မဲခေါင်၊ ဩဂုတ် ၁၂
ရှမ်းပြည်နယ် တောင်ပိုင်း၊ မိုင်းကိုင်မြို့နယ်မှာ တိုက်ပွဲဖြစ်ပွားပြီးနောက် စစ်ကောင်စီက မြို့ပေါ်မှာ ညမထွက်ရ အမိန့် ထုတ်ပြန်ထားသလို ရှမ်းပြည်တိုးတက်ရေးပါတီ SSPP ကလည်း ကျေးရွာတွေမှာ ညမထွက်ရ အမိန့် ထုတ်ပြန်လိုက်တယ်လို့ ဒေသခံတွေက ပြောပါတယ်။
မိုင်းကိုင်မြို့နယ်ရှိ ကျေးရွာအုပ်စုတွေကို SSPP တပ်ဖွဲ့က အစည်းအဝေး ခေါ်ယူပြီး ဩဂုတ်လ ၉ ရက်မှစကာ ညမထွက်ရ အမိန့် ထုတ်ပြန်လိုက်တာ ဖြစ်တယ်လို့ ဒေသခံတွေက ပြောပါတယ်။
“ရန်သူတွေက အရပ်ဝတ်နဲ့ ညဘက်တွေမှာ သွားလာလှုပ်ရှားပြီး သူတို့တပ်ဖွဲ့တွေကို ချောင်းမြောင်း ပစ်ခတ် တာတွေ ပြုလုပ်လို့ မှားယွင်းတာတွေ မဖြစ်အောင် ညဘက်မထွက်ရ အမိန့်ကို ထုတ်ရတာလို့ အစည်းအဝေးမှာ ပြောတာပေါ့နော်။ ပြီးတော့ အခုက မြန်မာစစ်တပ်နဲ့ အခြေအနေ မကောင်းလို့ပေါ့။ ဒါပေမယ့် အဲ့လို အမိန့်ထုတ်တာက ပြည်သူတွေ အရေးအမျိုးမျိုးကြောင့် သွားလာဖို့ အခက်အခဲ ဖြစ်ကုန်တာပေါ့နော်။ မြို့ဆင်းပြီး ကုန်ပစ္စည်းတွေ ဝယ်ယူဖို့ ရောင်းချဖို့ အတွက်လည်း အခက်အခဲ ဖြစ်ကုန်တာပေါ့” လို့ မိုင်းကိုင် ဒေသခံ တစ်ဦးက ပြောပါတယ်။
စစ်ကောင်စီနဲ့ SSPP တိုက်ပွဲ ဖြစ်ပွားပြီးနောက် စစ်ကောင်စီက ဩဂုတ်လ ၇ ရက်မှာ လဲချား၊ မိုင်းကိုင်၊ မိုင်းနောင်မြို့ တွေမှာ ညမထွက်ရ အမိန့် ထုတ်ပြန်ပြီးနောက် SSPP က ကျေးရွာတွေမှာ ညမထွက်ရ အမိန့် ထုတ်ပြန်တာလို့ ဒေသခံ အမျိုးသား တစ်ဦးက ပြောပါတယ်။
“မြန်မာစစ်တပ်က မြို့ထဲထုတ် သူတို့က ရွာတွေဘက်ထုတ် ဆိုတော့ တစ်မြို့နယ်လုံး ညမထွက်ရတဲ့ ပုံစံ ဖြစ်နေတယ်။ မြို့အဝင်အထွက်တွေနားမှာဆို သူတို့စခန်းတွေက နီးနီးလေးတွေပဲ။ အမိန့်မထုတ်လည်း တိုက်ပွဲ ဖြစ်ကတည်းက ညဘက် ၈ နာရီလောက်ဆို အပြင်ထွက်တာ သိပ်မရှိတော့ဘူး။ လူထုကတော့ ၂ ဘက်စလုံးကို ကြောက်နေရတော့ အခြေအနေကြည့်ပြီး နေထိုင်ရတာပဲ” လို့ မိုင်းကိုင်မြို့ခံ တစ်ဦးက ပြောပါတယ်။
အခုလို SSPP တပ်ဖွဲ့က ညမထွက်ရ အမိန့်ထုတ်ပြန်ပေမယ့် ဘယ်ကာလအထိ ဖြစ်တယ် ဆိုတာကိုတော့ မပြောသွားဘူးလို့ ဒေသခံတွေက ပြောပါတယ်။
“ဘယ်လအထိလည်း မပြောဘူး။ သူတို့ ထပ်ပြီး မပြောမချင်း မထွက်ရဘူးဆိုတဲ့ သဘော ဖြစ်နေတာပေါ့။ ကျွန်တော်တို့ ရွာမှာ လာပြောတာက ည ၈ နာရီကနေ မနက် ၆ နာရီအထိလို့ ပြောသွားတယ်။ ပြည်သူတွေ အတွက်တော့ ကျန်းမာရေး၊ စီးပွားရေး ကိစ္စတွေမှာ ထိခိုက်ကုန်တာပေါ့ဗျာ” လို့ နောက်ထပ် ဒေသခံတစ်ဦးက ပြောပါတယ်။
SSPP က ညမထွက်ရ အမိန့် ထုတ်ပြန်ရာမှာ ကျေးရွာအုပ်စု တစ်ခုနဲ့ တစ်ခု မတူဘဲ တစ်ချို့အုပ်စုမှာ ည ၇ နာရီမှ မနက် ၆ နာရီအထိ အပြင်ထွက်ခွင့် တားမြစ်ထားတယ်လို့လည်း သိရပါတယ်။
အခုလို ညမထွက်ရ အမိန့်ထုတ်ပြန်တာနဲ့ ပတ်သက်ပြီး SSPP ပြောရေးဆိုခွင့်ရှိသူတွေကို ဆက်သွယ်မေးမြန်းဖို့ ကြိုးစားပေမယ့် ဆက်သွယ်လို့ မရခဲ့ပါဘူး။
ရှမ်းပြည်တိုးတက်ရေးပါတီ SSPP တပ်ဖွဲ့ဟာ ပြီးခဲ့တဲ့ မေလထဲမှာလည်း မိုင်းကိုင်မြို့နယ်ရှိ ကျေးရွာအုပ်စု ၄ ခုကို SSPP က ထုတ်ပေးထားတဲ့ ခရီးသွားလာခွင့် လက်မှတ်ပါမှ ခရီးသွားလာခွင့်ပြုတဲ့ အမိန့် ထုတ်ပြန်ခဲ့ပါသေးတယ်။
စစ်ကောင်စီက SSPP အဖွဲ့ကို တပ်ဆုတ်ခိုင်းရာမှ စစ်ရေးတင်းမာမှု ဖြစ်ပွားခဲ့ပြီး ဩဂုတ်လ ၆ ရက်နေ့မှာ တိုက်ပွဲဖြစ်ပွားရာ ၂ ဘက် ထိခိုက်ကျဆုံးမှုတွေ ရှိခဲ့ပါတယ်။
CJ-002
#Mekongnews
#SSPP
#မိုင်းကိုင်မြို့နယ်
#ညမထွက်ရအမိန့်
