မဲခေါင်၊ ဇွန် ၁၇
ရှမ်း-ကရင်နီ နယ်စပ်မှာရှိတဲ့ မိုးဗြဲမြို့ကို စစ်ရေးအရ အလုံးစုံ ထိန်းချုပ်နိုင်ဖို့ စစ်ကောင်စီတပ် အင်အား အလုံးအရင်းသုံးပြီး မြို့တွင်းကို ထိုးစစ်ဆင် တိုက်ခိုက် စစ်ရှိန်မြှင့် လာတာကြောင့် မြို့ပျက်ကြီး ဖြစ်သွားမှာကို စိုးရိမ်တယ်လို့ မိုးဗြဲ မြို့ခံတွေက မဲခေါင်သတင်းဌာနကို ပြောပါတယ်။
မိုးဗြဲမြို့ဟာ စစ်ဗိုလ်ချုပ်တွေရဲ့ ခံတပ် နေပြည်တော်ကို စစ်ရေးအရ တိုက်ရိုက် ခြိမ်းခြောက်နိုင်တဲ့ နယ်ပယ်ထဲမှာ တစ်စိတ်တစ်ပိုင်း ပါဝင်နေတာကြောင့် လက်ရှိ စစ်ကောင်စီက အင်အား အလုံးအရင်း သုံးပြီး မြို့ကို ထိန်းချုပ်နိုင်ဖို့ ကြိုးစားနေတာလို့ မိုးဗြဲ PDF တပ်ဖွဲ့ဝင် တစ်ဦးက ပြောပါတယ်။
“ ကျွန်တော်တို့ တိုက်ပွဲဖြစ်နေတာ ၃ လ ဝန်းကျင်ရှိလာပြီ။ ဘာလို့ ကြာနေလဲ ဆိုတော့ ကျွန်တော်တို့ ခုခံနိုင်စွမ်း ကြောင့်ပဲ။ မိုးဗြဲမြို့က မြို့သေးတယ်။ ဒါပေမဲ့ စစ်ကောင်စီ အတွက်ရော ကျွန်တော်တို့ အတွက်ပါ စစ်ရေးအရ အရေးပါတဲ့ နေရာ ဖြစ်နေတာ။ ကျွန်တော်တို့ဆီကနေ ရှမ်းနယ်စပ်ကိုဖြတ်ပြီး ကရင်နီဘက်သွားရင် အခု တိုက်ပွဲတွေ ပြင်းထန်နေတဲ့ လွိုင်ကော်၊ ဒီးမော့ဆို၊ ဖရူဆိုတို့ဘက် တန်းနေတာပဲ။ ပြီးတော့ အပေါ်ထပ်တက်ရင် ပင်လောင်းဘက် ရောက်ပြီ ဆိုတော့ ဒီနေရာကို ကိုင်နိုင်ရင် လမ်းတစ်ခု ပိတ်ပြီးသား ဖြစ်သွားမယ်။ ဒါကြောင့် သူတို့ဘက်ကလည်း ထိခိုက်သေဆုံးမှုတွေ ရင်းပြီး ပြန်ဆုတ်သွားလိုက်၊ အင်အားဖြည့် လာတိုက်လိုက် လုပ်နေတာ” လို့ သူကပြောပါတယ်။
တိုက်ပွဲမှာ အထိနာလို့ စစ်ကောင်စီတပ်တွေ ပြန်ဆုတ်သွားတိုင်း တိုက်ပွဲဖြစ်ခဲ့တဲ့ နေရာကို လေကြောင်းက ဗုံးကြဲတာနဲ့ လက်နက်ကြီးတွေ ဆက်တိုက်ပစ်ကာ PDF တွေ နယ်မြေ ခြေကုတ် မရအောင် လုပ်လေ့ရှိပြီး အင်အားပြန်ဖြည့်ကာ နောက်ထပ် ပြန်တိုက်တာကြောင့် တိုက်ပွဲတွေက ကြာမြင့်နေတာလို့ မိုးဗြဲ PDF တပ်ဖွဲ့ဝင် တစ်ဦးက ပြောပါတယ်။
ပြီးခဲ့တဲ့ မေလ ၂၇ ရက်ကစပြီး တစ်ကျော့ပြန် တိုက်ပွဲတွေ ပြင်းထန်လာတဲ့ မိုးဗြဲမြို့ပေါ်မှာ လူဦးရေ ၃၀,၀၀၀ ကျော် နေထိုင်ပြီး လက်ရှိ ပြည်သူတွေ စစ်ဘေးလွတ်ရာ ထွက်ပြေးကြလို့ မြို့ပေါ်မှာ လူသူမရှိသလောက် ဖြစ်နေပြီလို့ ဒေသခံ တစ်ဦးက ပြောပါတယ်။
“လက်ရှိမှာတော့ မိုးဗြဲမြို့ပေါ်မှာ ဘယ်သူမှ မကျန်တော့ဘူး။ ကျန်ခဲ့လည်း ခေါင်းမာတဲ့ လူဆယ်ဂဏန်းပေါ့။ ဆက်နေလို့ ကတော့ မဖြစ်တော့ဘူးလေ။ တိုက်ပွဲတွေကြားမှာ ကျန်ခဲ့တဲ့ သူတွေကို စစ်တပ်က လိုက်သတ်နေတာ။ ဆက်နေရင် ကျွန်တော်တို့လည်း အသတ်ခံရမှာစိုးတော့ အထုပ်ဆွဲပြီး ပြေးရတာပဲ။ ဟိုကောင်တွေက အသက်ကြီးတာ၊ ငယ်တာ၊ ယောကျ်ား၊ မိန်းမ ခွဲတာ မဟုတ်ဘူး။ မဲမဲမြင်ရာ ပစ်နေတာ။ အိမ်ပြာကျသွားတာမှ ပြန်ဆောက်လို့ ရသေးတယ်ဆိုပြီး ဖြေသိမ့်ပြေးရတာပဲ ညီလေးရေ” လို့ သူကပြောပါတယ်။
တိုက်ပွဲတွေ အတွင်း စစ်ကောင်စီတပ်က မြို့ပေါ် လူနေရပ်ကွက်တွေကို ပစ်မှတ်ထား လေကြောင်းကနေ ဗုံးကြဲကာ နေ့စဉ် လက်နက်ကြီးတွေနဲ့ ပစ်ခတ်နေတာကြောင့် ချင်းပြည်နယ်၊ ထန်တလန်မြို့လို မြို့ပျက်ကြီး ဖြစ်သွားမှာကိုလည်း စိုးရိမ်နေကြတယ်လို့ ဒေသခံတွေက ဆိုပါတယ်။
ထန်တလန်မြို့ဟာ ၂၀၂၁ ခုနှစ်၊ စက်တင်ဘာလထဲမှာ ဒေသခံ ပြည်သူ့ကာကွယ်ရေးတပ်တွေနဲ့ စစ်ကောင်စီတပ် တိုက်ပွဲတွေ အပြင်းအထန် ဖြစ်ပွားပြီးနောက် မြို့လုံးကျွတ် ဘေးလွတ်ရာကို ထွက်ပြေး တိမ်းရှောင်ခဲ့ရတာ လက်ရှိ အချိန်အထိ ဖြစ်ပါတယ်။
၂၀၂၁ ခုနှစ်၊ အောက်တိုဘာလ ၂၉ ရက်မှာတော့ စစ်ကောင်စီတပ်က လက်နက်ကြီးတွေနဲ့ ထန်တလန်မြို့ထဲ ရမ်းကား ပစ်ခတ်လို့ မြို့တွင်းနေရာ ၅ ခုမှာ ပေါက်ကွဲ မီးလောင်ပြီးနောက် တစ်မြို့လုံး နီးပါးက ဘာသာရေး အဆောက်အအုံတွေနဲ့ လူနေအိမ်တွေ မီးလောင်ပျက်စီးပြီး လက်ရှိအချိန်ထိ မြို့ပျက်ကြီး ဖြစ်နေပါတယ်။
MK-007
#MeKongNews
#မိုးဗြဲမြို့
#ထန်တလန်မြို့
