မဲခေါင် ၊ ဇူလိုင် ၂၀
မြောက်ပိုင်းလက်နက်ကိုင် ၃ ဖွဲ့ဖြစ်တဲ့ ဝ ပြည်သွေးစည်းညီညွတ်ရေးပါတီ UWSP ၊ ရှမ်းပြည်တိုးတက်ရေးပါတီ SSPP ၊ အမျိုးသားဒီမိုကရက်တစ် မဟာမိတ်တပ်မတော် NDAA နဲ့ စစ်ကောင်စီရဲ့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) တို့ ဒီကနေ့ နေပြည်တော်မှာ တွေ့ဆုံဆွေးနွေးကြတယ်လို့ UWSP အဖွဲ့က ပြောပါတယ်။
ယခု တွေ့ဆုံမှုဟာ ၅ ကြိမ်မြောက်တွေ့ဆုံကြတာဖြစ်ပြီး နိုင်ငံရေးပိုင်းဆိုင်ရာအရ ထူးထူးခြားခြားဆွေးနွေးတာတွေ မရှိဘူးလို့ UWSP အဖွဲ့ရဲ့ လားရှိုးမြို့နယ် ဆက်ဆံရေးရုံးတာဝန်ခံ ဦးညီရန်းကပြောပါတယ်။
“ကျွန်တော်တို့ ပုံမှန်တွေ့ဆုံမှုပါပဲပေါ့နော်၊ ဒါက ၅ ကြိမ်မြောက်ပေါ့နော်၊ ထွေထွေထူးထူးတော့ မရှိဘူး၊ အဓိကကတော့ ကျွန်တော်တို့ ဒီဒေသတွင်း လူထုတိုးတက်ရေးလုပ်ငန်းတွေ အဲ့ဒါကိုပဲ အဓိက ဆွေးနွေးတာပဲပေါ့နော်၊ ဒီတစ်ခေါက်ကတော့ ၂ ရက်ပါပဲ။ ဒီနေ့ နဲ့ မနက်ဖြန်ပါပဲ” လို့ ဦးညီရန်းကပြောပါတယ်။
မနက်ဖြန် ဇူလိုင်လ ၂၁ ရက်နေ့မှာလည်း စစ်ကောင်စီကိုယ်စားလှယ်အဖွဲ့နဲ့ ဆက်လက်တွေ့ဆုံသွားမှာဖြစ်ပြီး နိုင်ငံရေးပိုင်းဆိုင်ရာနဲ့ပတ်သက်ပြီး အထူး ဆွေးနွေးဖို့ မရှိဘူးလို့ သူကပြောပါတယ်။
စစ်ကောင်စီ နဲ့ မြောက်ပိုင်းလက်နက်ကိုင် သုံးဖွဲ့တို့ တွေ့ဆုံဆွေးနွေးတဲ့ အခြေအနေကို ထပ်မံသိရဖို့ SSPP အဖွဲ့ကို ဆက်သွယ်မေးမြန်းပေမယ့် ပြန်လည်ဖြေဆိုခြင်းမရှိပါဘူး။
စစ်ကောင်စီကိုယ်စားလှယ်အဖွဲ့နဲ့ FPNCC အဖွဲ့ဝင်တွေဖြစ်တဲ့ UWSP၊ SSPP၊ NDAA တို့ တွေ့ဆုံဆွေးနွေးရာမှာ ဘယ်လို အချက်တွေကို ဆွေးနွေးတာလဲ မသိရသေးပေမယ့် စစ်ကောင်စီအဖွဲ့အနေနဲ့ SSPP နဲ့ စစ်ရေးတင်းမာမှု ဖြစ်ပွားခဲ့တဲ့အတွက် အဲ့ဒီ ကိစ္စတွေကို ဆွေးနွေးနိုင်တယ်လို့ ရှမ်းပြည်နယ်အရေး လေ့လာသုံးသပ်သူတစ်ဦးကပြောပါတယ်။
“ဝ အဖွဲ့ကတော့ သူတို့ရဲ့ နဂိုတောင်းဆိုချက်တွေဖြစ်တဲ့ ပြည်နယ်အဖြစ် အသိအမှတ်ပြုရေး ဖွံ့ဖြိုးရေးကိုပဲ ကိုင်ပြီး ပြောဖို့များပါတယ်။ အခု ရှမ်းပြည်နယ် အခြေအနေ အရဆိုရင် SSPP နဲ့က စစ်ရေးတင်းမာမှုတွေရှိနေတော့ အဲ့ဒီကိစ္စတွေကို စစ်ကောင်စီက ဖိပြောတာ ဆွေးနွေးလာနိုင်တာတွေ ရှိနိုင်တယ်လို့ ကျွန်တော်ထင်တယ်။ ပြီးတော့ စစ်ကောင်စီ လုပ်ချင်တဲ့ ငြိမ်းချမ်းရေးညီလာခံ ကိစ္စပေါ့လေ။ ဒါပေမယ့် ဒီတွေ့ဆုံမှုက ထူးထူးခြားခြားတော့ ဖြစ်မှာမဟုတ်ဘူးလို့ သုံးသပ်ချင်ပါတယ်” လို့ သူကပြောပါတယ်။
ပြီးခဲ့တဲ့ ၂၀၂၂ ခုနှစ်က အခု တွေ့တဲ့ မြောက်ပိုင်း ၃ ဖွဲ့နဲ့ စစ်ကောင်စီတို့ တွေ့ဆုံခဲ့တဲ့အချိန်မှာလည်း UWSP အဖွဲ့က ပြည်နယ်တောင်းခဲ့ပြီး NDAA မိုင်းလားအဖွဲ့က ကိုယ်ပိုင်အုပ်ချုပ်ခွင့်ရဒေသရဖို့ တောင်းဆိုခဲ့ဖူးပါတယ်။ အဆိုပါ အဖွဲ့တွေရဲ့ တောင်းဆိုမှုကို စစ်ကောင်စီက မူအားဖြင့် သဘောတူတယ်လို့ ပြောဆိုခဲ့ဖူးပါတယ်။
ဒါ့အပြင် အခုနေပြည်တော်မှာ တွေ့ဆုံမှုအတွင်း မြောက်ပိုင်းလက်နက်ကိုင် ၃ ဖွဲ့ရဲ့ လိုလားချက်တွေ၊ စစ်ကောင်စီရဲ့ လိုလားချက်တွေ နဲ့ ဖွဲ့စည်းပုံအခြေခံဥပဒေ ပြင်ဆင်နိုင်ရေးကိစ္စတွေကိုပါ ဆက်လက်ဆွေးနွေးဖွယ်ရှိတယ်လို့ ရှမ်းပြည်အရေးလေ့လာသူတစ်ဦးကဆိုပါတယ်။
CJ-002
#MeKongNews
#မြောက်ပိုင်းသုံးဖွဲ့
#စစ်ကောင်စီ
#နေပြည်တော်