မဲခေါင်၊ ဇူလိုင် ၁၄
ရှမ်းပြည်နယ် တောင်ပိုင်း၊ ဖယ်ခုံမြို့နယ် အနောက်ခြမ်းကျေးရွာတွေမှာ ဇွန်၊ ဇူလိုင်လ အတွင်း တိုက်ပွဲတွေ ပြင်းထန်ခဲ့ရာ စစ်ကောင်စီတပ်သား ၁၉ ဦး သေဆုံးပြီး တင့်ဖျက်မိုင်း အပါအဝင် လက်နက်တွေ ရခဲ့တယ်လို့ Karenni Revolution Union – KRU က ဒီနေ့ ထုတ်ပြန်ပါတယ်။
ဖယ်ခုံ အနောက်ခြမ်း၊ ခေါင်းအိနဲ့ စက်တော်မှာ တပ်စွဲထားတဲ့ စစ်ကောင်စီတပ်တွေနဲ့ PKPDF-1002 တပ်ရင်းတို့ ၂ လအတွင်း တိုက်ပွဲပေါင်း ၁၃ ကြိမ် ဖြစ်ပွားရာ စစ်တပ်ဘက်က ဒဏ်ရာရသူ အများအပြား ရှိခဲ့တယ်လို့ ဆိုပါတယ်။
အဆိုပါ တိုက်ပွဲတွေကို PKPDF နဲ့အတူ KRY၊ SSDF (ရှမ်းတောင်ဒရုန်းတပ်ဖွဲ့)၊ LKPDF နဲ့ ရှမ်းတောင် တပ်ပေါင်းစုအဖွဲ့ (1003၊ 1005၊ 1008၊ 1009-IPDF)၊ SSLRU နဲ့ NPT ပကဖ စတဲ့ ညီအစ်ကို တပ်ရင်းတွေ ပါဝင်ခဲ့တယ်လို့ သိရပါတယ်။
တိုက်ပွဲတွေ အတွင်း တော်လှန်ရေး ပူးပေါင်းတပ်ဖွဲ့ဝင် ရဲဘော် ၃ ဦး ထိခိုက်ဒဏ်ရာ ရရှိခဲ့ပြီး ဖယ်ခုံ PDF က ရဲဘော်တစ်ဦး ကျဆုံးခဲ့ကာ ထိခိုက်ဒဏ်ရာရ ရဲဘော်တွေ ကတော့ လက်ရှိ ဆေးကုသမှု ခံယူလျက်ရှိတယ်လို့ KRU က ဆိုပါတယ်။
တိုက်ပွဲတွေကို စစ်ကောင်စီ ခလရ (၂၄၈) တပ်ရင်းတွေနဲ့ ပျူစောထီးတို့ ပူးပေါင်း တိုက်ခိုက်ခဲ့တာဖြစ်ပြီး KRU ရဲ့ စာရင်းအရ MG-3 ငါးကြင်းမြီး တစ်လက်၊ MA-3 တစ်လက်၊ တင့်ဖျက်မိုင်း အပါအဝင် ကျည်ခဲယမ်းများ ရရှိခဲ့တယ်လို့ ကရင်နီ တော်လှန်ရေး တပ်ပေါင်းစုက ပြောပါတယ်။
ပြီးခဲ့တဲ့ ဇွန်လ အတွင်း ဖယ်ခုံမြို့နယ်ထဲမှာ တိုက်ပွဲငယ်တွေ ဖြစ်ပွားခဲ့ရဲ့ မိုးဗြဲနဲ့ ဖယ်ခုံမြို့နယ်တွေကို စစ်တပ်က တိုက်လေယာဉ်နဲ့ အကြိမ်ပေါင်းများစွာ ဗုံးကြဲ တိုက်ခိုက်တာ၊ လက်နက်ကြီး ပစ်ခတ်တာတွေကြောင့် နေအိမ်နဲ့ ဘာသာရေး အဆောက်အအုံတွေ ထိခိုက်ပျက်စီးခဲ့တယ်လို့ KNDF က ဇူလိုင် ၅ ရက်နေ့မှာ ထုတ်ပြန်ထားပါတယ်။
KRU ဟာ ကရင်နီပြည်နယ်နဲ့ ရှမ်း-ကရင်နီနယ်စပ် ဒေသတွေမှာ စစ်ကြောင်းတွေခွဲပြီး စစ်ကောင်စီတပ်ကို တိုက်ခိုက်နေတာ ဖြစ်ပါတယ်။
MK-009 MK-007
#MekongNews
#ဖယ်ခုံမြို့နယ်
#တင့်ဖျက်မိုင်း
#KRU