မဲခေါင်၊ စက်တင်ဘာ ၃၀
ကရင်နီပြည်နယ်၊ ဖရူဆိုမြို့နယ်မှာ စစ်ကောင်စီက လက်နက်ကြီးနဲ့ ပစ်ခတ်ပြီး လေကြောင်းကပါ တိုက်ခိုက်နေလို့ တောင်ယာ စိုက်ပျိုးမှုတွေ ရပ်ဆိုင်းထားရတယ်လို့ ဒေသခံတွေက ပြောပါတယ်။
ဒေသအခြေစိုက် စစ်ကောင်စီ ခမရ (၄၂၈) နဲ့ ခမရ (၅၃၁) တပ်တွေက ပြီးခဲ့တဲ့ တစ်ပတ်ကစပြီး နေ့စဥ် လက်နက်ကြီးနဲ့ ပစ်ခတ်နေသလို လေကြောင်းကပါ တိုက်ခိုက်နေလို့ တောင်သူတွေ စိုးရိမ်ကြောက်လန့်ကာ တောင်ယာ မသွားရဲ ဖြစ်နေတယ်လို့ ဒေသခံတွေက ဆိုပါတယ်။
“သွားရဲတဲ့လူတော့ မရှိသလောက်ပဲ။ တချို့ အရမ်းခက်ခဲတဲ့ လူတွေတော့ အသက်စွန့်ပြီး သွားရတာပေါ့။ သွားတဲ့ လူတွေကတော့ စိုက်ခင်းထဲမှာ လက်နက်ကြီး ကျည်ခွံတွေ တွေ့တယ်လို့ ပြောတာပဲ” လို့ ဒေသခံ တောင်သူ တစ်ဦးက ပြောပါတယ်။
လတ်တလော ဖရူဆိုမြို့နယ်ထဲကို နေ့စဥ် လက်နက်ကြီး အနည်းဆုံး ၃ ကြိမ် ပစ်ခတ်နေပြီး ၃ ရက်ခြား တစ်ခါ လေကြောင်းကနေ ပစ်ခတ် တိုက်ခိုက် နေတယ်လို့ သူက ဆက်ပြောပါတယ်။
ဖရူဆိုမြို့နယ် ဒေသခံတွေဟာ စစ်ဘေးရှောင်နေရာက လက်ရှိ တိုက်ပွဲ ဖြစ်ပွားမှု နည်းပါးလို့ နေရပ်ပြန်လာပြီး တောင်ယာ လုပ်ကိုင်နေရာက အခုလို ပစ်ခတ်မှုတွေကြောင့် တောင်ယာ မသွားနိုင်တော့လို့ စားဝတ်နေရေး ပိုခက်ခဲလာမှာ စိုးရိမ်နေကြတယ်လို့ ဒေသခံတွေက ပြောပါတယ်။
“လူပဲ မဟုတ်ဘူး။ အိမ်မွေး တိရစ္ဆာန် အတွက်ပါ ကြောက်နေရတယ်။ လူက အသံကြားရင် ပြေးလို့ရတယ်လေ။ ကျွဲတွေ နွားတွေက သေမှာ။ အရင်ကလည်း သူတို့ ပစ်လို့ တိရစ္ဆာန်တွေ သေဖူးတယ်” လို့ စစ်ဘေးရှောင် တစ်ဦးက ပြောပါတယ်။
အခုလို ပစ်ခတ်မှုတွေ သာမက ဓါတ်မြေဩဇာ ဈေးနှုန်း အဆမတန် မြင့်တက်နေတာ၊ တောင်ယာ စိုက်ခင်း အတွက် ရေရှားပါးတာ၊ လက်နက်ကြီးဒဏ်ကြောင့် ကျွဲနွားတွေ သေဆုံးတာ စတဲ့ အခက်အခဲတွေလည်း ကြုံတွေ့နေရတယ်လို့ တောင်သူတွေက ပြောပါတယ်။
လက်ရှိ ဖရူဆိုမြို့နယ်မှာ စစ်ဘေးရှောင် ၁၀,၀၀၀ ကျော် နေထိုင်ပြီး လတ်တလော တောင်ယာ စိုက်ဧက ၃၀၀ ၀န်းကျင် ရပ်ဆိုင်းထားရတယ်လို့ သိရပါတယ်။
CJ-007