မဲခေါင်၊ ဇူလိုင် ၂၀
ကရင်နီ၊ စစ်ကိုင်း၊ ချင်း မကွေး၊ အလယ်ပိုင်းတိုင်းဒေသတွေအတွက် မမများနဲ့ ပွဲကမယ် ဘဏ္ဍာငွေ ရှာဖွေရေး ပရော့ဂျက် ၄ ကြိမ်ကနေ အမေရိကန်ဒေါ်လာ ၁ ဒသမ ၉၈ သန်း ရရှိခဲ့တယ်လို့ သိရပါတယ်။
ငွေကြေးခွဲဝေသုံးစွဲမှုမှာ အမေရိကန်ဒေါ်လာ ၁ ဒသမ ၅၅ သန်းကို ကာကွယ်ရေးဝန်ကြီးဌာန ကွပ်ကဲမှု လက်အောက်ရှိ တပ်ရင်း၊ တပ်ဖွဲ့တွေအတွက် သုံးစွဲခဲ့ပြီး အမေရိကန်ဒေါ်လာ ၀ ဒသမ ၂၅ သန်း ကို ကရင်နီအမျိုးသားများကာကွယ်ရေးတပ် KNDF ၊ ၀ ဒသမ ၁၄ သန်းကို ချင်းတော်လှန်ရေးတပ်ပေါင်းစု CJDC၊ အမေရိကန်ဒေါ်လာ ၀ ဒသမ ၀၄ သန်းကို အခြားတော်လှန်ရေးအင်အားစုတွေအတွက် ရည်ရွယ်ပြီး သုံးစွဲနေတယ်လို့ အမျိုးသားညီညွတ်ရေးအစိုးရ ကာကွယ်ဝန်ကြီးဌာန(MOD)က ဇူလိုင် ၁၉ ရက်နေ့မှာ ထုတ်ပြန်ခဲ့ပါတယ်။
“မမများနဲ့ ပွဲကမယ်”ပဉ္စမမြောက် ပရောဂျက်ကို စတင်တော့မှာဖြစ်ပြီး အခုတစ်ခေါက် ရရှိလာမယ့် ရန်ပုံငွေတွေကို နေပြည်တော်မှာရှိတဲ့ အလယ်ပိုင်းတိုင်း စစ်ဌာနချုပ်က နေပြည်တော် PDF တပ်ရင်းတွေကို လက်နက်ကြီး တပ်ဆင်ပေးသွားမယ်လို့ ဆိုထားပါတယ်။
မမများနဲ့ ပွဲကမယ် ပရော့ဂျက်တိုင်းမှာ လျာထားရန်ပုံငွေထက် ပိုမိုရရှိခဲ့ပြီး ကရင်နီပရော့ဂျက်အတွက် သိန်း ၅” ၀၀၀ လျာထားရာ အမေရိကန်ဒေါ်လာ ၂၉၂,၀၀၀ ကျော် ရရှိခဲ့ပါတယ်။
စစ်ကိုင်းတိုင်း ပရောဂျက်မှာတော့ သိန်း ၁၀,၀၀၀ ကျပ် လျာထားခဲ့ရာ ဒေါ်လာ ၁ ဒသမ ၁ သန်း ကျော်ထိ ရရှိခဲ့ပြီး တတိယ ပရော့ဂျက်ဖြစ်တဲ့ ချင်းနဲ့ မကွေးဒေသအတွက် သိန်း ၁၀,၀၀၀ ကျပ် လျာထားမှုမှာ ဒေါ်လာ ၄၁၈,၀၀၀ နီးပါးထိ ရရှိခဲ့တယ်လို့ သိရပါတယ်။
စတုတ္ထ ပရောဂျက်ဖြစ်တဲ့ အလယ်ပိုင်းဒေသ အတွက်မှာတော့ လျာထားချက် မထားခဲ့ဘဲ ဒေါ်လာ ၁၆၀,၀၀၀ ရရှိခဲ့တယ်လို့ ဆိုပါတယ်။
“နေပြည်တော်ကို ဝိုင်းပတ်လို့ မမများနဲ့ပွဲကစို့” ပဉ္စမမြောက် ပရောဂျက်အတွက် သိန်း ၁၀,၀၀၀ လျာထားပြီး ဇူလိုင်လ ၂၃ ရက်နေ့ကနေ ဩဂုတ်လ ၁၅ ရက်အထိ သတ်မှတ်ထားတယ်လို့ သိရပါတယ်။
MTG
#Mekongnews
#မမများနဲ့ပွဲကမယ်
#လက်နက်ကြီး
#ရန်ပုံငွေ
#MOD