မဲခေါင်၊ ဧပြီ ၅
ထိုင်း – မြန်မာနယ်စပ် မဲဆောက်မြို့နယ်မှာ မြန်မာ ကျောင်းသား ဦးရေ များပြားလာတဲ့ အတွက် ရွှေ့ပြာင်းကျောင်းတွေ အနေနဲ့ ၂၀၂၃-၂၄ ပညာသင်နှစ် အတွက် ကျောင်းအပ်လက်ခံဖို့ အခက်အခဲတွေ ကြုံတွေ့နေရတယ်လို့ ရွှေ့ပြောင်းကျောင်း တည်ထောင်သူတွေက ပြောပါတယ်။
ထိုင်းနိုင်ငံနယ်စပ်မှာ ဖွင့်လှစ်ထားတဲ့ ရွှေ့ပြောင်းကျောင်း အများစုဟာ ထိုင်းအာဏာပိုင်တွေနဲ့ နားလည်မှုရယူ ဖွင့်လှစ်ထားတာဖြစ်ပြီး မိဘဆရာအသင်းနဲ့ ရပ်တည်တဲ့ ကျောင်းတွေ ရှိသလို အလှူရှင်အားနဲ့ ရပ်တည်နေရတဲ့ ကျောင်းတွေလည်း ရှိတယ်လို့ မဲဆောက် ပညာရေး အသိုင်းအဝိုင်းက သိရပါတယ်။
“ကျောင်းမှာ အခက်ခဲလို့ ပြောရရင် ရွှေ့ပြောင်းကျောင်း တော်တော်များများ အလှူရှင်ကို အခြေခံပြီး ရပ် တည်ရတယ်။ အခုဆို ကျောင်းသား အင်အားကလည်း ၁၇၀ ကျော်လောက် ဖြစ်လာပြီ။ ကျောင်းဆောင်တွေ မလုံလောက်တော့ဘူး။ သင်ကြားရေး ဆရာ၊ ဆရာမ အင်အားလည်း လိုအပ်လာပြီ။ မိဘဆရာအသင်းနဲ့ ရပ်တည်တဲ့ ကျောင်းဆို ပိုဆိုးတယ်။ အခုနောက်ပိုင်းကျတော့ ကျောင်းသားတွေ များပြားလာလို့ လိုအပ်ချက်တွေ ပိုများလာတယ်” လို့ ရွှေ့ပြောင်းကျောင်း တည်ထောင်သူ တစ်ဦးက ပြောပါတယ်။
မဲဆောက်မြို့မှာ ကိုဗစ် မတိုင်ခင် ရောက်ရှိနေတဲ့ ရွှေ့ပြောင်း အလုပ်သမားတွေ အပြင် စစ်အာဏာသိမ်းပြီး နောက်ပိုင်း နိုင်ငံရေးအရ လာရောက်ခိုလှုံသူတွေ၊ စစ်ဘေးရှောင်တွေ များပြားလာတဲ့ အတွက် ရွှေ့ပြောင်းကျောင်းတွေ အနေနဲ့ စာသင်ဆောင် မလုံလောက်တာ၊ ဆရာ၊ ဆရာမ မလုံလောက်တာ၊ ရပ်တည်မှု အတွက် ငွေကြေး ခက်ခဲတာတွေ ရှိနေတယ်လို့ ဆိုပါတယ်။
“ကျမ ကလေးတွေ ကျောင်းမနေရတာ အခုဆို ၃ နှစ်ရှိသွားပြီ။ ကျမတို့က တရားမဝင် ရောက်လာတော့ အပြင်မထွက်ရဲတော့ စာသင်ကျောင်းတွေ ဘယ်နားရှိလဲ ဆိုတာ မသိခဲ့ဘူး။ အဖမ်းအဆီးတွေလည်းများ ငွေကြေး အင်အားကလည်း မတတ်နိုင်တော့ ကလေးတွေကို ပညာသင်ကြားပေးနိုင်ဖို့ တော်တော်အခက်ခဲ ဖြစ်ခဲ့တယ်” လို့ နိုင်ငံရေးအရ ထွက်ပြေး တိမ်းရှောင်လာတဲ့ မိဘ တစ်ဦးက ပြောပါတယ်။
ရွှေ့ပြောင်းကျောင်းတွေမှာ မူကြိုကနေစပြီး တက္ကသိုလ်ဝင်တန်း အထိ သင်ကြားပေး နေသလို သင်ရိုးညွှန်းတမ်း ၈၀ ရာခိုင်နှုန်းက မြန်မာနိုင်ငံမှာ သင်ကြားနေတဲ့ သင်ရိုးအတိုင်းဖြစ်ပြီး စာသင်ခန်း ပြင်ပ ပန်းချီ၊ အားကစား အပြင် ထိုင်းနိုင်ငံ သမိုင်းနဲ့ ထိုင်းစာကိုလည်း သင်ကြားပေးတယ်လို့ ကျောင်းတည်ထောင်သူ တစ်ဦးက ဆိုပါတယ်။
ဒါပေမယ့်လည်း မိခင် နိုင်ငံမှာ သင်ကြားရတာ မဟုတ်တဲ့ အတွက် ရွှေ့ပြောင်း ကလေးတွေရဲ့ ပညာရေး မရေရာမှုတွေနဲ့ ဖြတ်သန်းနေကြရပြီး အခြေတကျ မရှိတဲ့ မိဘတွေ အနေနဲ့ ရုန်းကန်နေရတာကြောင့် ကလေးတွေရဲ့ အနာဂတ်ကလည်း ဝေဝါးနေတယ်လို့ ပညာရေး လေ့လာသူ တစ်ဦးက ဆိုပါတယ်။
ထိုင်း- မြန်မာ နယ်စပ်၊ မဲဆောက်၊ တာ့ခ်ခရိုင်ထဲမှာ ရွှေ့ပြောင်း မြန်မာ ကလေးတွေကို သင်ကြားပေးနေတဲ့ ကျောင်း ၆၀ ကျော်ရှိပြီး ကျောင်းသား ဦးရေ ၁၃,၀၀၀ ဝန်းကျင် ရှိတယ်လို့ မဲဆောက် အခြေစိုက် မြန်မာပြည်သားများအရေး ပူးတွဲလှုပ်ရှားမှု ကော်မတီ-JACBA ဥက္ကဋ္ဌ ဦးမိုးကြိုး က ပြောပါတယ်။
MK-010
#MeKongNews
#မဲဆောက်
#ရွှေ့ပြောင်း
#ပညာရေး
