတစ်ခု အောင်မြင်ဖို့ နောက်ကွယ်က ပေးဆပ် စွန့်လွှတ်ရမှုများစွာ ကြားက အပြုံး မပျက်ကြဘဲ ကြောက်ရွံ့တုန်လှုပ် နောက်ဆုတ်မယ့် စိတ်ဓာတ် မရှိကြောင်း ဆိုပါတယ်။
“ မစ်ရှင်တွေကို အောင်မြင်အောင် ဆောင်ရွက်တာ ရှိသလိုပဲ တစ်ဖက်မှာလည်း ကျွန်တော်တို့ ထိခိုက်မှုတွေ ဆုံးရှုံးမှုတွေ အများကြီးပဲ။ အောင်မြင်တဲ့ မစ်ရှင် တစ်ခုရဲ့နောက်ကွယ်မှာ ပေးဆပ် စွန့်လွှတ်ရမှုတွေ အများကြီးပဲ။ ကျွန်တော်တို့ ဒဏ်ရာရတယ်။ ကျွန်တော်တို့ လက်မထောင်နေတုန်းပဲ။ အဆုံးထိ သွားမယ်ဆိုတဲ့ စိတ်ဓာတ် တွေနဲ့လည်း ကျွန်တော်တို့ ရဲဘော်တွေ လာတယ်။ ဘယ်တော့မှ နောက်ပြန်လှည့်သွားတာတွေ ကြောက်ရွံ့ တုန်လှုပ်သွားတာတွေ ခုချိန်ထိ ကျွန်တော်တို့ဆီမှာ မတွေ့မိသေးဘူး” လို့ သူကပြောဆိုပါတယ်။
လက်ရှိ တော်လှန်ရေးဟာ ဈေးကြီးပြီး ရဲဘော်တွေရဲ့ ကိုယ်လက် အသက်တွေ ပေးဆပ်နေရကြောင်း ခဲယမ်းကျည်နဲ့ ငွေတွေဟာ သုံးရင် ကုန်သလို တိုက်ပွဲ တစ်ပွဲမှာ ထိုက်သင့်တဲ့ အောင်မြင်မှုရဖို့ ကုန်ကျမှုနဲ့ ပေးဆပ်မှု လိုအပ်တာကြောင့် လက်ရှိ ပြည်သူတွေရဲ့ ထောက်ပို့ အင်အား အရှိန်မလျော့ သွားတဲ့အတွက် သေချာတာကတော့ “ ကျွန်တော်တို့ ရန်ကုန်မှာ ပြန်ဆုံကြမယ်” လို့ သူက ဆိုပါတယ်။
CJ-005
#Mekongnews
#ရန်ကုန်မှာပြန်ဆုံ
#အိမ်ပြန်ချိန်
#ရဲဘော်ဒေဝ
#ရန်ကုန်တိုင်းစစ်ဒေသခွဲဌာနချုပ်
#ရန်ကုန်မြို့ပြ