မဲခေါင်၊ ဖေဖော်ဝါရီ ၆
စစ်ကိုင်းတိုင်း၊ ပုလဲမြို့နယ်ရှိ စစ်ကောင်စီတပ်တွေနဲ့ ပျူစောထီးတွေ မီးရှို့ဖျက်ဆီးမှုကြောင့် မီးဘေးသင့်ခဲ့ရတဲ့ ကျေးရွာ ၇ ရွာသို့ မြို့နယ် ပြည်သူ့အုပ်ချုပ်ရေးအဖွဲ့က ကျပ်သိန်း ၃၅၀ ကျော် တန်ဖိုးရှိ အကူအညီတွေ မနေ့က ထောက်ပံ့ ပေးအပ်ခဲ့တယ်လို့ သိရပါတယ်။
အဲဒီ မီးဘေးသင့်ကျေးရွာ ၇ ရွာရှိ အိမ်ထောင်စု ၁၆၂ စုအတွက် ကမ်းလက်မေတ္တာအဖွဲ့မှ လှူဒါန်းတဲ့ ငွေကျပ် ၃၅,၆၃၀,၄၀၀ တန်ဖိုးရှိ ပစ္စည်းတွေကို အိမ်ထောင်စု တစ်စု ပစ္စည်း ၁၆ မျိုးနဲ့ ထောက်ပံ့ပေးခဲ့တာလို့ သိရပါတယ်။
အလားတူ အမျိုးသား ညီညွတ်ရေး အစိုးရ၊ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနမှ ထောက်ပံ့တဲ့ ငွေကျပ်၂၁ သိန်းကိုလည်း ပုလဲမြို့နယ် လူသားချင်း စာနာ ထောက်ထားရေး တာဝန်ခံမှ မီးဘေးသင့် ကျေးရွာ ၇ ရွာရှိ ကျေးရွာ ပြည်သူ့အုပ်ချုပ်ရေးအဖွဲ့တွေထံ ပေးအပ်ခဲ့တယ်လို့ ဆိုပါတယ်။
အဲဒီ ကျေးရွာတွေသို့ သွားရောက်ထောက်ပံ့မှုတွေ ပြုလုပ်ရာမှာ ပုလဲမြို့နယ် အခြေစိုက် ယင်းမာပင်ခရိုင် တပ်ရင်းတွေက လုံခြုံရေး ယူပေးခဲ့တယ်လို့ သိရပါတယ်။
ဓာတ်ပုံ-ပုလဲမြို့နယ် ပြည်သူ့အုပ်ချုပ်ရေးအဖွဲ့။
MK-003