မဲခေါင်၊ နိုဝင်ဘာ ၉
မန္တလေးတိုင်း၊ မြင်းခြံမြို့နယ်၊ ပျားကျေးရွာမှာ ကလေးအပါအ၀င် လူ ၆ ဦးသတ်ပြီး ရွာမီးရှို့ကာ ပြန်ထွက်လာတဲ့ စစ်ကောင်စီ ကားတစ်စီးကို တော်လှန်ရေး ပူးပေါင်းတပ်တွေ မိုင်းဆွဲ တိုက်ခိုက်ရာ စစ်သား ၂ ဦးသေပြီး တစ်ဦး ဒဏ်ရာရခဲ့တယ်လို့ Myingyan Black Tiger (MBT) တာဝန်ခံ ဗိုလ်မိုက်ခဲက မဲခေါင်သတင်းဌာနကို ပြောပါတယ်။
မနေ့က နိုဝင်ဘာ ၇ ရက်နေ့၊ မနက်ပိုင်းမှာ ပျားကျေးရွာထဲကနေ ပြန်ထွက်လာတဲ့ စစ်သား ၁၀ ဦး ဝန်းကျင်ပါ စစ်တပ်ပိုင် 4 wheel ကားအဖြူရောင် တစ်စီးကို နွားထိုးကြီးမြို့နယ်၊ မင်းရွာနဲ့ ကူကုန်းရွာကြားမှာ ၆ လုံးတွဲ ပဒေသာမိုင်းနဲ့ မိုင်းဆွဲ တိုက်ခိုက်ခဲ့တာ ဖြစ်ပါတယ်။
“တစ်ယောက်က ကားပေါ်မှာပဲ ပွဲချင်းပြီး သေသွားတာ၊ နောက်တစ်ယောက်က မြင်းခြံ ပြည်သူ့ဆေးရုံကြီးမှာ သေသွားတာ။ နောက်တစ်ယောက်ကတော့ မသေသေးပါဘူး။ ၃ ယောက် ထိတာပေါ့။ နောက်တစ်ယောက်က မသေဘူး၊ မြင်းခြံ ပြည်သူ့ဆေးရုံမှာပဲ တော်တော်ပြင်းပြင်းထန်ထန် ဒဏ်ရာရထားတယ်။ ကုနေတုန်းပဲ ရှိပါသေးတယ်” လို့ ဗိုလ်မိုက်ခဲက ပြောပါတယ်။
မိုင်းဆွဲ တိုက်ခိုက်ခံရပြီးနောက် ကားပေါ်ကနေ လမ်းတလျှောက် တရစပ် ပစ်ခတ်ခဲ့ပေမယ့် တော်လှန်ရေး တပ်ဖွဲ့ဝင်တွေဘက်က ထိခိုက်မှု မရှိခဲ့ဘူးလို့ ဆိုပါတယ်။
မိုင်းဆွဲခံရတဲ့ စစ်ကောင်စီတပ်ဖွဲ့ဟာ မနေ့က မနက် ၆ နာရီဝန်းကျင်မှာ ပျားကျေးရွာထဲ လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်ပြီး နေအိမ် ၃ လုံး မီးရှို့ဖျက်ဆီးကာ အရပ်သား ၆ ဦးကို သတ်ဖြတ်ခဲ့တာ ဖြစ်ပါတယ်။
MBT တာဝန်ခံ ဗိုလ်မိုက်ခဲက ပျားကျေးရွာထဲမှာ အရပ်သား ၆ ဦးကို စစ်တပ်က သတ်ဖြတ်ခဲ့တယ်လို့ ကြားရပေမယ့် အင်တာနက်နဲ့ ဖုန်းလိုင်း အခက်အခဲတွေကြောင့် အတည်မပြုနိုင်သေးဘူးလို့ ပြောပါတယ်။
ဒါပေမယ့် မနေ့က မနက်က ပျားကျေးရွာထဲ ဝင်ရောက်ခဲ့တဲ့ စစ်တပ်ဟာ ကျေးရွာမှာ နေထိုင်တဲ့ အသက် ၃ နှစ်အရွယ် ကလေး အပါအဝင် ပြည်သူ ၆ ဦးကို သတ်ဖြတ်ခဲ့ကာ ရုပ်အလောင်းတွေကို နွားချေးပုံအောက်မှာ မြှုပ်နှံခဲ့တာလို့ နွားထိုးကြီး သတင်းစုံ လူမှုကွန်ရက် စာမျက်နှာက ဖော်ပြပါတယ်။
မနက်ပိုင်းမှာ ရွာကို ပစ်ခတ်ဝင်ရောက်ခဲ့တဲ့ စစ်တပ်ရဲ့ လက်နက် ထိမှန်မှုကြောင့် အသက် ၃ နှစ်အရွယ် မရွှန်းလဲ့ချို သေဆုံးခဲ့ရပြီး ရွာထဲမှာ ကျန်နေခဲ့တဲ့ ကိုဂျစ်တူး၊ ကိုရဲဝင်း၊ ကိုကျော်မင်းသန့်၊ မောင်ပြည့်ဖြိုးနဲ့ မောင်ထက်မြက်အောင် တို့ကိုတော့ စစ်တပ်က ဖမ်းဆီး စစ်မေး ရိုက်နှက် သတ်ဖြတ်ကာ အလောင်းတွေကို နွားချေးပုံအောက်မှာ မြှုပ်ခဲ့တာလို့ ဒေသခံ တစ်ဦးက ပြောပါတယ်။
“စစ်တပ်ကလည်း လက်နက်ကြီးတွေနဲ့ ပစ်ပြီး ဝင်လာတယ်။ ရွာသူရွာသားတွေလည်း ရှောင်တဲ့သူက ရှောင်ပေါ့။ စစ်ရှောင်တဲ့ထဲမှာမှ သားအမိ ၂ ယောက်ပြေးရင်းနဲ့ ကလေးကတော့ လက်နက်မှန်ပြီး သေသွားတယ်။ မအေ ကတော့ လက်မောင်း ကျည်ထိသလောက်ပဲရှိတယ်။ ဟို ၅ ယောက်ကျတော့ သူတို့က မရှောင်ဘူး၊ ကလေးတွေက ငယ်တော့ သူတို့ဒီလိုလုပ်မယ်မှန်း မထင်ဘူးပေါ့။ အဲ့မှာ ဖမ်းဆီးမေးမြန်းပြီး သူတို့လိုချင်တဲ့တိုင်း မဖြစ်တော့ အိမ်တွေ မီးရှို့ပြီး သတ်သွားတာပေါ့” လို့ အဆိုပါ ဒေသခံက ရှင်းပြပါတယ်။
အသတ်ခံရတဲ့ လူငယ်တွေဟာ အသက် ၃၀ အောက် အရွယ်တွေဖြစ်ပြီး မောင်ထက်မြက်အောင် ကတော့ အသက် ၁၃ နှစ် ဝန်းကျင်သာ ရှိသေးကာ အလောင်းတွေကို ဒေသခံ ကျေးရွာသားတွေ ပြန်လည် တူးဖော်ပြီး နေရာ တစ်ခုမှာ ကျေးရွာဓလေ့ အတိုင်း ပြန်လည် သင်္ဂြိုဟ် ပေးခဲ့တယ်လို့ သိရပါတယ်။
လက်ရှိအချိန်မှာ အိမ်ခြေ ၂၀၀ ဝန်းကျင်ရှိတဲ့ ပျားကျေးရွာထဲမှာ စစ်ကောင်စီတပ်သား တချို့ ကျန်ရှိနေသေးပြီး ဒေသခံ ပြည်သူအများစု နေရပ်စွန့်ခွာ ထွက်ပြေးနေရကာ အသက်အရွယ်ကြီးသူ တချို့သာ ကျန်နေခဲ့တယ်လို့ ဒေသခံတွေက ပြောပါတယ်။
ပျားကျေးရွာ အပါအဝင် နီးစပ်ရာ ကျေးရွာတွေမှာလည်း စစ်ကောင်စီတပ်တွေ ကင်းပုန်းဝပ်နေပြီး အခုရက်ပိုင်း ဒေသတွင်းက ပြည်သူ့ကာကွယ်ရေးတပ်ဖွဲ့တွေနဲ့ တိုက်ပွဲ မကြာခဏ ဖြစ်နေတယ်လို့ ဒေသခံတွေက ပြောပါတယ်။
MK – 009
#MeKongNews
#ပျားကျေးရွာ
#မိုင်းဆွဲ
#ဗိုလ်မိုက်ခဲ
#ဓာတ်ပုံ – နွားထိုးကြီးသတင်းစုံ၊ Myingyan Black Tiger